ក្រសួងមហាផ្ទៃ បានផ្តល់អាទិភាពខ្ពស់ដល់ការបណ្តុះបណ្តាល ដើម្បីរួមចំណែកកំណែទម្រង់កម្លាំងនគរបាល

ថ្លែងក្នុងពិធីបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី១៧ នៅសាលានគរបាលជាតិភូមិភាគ៤ ខេត្តសៀមរាប ប្រមុខក្រសួងមហាផ្ទៃ អះអាងថា ក្រសួងមហាផ្ទៃ នៅតែបន្តផ្ដល់អាទិភាពខ្ពស់ដល់ការអប់រំបណ្ដុះបណ្ដាលដល់កងកម្លាំងនតរបាលជាតិ ដែលជាការរួមចំណែកដល់ពង្រឹងសមត្ថភាព និងកំណែទម្រង់កងកម្លាំងនគរបាលជាតិកម្ពុជា។  

ក្នុងពិធីបិទវគ្គបណ្តុះបណ្តាល ដែលរៀបចំឡើងនាថ្ងៃទី៤ ខែមករា ឆ្នាំ២០២៤ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងដូច្នេះថា «ក្រសួងមហាផ្ទៃ បានយកចិត្តទុកដាក់ និងផ្តល់អាទិភាពខ្ពស់ដល់ការងារអប់រំបណ្តុះបណ្តាល ព្រមទាំងដាក់ចេញនូវផែនការកំណែទម្រង់លើកងកម្លាំងនគរបាលជាតិជាប់ជាប្រចាំ ស្របតាមគោលនយោបាយរបស់រាជរដ្ឋាភិបាល ដោយបានផ្ដោតសំខាន់ទៅលើការធ្វើទំនើបកម្ម និងការពង្រឹងសមត្ថភាពវិជ្ជាជីវៈនៃកងកម្លាំងនគរបាលជាតិ ឱ្យស្របទៅនឹងការវិវត្តនៃស្ថានការណ៍សន្តិសុខជាតិ និងអន្តរជាតិ ព្រមទាំងឆ្លើយតបនឹងតម្រូវការនៃអង្គភាពនគរបាល»។

ក្រោយស្ដាប់ការរាយការណ៍ពីលោកឧត្តមសេនីយ៍ទោ សាយ វិទ្ធីសក្តិ អំពីលទ្ធផលនៃការងារបណ្តុះបណ្តាល និងដំណើរការស្ថាបនាហេដ្ឋារចនាសម្ព័ន្ធនានារបស់សាលានគរបាលជាតិភូមិភាគ៤ រួចមក លោកឧបនាយករដ្ឋមន្ត្រី ស សុខា បានថ្លែងកោតសរសើរចំពោះវឌ្ឍនភាពយ៉ាងឆាប់រហ័សគួរឱ្យកត់សម្គាល់របស់បណ្ឌិត្យសភានគរបាលកម្ពុជា និងសាលានគរបាលជាតិភូមិភាគ៤ ក្នុងយុគសម័យតេជោសន្តិភាព ដែលប្រទេសជាតិកំពុងមានការរីកចម្រើនលើគ្រប់វិស័យ។

លោកឧបនាយករដ្ឋមន្ត្រី បន្តថា តាមរយៈនេះ បានជំរុញដល់ការបំពេញបានតាមតម្រូវការនៃការបណ្តុះបណ្តាល ប្រកប ដោយគុណភាព ក្នុងគោលបំណងពង្រឹងសមត្ថភាពជំនាញ និងលើកកម្ពស់ការគោរពក្រមសីលធម៌វិជ្ជាជីវៈរបស់កងកម្លាំងនគរបាលជាតិឱ្យកាន់តែល្អប្រសើរបន្ថែមទៀត ស្របតាមកម្មវិធីនាយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោកប្រមុខក្រសួងមហាផ្តៃរូបនេះ ក៏បានថ្លែងអំណរគុណដល់សប្បុរសជនទាំងអស់ ដែលបានចូលរួមចំណែកជាមួយក្រសួងមហាផ្ទៃ ក្នុងការអភិវឌ្ឍបណ្ឌិត្យសភានគរបាលកម្ពុជា និងសាលានគរបាលជាតិភូមិភាគ៤នេះ។ ដោយឡែក លោក ក៏បានកោតសរសើរដល់សិស្សនគរបាលជ័យលាភីទាំងអស់ ដែលបានខិតខំសិក្សាទទួលបានជោគជ័យ ព្រមទាំងបានផ្តាំផ្ញើដល់សិស្សនគរបាលជ័យលាភីទាំងអស់ ត្រូវយកចំណេះដឹង និងជំនាញទៅប្រើប្រាស់ឱ្យមានប្រយោជន៍ដល់អង្គភាព និងសង្គមជាតិ៕  

ដោយ៖ គឿន វេត