​សម្ដេច ហ៊ុន ម៉ាណែត ជំរុញឱ្យសិក្សា​ពីតម្រូវការប្រទេស ​ដែលទិញផលិតផល​កសិកម្មកម្ពុជា​

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា នៅលើពិភពលោក ប្រទេសប្រមាណ ២០០ សុទ្ធតែជាប្រទេស​នាំចេញកសិផលដូចគ្នា ដូច្នេះកម្ពុជាត្រូវកំណត់​មុខ​សញ្ញា នៃប្រទេសដែលត្រូវនាំចេញ និងពង្រឹង និងការកំណត់នូវទិសដៅ ផលិតផល​ដែលត្រូវ​នាំ​ចេញ ត្រូវធានាគុណភាពផលិតផលដើម្បី​ទាក់ទាញប្រទេសដែល​កម្ពុជានាំទៅ។

​សម្ដេចមហាបវរធិបតី​ថ្លែងក្នុងឱកាសបិទសន្និបាតបូកសរុបលទ្ធផលការងារឆ្នាំ របស់ក្រសួងកសិកម្ម រុក្ខាប្រមាញ់ និងនេសាទនៅរសៀលថ្ងៃទី ៣០ ខែមករា ឆ្នាំ ២០២៤នេះថា ​រាជរដ្ឋាភិបាល​បានរៀបចំក្រុមការងារមួយដែលជាយុទ្ធ​សាស្ត្រ​សម្រាប់ទំនាក់ទំនងជាមួយបណ្ដាប្រទេសមួយចំនួនដើម្បីបើកច្រកផលិតផលកសិកម្ម។

​សម្ដេចនាយករដ្ឋមន្ត្រីបញ្ជាក់ថា បច្ចុប្បន្នផលិតកម្មកសិកម្ម មិនមែនតែនាំចេញនោះទេ​ គឺកម្ពុជា​បាន​ព្យាយាមភ្ជាប់ទាំងការនាំចេញ និងការវិនិយោគ​។

សម្ដេចនាយករដ្ឋមន្ត្រីបញ្ជាក់ថា៖ «យើងមិនត្រឹមតែខិតខំបើកឱកាស​ ហើយខិតខំផលិតខ្លួនឯងទេ ​យើងថែមទាំងទាក់ទាញនូវក្រុមហ៊ុនដែលផលិតនោះយកមកដាក់វិនិយោគនៅទីនេះ ផលិតនៅ​ស្រុក​យើងមានស្ដង់ដារ​ហើយនាំចេញតែម្ដង ចឹងយើងចំណេញ២ ចំណេញទាំងការ​នាំ​ចេញ​ផលិត​ផល ចំណេញទាំងការវិនិយោគបច្ចេកវិទ្យាដែលចូលមក»។

​សម្ដេចបញ្ជាក់ថា បើកម្ពុជាវេចខ្ចប់រួចហើយនាំចេញ ធ្វើឱ្យមានផលចំណេញច្រើនជាងនាំផលិតផល​ឆៅចេញទៅក្រៅ។​

​សម្ដេចនាយករដ្ឋមន្ត្រីបញ្ជាក់ថា នៅពេលខាងមុខ ក្រុមហ៊ុនធំៗ នៅសិង្ហបុរី និងអាមេរិក ជប៉ុន ​គ្រោងមកកម្ពុជា​ដើម្បីសិក្សាលើការវិនិយោគ​លើវិស័យកសិកម្មច្រើន ​បន្ទាប់ពី​ទស្សនកិច្ចរបស់​សម្ដេច​នៅបរទេស​ជាបន្តបន្ទាប់។

​សម្ដេចធិបតីបញ្ជាក់ថា កម្ពុជាត្រូវសិក្សាឱ្យច្បាស់ថា ប្រទេសណា ត្រូវការអ្វី ហើយដាក់ទិស​ដៅ​ជំរុញ​ទៅលើផលិតផលនោះតែម្ដងមិនចាំបាច់មានផលិតផល ១០០ មុខទៅឱ្យគេនោះទេ៕

អត្ថបទ៖ ឡេង ដេត