សមត្ថកិច្ចពង្រឹងហើយសូម្បីពលករ២នាក់បង្កប់ខ្លួនក្នុងខេងផ្លែឈើដឹកមកពីប្រទេសថៃក៏មិនរួចខ្លួនដែរ

តាមរយៈវិធានការដ៏តឹងតែងរបស់សម្តេចតេជោត្រូវបានសមត្ថកិច្ចអនុវត្តន៍ ដោយយកចិត្តទុកដាក់បំផុតក្នុងការរឹតបន្តឹងទប់ស្កាត់ការរីករាលដាលជំងឺកូវីដ១៩ នៅត្រង់ចំណុចច្រកទ្វា អន្តរជាតិដូងស្រុកកំរៀងខេត្តបាត់ដំបង។

កម្លាំងនគរបាលវរសេនាតូចលេខ៨១៩សហការជាមួយកម្លាំងអន្តរាគមន៍កងពល៥៣ នគរបាលអន្តោរប្រវេសន៍រួមជាមួយទាហានរបស់ថៃផងនោះ នៅព្រឹកថ្ងៃទី១៥ខែកុម្ភះឆ្នាំ២០២១នេះបានពិនិត្យឆែកឆេររថយន្តដឹកទំនិញ១គ្រឿងបានប្រទះឃើញពលករចំនួន ២នាក់ម្នាក់ជាជនជាតិខ្មែរ និងម្នាក់ទៀត ជាជនជាតិ វៀតណាមខណ:បន្លំបង្កប់ខ្លួននៅក្នុងខេងផ្លែឈើក្នុងរថយន្ត។

ប្រភពបានឲ្យដឹងដែរថា ពលករទាំង២នាក់ដែលសមត្ថកិច្ចពិនិត្យរកឃើញម្នាក់ជាជនជាតិខ្មែរ និងម្នាក់ទៀតជាជន​ជាតិវៀតណាមខាងលើនេះ មានវ័យប្រហាក់ប្រហែលជាង២០ឆ្នាំ ប៉ុន្តែមិនបានស្គាល់ អត្តសញ្ញាណច្បាស់លាស់នៅឡើយទេ។ប្រភពដដែលបន្តថាក្រៅពីនេះក៏នៅមានជាប់ពាក់ព័ន្ធ ជាមួយ អ្នកបើកបររថយន្តចំនួន២នាក់ផ្សេងទៀតផងដែរដែលបានបើកបររថយន្តដឹក ផ្លែឈើ មិន ស្គាល់ ម៉ាកពណ៌សលាយពណ៌ស្វាយពាក់ស្លាកលេខត្បូងឃ្មុំ៣A-​០៥៤៩។

ក្រោយការពិនិត្យរកឃើញពលករខ្មែរវៀតណាម២នាក់ ខាងលើត្រូវបានអាជ្ញាធរមានសមត្ថកិច្ចនាំខ្លួន ទៅចូលធ្វើ​ចត្តាឡីស័កក្នុងមណ្ឌលចំណែកឯអ្នកបើកបរនិងអ្នកបើកបរអែបម្នាក់ទៀតត្រូវបញ្ជូនទៅកាន់អធិការនគរបាលស្រុកកំរៀងដើម្បីដាក់ទោសតាមផ្លូវច្បាប់៕

សៅ សារិទ្ធ