៨ថ្ងៃ បទល្មើសគ្រឿងញៀន១៥០ករណី ត្រូវបានសមត្ថកិច្ចបង្ក្រាប ដោយរឹបអូសគ្រឿងញៀនជាង២០គីឡូក្រាម

លោក ទូច សុខៈ អ្នកនាំពាក្យរងក្រសួងមហាផ្ទៃ បានឱ្យដឹងថា គិតចាប់ពីថ្ងៃទី២៩ ខែមករា ដល់ថ្ងៃទី៥ ខែកម្ភៈ ឆ្នាំ ២០២៤ សមត្ថកិច្ចជំនាញ បានបង្រ្កាបបទល្មើសគ្រឿងញៀនចំនួន១៥០ករណី និងឃាត់ខ្លួនជនសង្ស័យទាំងប្រើប្រាស់ និងចែកចាយចំនួន៣៥៥នាក់ នៅទូទាំងប្រទេស ដើម្បីចាត់ការតាមនីតិវិធី។

លោក ទូច​ សុខៈ បញ្ជាក់ថា ក្នុងចំណោមចំនួនបង្ក្រាបខាងលើ មានករណីទ្រង់ទ្រាយធំចំនួន២ករណី គឺខេត្តសៀមរាប បង្ក្រាបនៅថ្ងៃទី១ ខែកុម្ភៈ ឆ្នាំ២០២៤ ឃាត់ខ្លួនមនុស្ស ៤នាក់ ចាប់យកគ្រឿងញៀនជាង១០គីឡូក្រាម និងនៅរាជធានីភ្នំពេញ បង្ក្រាបនៅថ្ងៃទី២ ខែកុម្ភៈ ឆ្នាំ២០២៤ ឃាត់ខ្លួនមនុស្ស៤នាក់ (ជនជាតិវៀតណាម១នាក់) ចាប់យកគ្រឿងញៀនជាង១០គីឡូក្រាម និងម៉ូតូ៣គ្រឿង។

អ្នកនាំពាក្យរងរូបនេះ សង្កត់ធ្ងន់ថា ជាបទបញ្ជារបស់លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ គឺបង្កើនការបង្ក្រាប បង្ក្រាបឱ្យញឹក ឱ្យចំគោលដៅ ពិសេសតំបន់ក្ដៅ។ ទន្ទឹមនេះ បង្កើនការរឹតបណ្ដឹងតាមច្រកព្រំដែនទាំងគោក ទឹក និងអាកាស។ ក្រៅពីនេះ បង្កើតក្រុមត្រួតពិនិត្យធ្វើជារបាំងកាត់ផ្ដាច់ផ្លូវដែលក្រុមជនល្មើសឆ្លងកាត់ ខណៈក្រសួងមហាផ្ទៃ ក៏កំពុងសិក្សាហ្វឹកហ្វឺនសុនខហិតគ្រឿងញៀនផងដែរ។

លោក ទូច សុខៈ អ្នកនាំពាក្យរងក្រសួងមហាផ្ទៃ បានរំលឹកថា បញ្ហាគ្រឿងញៀន ជាចំណុចរសើបមួយ ដែលសម្ដេចធិបតី ប្រមុខរាជរដ្ឋាភិបាល បានដាក់ចេញជាទិសដៅអាទិភាព ហើយក្រសួងមហាផ្ទៃ ដែលដឹកនាំដោយលោក ស  សុខា បានកំណត់យកជាអាទិភាពទី១ ក្នុងចំណោមទិសដៅអាទិភាពទាំង៦របស់ក្រសួងមហាផ្ទៃក្នុងអាណត្តិទី៧នេះ៕