សមត្ថកិច្ចខេត្តមណ្ឌលគិរី ឃាត់ជនសង្ស័យ១៥១នាក់ ពាក់ព័ន្ធគ្រឿងញៀន ក្នុងឆ្នាំ២០២៥

ក្នុងរយៈពេលមួយឆ្នាំពេញ ឆ្នាំ២០២៥ ស្នងការដ្ឋាននគរបាលខេត្តមណ្ឌលគិរី បានបង្ក្រាបករណីជួញដូរ និងប្រើប្រាស់គ្រឿងញៀនខុសច្បាប់សរុបចំនួន ៧៤ ករណី ក្នុងនោះឃាត់ខ្លួនជនសង្ស័យប្រុសស្រីចំនួន ១៥១ នាក់ (ស្រី ០៦ នាក់) ព្រមទាំងរឹបអូសវត្ថុតាងជាច្រើន។

លោក សៅ សាវ៉ាត ស្នងការរងនគរបាលខេត្តមណ្ឌលគិរី និងជាអ្នកនាំពាក្យ បានប្រាប់សារព័ត៌មាន «កម្ពុជាថ្មី» ថា ក្នុងឆ្នាំ២០២៥នេះ ជំនាញការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត បានសហការជាមួយអធិការដ្ឋាននគរបាលក្រុងទាំង ៥ ក្នុងការបង្ក្រាបករណីជួញដូរ និងប្រើប្រាស់គ្រឿងញៀន បានចំនួន ៧៤ ករណី ក្នុងចំណោម ៨៤ ករណីដែលបានស៊ើបអង្កេត។ បើប្រៀបធៀបនឹងឆ្នាំ២០២៤ ចំនួនករណីនៅឆ្នាំ២០២៥នេះ មានការថយចុះចំនួន ៨ ករណី ស្មើនឹងប្រមាណ ០,១២ %។

ក្នុងនោះ ករណីជួញដូរមានចំនួន៣៤ករណីឃាត់ខ្លួនមនុស្ស៧០នាក់ ស្រី៣នាក់ ករណីប្រើប្រាស់ចំនួន២៧ ករណីឃាត់ខ្លួនមនុស្ស ៦៦នាក់ ស្រី៣នាក់ ករណីសម្រួលឱ្យប្រើប្រាស់ចំនួន១ករណី ឃាត់ខ្លួនមនុស្ស១នាក់ ករណីរក្សាទុកចំនួន១១ករណី ឃាត់ខ្លួនមនុស្ស១៣នាក់ និងករណីបើកបរក្រោមឥទ្ធិពលគ្រឿងញៀន១ករណី មនុស្ស១នាក់។ ក្នុងប្រតិបត្តិការបង្រ្កាបរណីខាងលើនេះ ជំនាញបានរឹបអូសវត្ថុតាងជាច្រើនរួមមាន គ្រឿងញៀនប្រភេទមេតំហ្វេតាមីន(ICE) ប្រភេទកេតាមីន(K) ប្រភេទអេចស្តាស៊ី(Exstacy) និងវត្ថុតាងដែលបម្រើជាមធ្យោយដល់ការជួញដូរ។

ក្រោយការឃាត់ខ្លួន ម​ន្រ្តីជំនាញបានកសាងសំណុំរឿងបញ្ជូនជនសង្ស័យរួមទាំងវត្ថុតាងទៅសាលាដំបូងខេត្តដើម្បីចាត់កាតាមនីតិវិធីច្បាប់។

បើតាមលោកអ្នកនាំពាក្យ ការបង្ក្រាបគ្រឿងញៀនដូចភ្លៀងរលឹមនេះ ដោយមានការយកចិត្តទុកដាក់ចង្អុលបង្ហាញពីលោក ឡោ សុខា ស្នងការនគបាលខេត្តមណ្ឌលគិរី ដែលបានបញ្ជាឱ្យជំនាញការិយាល័យគ្រឿងញៀននៃស្នងការដ្ឋាននគបាលខេត្ត អនុវត្តស្រាវជ្រាវរកករណីជួញដូរ ប្រើប្រាស់ ដើម្បីយកមកអនុវត្តតាមផ្លូវច្បាប់។ ជាមួយគ្នានេះលោក ឡោ សុខា បន្តអំពាវនាវទៅដល់ប្រជាពលរដ្ឋ ជាពិសេសយុវជន ចៀសឱ្យឆ្ងាយពីគ្រឿងញៀន ហើយត្រូវឆ្លើយថាទេចំពោះគ្រឿងញៀន ព្រោះការប៉ះពាល់សារធាតុទាំងអស់នេះមិនមានលលទ្ធផលល្អនោះទេ វាអាចប៉ះពាល់ទៅដល់សុខភាពធ្ងន់ធ្ងរ បំផ្លាញអនាគតខ្លួនឯង ថែមទាំងជះឥទ្ធិពលធ្ងន់ធ្ងរទៅដល់សង្គមជាតិ៕

អត្ថបទ៖ រៀម សុខហេង