ព័ត៌មានជាតិ

គោលដៅលំហែបៃតង ផ្លាស់ប្តូរសហគមន៍ជាសហគ្រិន លើកសម្រស់ជួយអភិវឌ្ឍមូលដ្ឋាន

បានផុស

២ years មុន

នៅ

ថ្ងៃពុធ ១៤ កុម្ភៈ ២០២៤

ដោយ

គម្រោងគោលដៅលំហែបៃតង នឹងធ្វើឱ្យប្រជាសហគមន៍ប្រែក្លាយជាសហគ្រិនភាព និងមានសម្រស់ស្អាតប្លែក ពីតំបន់មួយទៅតំបន់មួយទៀត។ នេះគឺជាការគូសបញ្ជាក់របស់លោក អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងជំនួបពិភាក្សាការងារជាមួយប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) នៅទីស្តីការក្រសួងបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រី អ៊ាង សុផល្លែត បានលើកឡើងថា គម្រោងគោលដៅលំហែបៃតងនឹងធ្វើឱ្យប្រជាសហគមន៍ប្រែក្លាយទៅជាសហគ្រិនភាព ដែលអាចទទួលបានប្រាក់ចំណូលជាប្រចាំពីការផ្តល់សេវាកម្មនៅតាមមូលដ្ឋាននីមួយៗ។ ក្នុងនោះរួមមានសេវាកម្ម ទេសចរណ៍ធម្មជាតិ កន្លែងស្នាក់នៅ សេវាកម្មដឹកជញ្ជូនក្នុងតំបន់ ការលក់ដូរផលិតផលក្នុងស្រុក ជូនភ្ញៀវទេសចរ ដើម្បីឱ្យប្រជាសហគមន៍មានភាពជាម្ចាស់ និងឯករាជ្យភាព ដែលនេះគឺជាការអភិវឌ្ឍ ដោយមានការចូលរួមពីប្រជាសហគមន៍ និង មានភាពសុខដុមរមនានៅក្នុងសហគមន៍។

តាមរយៈការគិតគូរលើកកម្ពស់ជីវភាពសហគមន៍ និងផ្ដល់ផលប្រយោជន៍ជូនសហគមន៍មូលដ្ឋាន ស្របតាមគោលការណ៍រួមស្តីពីការគ្រប់គ្រង និងអភិវឌ្ឍក្នុងតំបន់ការពារធម្មជាតិ ដែលបានបំបែកចេញពីយុទ្ធសាស្ត្រចក្រាវិស័យបរិស្ថាន ឆ្នាំ២០២៣-២០២៨។

ការបណ្ដុះស្មារតីឱ្យប្រជាសហគមន៍ មូលដ្ឋានក្លាយជាសហគ្រិនភាព ហើយគំនិតច្នៃប្រឌិតថ្មីៗរបស់សហគមន៍ ដែលកើតចេញពីសហគ្រិនភាពនេះ នឹងជួយឱ្យសហគមន៍មានសម្រស់ស្អាតប្លែកខុសពីគ្នាពីតំបន់មួយទៅតំបន់មួយទៀត។

លោក អ៊ាង សុផល្លែត មានប្រសាសន៍បន្ថែមដែរថា ភាពស្អាតរបស់ប្រជាសហគមន៍ដែលកើតចេញពីភាពស្អាត ភាពបៃតង និងចីរភាព ជាការងារអាទិភាពចម្បងរបស់ក្រសួងបរិស្ថាន ក្នុងបេសកកម្មធ្វើឱ្យកម្ពុជាមានភាពស្អាត គឺស្អាតពីខាងក្រៅដែលនៅជុំវិញខ្លួនយើង គឺស្អាតដី ស្អាតទឹក និងស្អាតខ្យល់។ ស្របជាមួយគ្នានេះ ការកែប្រែផ្នត់គំនិតស្អាត ក៏ជាកត្តាលីករ ជួយឱ្យភាពស្អាត បានឋិតថេរចីរកាលយូរអង្វែងដែរ។ ចំណែកភាពស្អាតពីខាងក្នុងវិញរួមមាន ភាពស្អាតកើតចេញពីចិត្តទៀងត្រង់របស់ប្រជាសហគមន៍ខ្មែរដូចជា ការលក់ដូរផលិតផល កសិផលជូនអ្នកទេសចរមិនកាប់ថ្លៃ មានតម្លៃស្តង់ដារត្រឹមត្រូវ ទោះបីស្ថិតនៅក្នុងរដូវកាល បុណ្យទានក្តី ហើយនិងមានការគិតគូរ ដល់សុខភាពអ្នកប្រើប្រាស់ផងដែរ៕

Related Topics:លោក អ៊ាង សុផល្លែត