ព័ត៌មានជាតិ
ថ្ងៃទី២០-២១ ខែកុម្ភៈខាងមុខ ក្រុមការងារវ៉ាក់សាំងក្រសួងការពារជាតិ នឹងទៅចាក់ជូនថ្នាក់ដឹកនាំកងទ័ពនៅខេត្តកោះកុង
នៅចុងសប្តាហ៍នេះ ក្រុមការងារចាក់វ៉ាក់សាំងបង្ការកូវីដ-១៩ ក្រសួងការពារជាតិ នឹងបន្តចាក់វ៉ាក់សាំងជូនមន្ត្រីយោធាជាន់ខ្ពស់ ថ្នាក់ដឹកនាំ នាយទាហាន និងពលទាហាន នៅក្នុងកងយោធពលខេមរភូមិន្ទ ដែលកំពុងឈរជើងបំពេញភារកិច្ចនៅខេត្តកោះកុង ហើយរដ្ឋមន្ត្រីក្រសួងការពារជាតិ នឹងចុះទៅពិនិត្យសកម្មភាពនោះ នេះបើតាមការបញ្ជាក់ពីអ្នកនាំពាក្យ។
លោកឧត្តមសេនីយ៍ អ៊ុន សុវណ្ណ អ្នកនាំពាក្យក្រសួងការពារជាតិបានថ្លែងប្រាប់កម្ពុជាថ្មី នៅរសៀលថ្ងៃទី១៧ ខែកុម្ភៈ ឆ្នាំ២០២១នេះថា ថ្ងៃទី២០ និង២១ ខែកុម្ភៈ ឆ្នាំ២០២១ ខាងមុខនេះ ក្រុមការងារចាក់វ៉ាក់សាំងបង្ការកូវីដ-១៩ របស់ក្រសួងការពារជាតិ នឹងបន្តចាក់វ៉ាក់សាំងជូនថ្នាក់ដឹកនាំ នាយទាហាន និងពលទាហាន នៅក្នុងកងយោធពលខេមរភូមិន្ទ ដែលកំពុងឈរជើងបំពេញភារកិច្ច នៅខេត្តកោះកុង ហើយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងចុះពិនិត្យមើលសកម្មភាពចាក់វ៉ាក់សាំងនោះ។
សូមបញ្ជាក់ថា វ៉ាក់សាំងបង្ការជំងឺកូវីដ-១៩ ចំនួន៦០ម៉ឺនដូស ដែលជាជំនួយរបស់ចិន បានមកកម្ពុជា តាមជើងយន្តហោះយោធា Y-20 កាលពីវេលាម៉ោងម៉ោងប្រមាណជាង៤ រសៀលថ្ងៃទី៧ ខែកុម្ភៈ ហើយសម្ដេចតេជោ ហ៊ុន សែន បានអញ្ជើញទទួលនៅព្រលានយន្តហោះអន្តរជាតិភ្នំពេញ។
សម្តេចតេជោ ហ៊ុន សែន បានចាត់ទុកជំនួយវ៉ាក់សាំងរបស់ចិននេះថា ជាសក្ខីភាពថ្មីដ៏សំខាន់មួយទៀត ដែលឆ្លុះបញ្ចាំងពីចំណងមិត្តភាពដែកថែប និងកិច្ចសហប្រតិបត្តិការដ៏រឹងមាំរវាងប្រទេស និងប្រជាជនទាំង២ (កម្ពុជា-ចិន) នៅក្នុងក្របខ័ណ្ឌនៃទំនាក់ទំនងកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ និងការកសាងសហគមន៍វាសនារួមគ្នា ហើយថា ការទទួលបានវ៉ាក់សាំងពីប្រទេសចិន ដោយសារតែយើងមានកិច្ចសហប្រតិបត្តិការល្អ បើគ្មានកិច្ចសហប្រតិបត្តិការល្អទេ យើងនឹងពុំទទួលបានវ៉ាក់សាំង សម្រាប់ប្រជាជនយើងនៅថ្ងៃនេះទេ។
នៅថ្ងៃទី១០ ខែកុម្ភៈ កម្ពុជាបានចាប់ផ្តើមយុទ្ធនាការចាក់វ៉ាក់សាំង SARS Cov-2 “Sinopharm” ដែលជាជំនួយរបស់ចិន ជូនថ្នាក់ដឹកនាំក្រសួង ស្ថាប័ន មួយចំនួន ដែលត្រូវបានចាត់ទុកថា ជាអ្នកមានហានិភ័យខ្ពស់ ហើយកម្មវិធីចាក់វ៉ាក់សាំងនេះ ត្រូវបានចែកជា៤ ទីតាំងផ្សេងគ្នា រួមមាន៖ ទី១, នៅមន្ទីរពេទ្យកាល់ម៉ែត ទី២, មន្ទីរពេទ្យព្រះអង្គឌួង ទី៣, មន្ទីរពេទ្យមិត្តភាពខ្មែរ-សូវៀត និងទី៤, មន្ទីរពេទ្យកុមារជាតិ។ ចំណែកថ្នាក់ដឹកនាំស្ថាប័នចំណុះក្រសួងការពារជាតិ និងអគ្គបញ្ជាការដ្ឋាន នៃកងយោធពលខេមរភូមិន្ទ ត្រូវចាក់វ៉ាក់សាំងនៅមន្ទីរពេទ្យកេតុមាលា ហើយការអនុវត្តការចាក់វ៉ាក់សាំងនេះ ធ្វើឡើងតាមគោលការស្ម័គ្រចិត្ត។
បើតាមលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានឲ្យដឹងថា យុទ្ធនាការចាក់វ៉ាក់សាំងបង្ការកូវីដ-១៩ ចាប់ពីថ្ងៃទី១០ រហូតដល់ថ្ងៃទី១៦ ខែកុម្ភៈ មានអ្នកបានចាក់វ៉ាក់សាំងរួចចំនួន២៦១១នាក់ (ស្រី៨៥៥នាក់) និងមានអ្នកដែលត្រូវគ្រូពេទ្យមិនអនុញ្ញាតចំនួន៦០៨ នាក់ (ស្រី៣៣៣ នាក់)៕
ដោយ ៖ កោះកែវ
-
ព័ត៌មានជាតិ២ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានអន្ដរជាតិ៥ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៨ ម៉ោង ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
កីឡា៦ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៥ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សន្តិសុខសង្គម២ ថ្ងៃ ago
សមត្ថកិច្ចស្រុកស្វាយលើ ឃាត់ខ្លួនប្តីប្រពន្ធ ១គូសង្ស័យរួមគំនិតសម្លាប់កូនខ្លួនឯង អាយុទើបតែ ២២ខែ
-
សន្តិសុខសង្គម១៥ ម៉ោង ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល
-
សន្តិសុខសង្គម១ សប្តាហ៍ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)