នាយករដ្ឋមន្ត្រី ថា មិនទុកពលរដ្ឋណាម្នាក់ចោល ដោយមិនទទួលបានសេវាថែទាំសុខភាពឡើយ

រាជរដ្ឋាភិបាលកម្ពុជា នីតិកាលទី៧នេះ មិនទុកពលរដ្ឋណាម្នាក់ចោល ដោយមិនទទួលបានសេវាថែទាំសុខភាពនោះឡើយ។ នេះជាការថ្លែងគូសបញ្ជាក់ដោយសម្ដេចធិបតីនាយករដ្ឋមន្រ្តីនៃកម្ពុជា នារសៀលថ្ងៃអង្គារនេះ។

ថ្លែងក្នុងពិធីបិទសន្និបាតសុខាភិបាល លើកទី៤៣ នៅរសៀលថ្ងៃទី១៩ ខែមីនា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ដូច្នេះថា៖​ «កម្ពុជា មានការចាំបាច់ក្នុងការពន្លឿនវឌ្ឍនភាពឆ្ពោះទៅគោលដៅអភិវឌ្ឍន៍ដោយចីរភាពទី៣ សុខភាព និងសុខុមាលភាពមាំមួន ដើម្បីធានាលំនឹងចីរភាពរបស់ប្រជាជនប្រកបដោយសុខភាពល្អ និងលើកកម្ពស់សុខុមាលភាពប្រជាជនគ្រប់រូប និងគ្រប់វិស័យ ដើម្បីរាប់បញ្ចូល ដោយការគ្រប់ដណ្ដប់សុខភាពជាសកល ស្របតាមការប្ដេជ្ញាចិត្តខ្ពស់របស់រាជរដ្ឋាភិបាល ដោយមិនទុកឱ្យប្រជាជនណាម្នាក់ ត្រូវបានទុកចោល ដោយមិនបានទទួលសេវាថែទាំសុខភាពនោះឡើយ»។

សម្ដេចធិបតីនាយករដ្ឋមន្រ្តី បានថ្លែងបន្តថា រាជរដ្ឋាភិបាល អាណត្តិទី៧នេះ គឺផ្ដោតលើការពង្រឹងវិស័យសុខាភិបាល ដោយផ្អែកលើមូលដ្ឋានសំខាន់ៗមួយចំនួន ដោយយកបទពិសោធនកន្លងទៅ ជាមូលដ្ឋានសម្រាប់យកជាចំណុចគិតគូក្នុងការដាក់ចេញលើវិធានការគន្លឹះក្នុងការពង្រឹងវិស័យសុខាភិបាល ដំណាក់កាលទី១ នៃយុទ្ធសាស្ត្របញ្ចកោណ៕