សម្ដេច ហ៊ុន ម៉ាណែត ប្រកាសមិនឱ្យអានុភាពណាមួយមកបំផ្លាញបានឡើយនូវសុខសន្តិភាព

ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានប្រកាសយ៉ាងម៉ឺងម៉ាត់មិនអនុញ្ញាតឱ្យអានុភាពណាមួយ មកបំផ្លាញបានឡើយនូវសុខសន្តិភាពនៅកម្ពុជា ដែលរកបានយ៉ាងលំបាក ទោះក្នុងតម្លៃណាក៏ដោយ។

សម្ដេចធិបតី មានប្រសាសន៍ថា សន្តិភាពមានតម្លៃជាទីបំផុត ការបំផ្លាញសន្តិភាពមិនពិបាកទេ តែការបង្កើតសន្តិភាព គឺពិបាកណាស់ ពុំនោះសោត រាប់តំណរមនុស្សក៏មិនអាចបង្កើតសន្តិភាពបានដែរ។ អាស្រ័យហេតុនេះ សម្ដេចធិបតី បានអំពាវនាវឱ្យជនរួមជាតិទាំងអស់ ត្រូវសាមគ្គីគ្នា រួមចិត្តតែមួយ ដើម្បីថែរក្សាសន្តិភាព ដែលបានដោយលំបាកបំផុតឱ្យបានគង់វង្សស្ថិតស្ថេរ ដោយមិនអនុញ្ញាតឱ្យអានុភាពណាបំផ្លាញបានឡើយ ទោះក្នុងតម្លៃណាក៏ដោយ។

សម្ដេចធិបតីនាយករដ្ឋមន្ត្រី បានគូសរំលេចនូវការអនុវត្តនយោបាយឈ្នះ ឈ្នះ ដែលសម្ដេចតេជោ ហ៊ុន សែន បានដាក់ចេញ និងដឹកនាំដោយផ្ទាល់ បានចាប់ផ្ដើមចាកចេញនៅថ្ងៃទី២០ មិថុនា ឆ្នាំ១៩៧៧ រហូតមកដល់ការអនុវត្តនយោបាយឈ្នះ ឈ្នះ និងការបញ្ចប់សង្គ្រាមទាំងស្រុង នាចុងឆ្នាំ១៩៩៨ ដែលបន្តដឹកនាំប្រទេសមកដល់បច្ចុប្បន្ននេះ ធ្វើឱ្យប្រទេសជាតិមានការអភិវឌ្ឍរីកចម្រើនលើគ្រប់វិស័យ ក្រោមម្លប់នៃសុខសន្តិភាព។

ការលើឡើងខាងលើរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងពិធីរម្លឹកខួបអនុស្សាវរីយ៍លើកទី៤៧ ទិវានៃការចងចាំដំណើរឆ្ពោះទៅការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២៤) នៅតំបន់ប្រវត្តិសាស្រ្តយោធាតេជោកោះថ្ម (X16) នាព្រឹកថ្ងៃទី២០ ខែមិថុនានេះ៕