ព័ត៌មានជាតិ

ឯកឧត្ដម ហ៊ុន ម៉ានី ៖ ការអនុញ្ញាតឲ្យរាយការណ៍ជាប្រចាំឆ្លុះបញ្ចាំងពីការយកចិត្តទុកដាក់ខ្ពស់របស់ សម្ដេចធិបតី លើការងារកំណែទម្រង់រដ្ឋបាលសាធារណៈ

បានផុស

១ year មុន

នៅ

ថ្ងៃសៅរ៍ ២៣ មីនា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ លើកឡើងថា ការអនុញ្ញាតឲ្យរាយការណ៍ជាប្រចាំ បានឆ្លុះបញ្ចាំងយ៉ាងច្បាស់ពីការយកចិត្តទុកដាក់ខ្ពស់របស់ សម្ដេចមហាបវរធិបតី ហ៊ុន ម៉ាណែត លើការងារកែទម្រង់ ព្រមទាំងការផ្ដល់សេចក្ដីទុកចិត្តជូនដល់ថ្នាក់ដឹកនាំ និងមន្ត្រីរាជការ នៃក្រសួងមុខងារសាធារណៈ ជាពិសេសកំណែទម្រង់រដ្ឋបាលសាធារណៈ ដែលជាអាទិភាពមួយរបស់រាជរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បន្ទាប់ពី សម្ដេចមហាបវរធិបតី ហ៊ុន ម៉ាណែត អនុញ្ញាតឲ្យ ឯកឧត្ដម ហ៊ុន ម៉ានី និងសហការី នៃក្រសួងមុខងារសាធារណៈ បានចូលជួបរាយការណ៍អំពីវឌ្ឍនភាពការងារក្នុងក្របខណ្ឌលេខាធិការដ្ឋាន នៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ (គ.វ.រ) កាលពីព្រឹកថ្ងៃទី ២៣ ខែមីនា ឆ្នាំ ២០២៤ នេះ។

នាឱកាសនោះ ឯកឧត្ដម ហ៊ុន ម៉ានី បានមានប្រសាសន៍ថា ដោយមានការអនុញ្ញាតពី សម្ដេចមហាបវរធិបតី ហ៊ុន ម៉ាណែត ឯកឧត្ដម និងសហការី នៃក្រសួងមុខងារសាធារណៈ បានចូលរាយការណ៍អំពីវឌ្ឍនភាពការងារក្នុងក្របខណ្ឌលេខាធិការដ្ឋាន នៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ (គ.វ.រ) នាព្រឹកថ្ងៃទី ២៣ ខែមីនា ឆ្នាំ ២០២៤។

ជាមួយគ្នានោះ ឯកឧត្ដម ហ៊ុន ម៉ានី លើកឡើងថា «ការអនុញ្ញាតឲ្យរាយការណ៍ជាប្រចាំ បានឆ្លុះបញ្ចាំងយ៉ាងច្បាស់ពីការយកចិត្តទុកដាក់ខ្ពស់របស់ សម្ដេចធិបតី លើការងារកែទម្រង់ ព្រមទាំងការផ្ដល់សេចក្ដីទុកចិត្តជូនដល់ថ្នាក់ដឹកនាំ និងមន្ត្រីរាជការ នៃក្រសួងមុខងារសាធារណៈ ក្នុងការអនុវត្តការងារក្នុងនាមជាសេនាធិការ ដើម្បីសម្រេចលទ្ធផលឆ្លើយតបទៅនឹងចក្ខុវិស័យរបស់ សម្ដេចធិបតី និងយុទ្ធសាស្ត្របញ្ចកោណដំណាក់កាលទី ១ ជាពិសេសកំណែទម្រង់រដ្ឋបាលសាធារណៈ ដែលជាអាទិភាពមួយរបស់រាជរដ្ឋាភិបាល»។

ឯកឧត្ដមឧបនាយករដ្ឋមន្ត្រី លើកឡើងបន្ថែមថា ថ្នាក់ដឹកនាំ និងមន្ត្រីរាជការគ្រប់ជាន់ថ្នាក់ នៃក្រសួងមុខងារសាធារណៈ ពិតជាមានមោទនភាពបំផុតក្នុងការបំពេញបេសកកម្ម និងភារកិច្ចដ៏មានសារៈសំខាន់មួយនេះ ដើម្បីដឹកនាំកំណែទម្រង់ដែលនឹងធានាដល់ប្រព័ន្ធរដ្ឋបាលសាធារណៈមួយកាន់តែរឹងមាំជូនប្រទេសជាតិ និងប្រជាជន៕

អត្ថបទ ៖ ពិសី