ព្រះមហាក្សត្រ មានព្រះរាជបន្ទូលដល់សមាជិកព្រឹទ្ធសភាខិតខំបំពេញការងារ ប្រកាន់ខ្ជាប់វិន័យ និងក្រមសីលធម៌

ព្រះរាជសុន្ទរកថាបើកសម័យប្រជុំលើកដំបូងរបស់ព្រឹទ្ធសភា នីតិកាលទី៥ នៅព្រឹកថ្ងៃទី០៣ ខែមេសា ឆ្នាំ២០២៤នេះ ព្រះមហាក្សត្រនៃកម្ពុជា មានព្រះរាជបន្ទូលដល់សមាជិក-សមាជិកាព្រឹទ្ធសភា ខិតខំបំពេញការងារ ប្រកាន់ខ្ជាប់វិន័យ និងក្រមសីលធម៌របស់ព្រឹទ្ធសភា ពិសេសគោរពរដ្ឋធម្មនុញ្ញឱ្យបានខ្ជាប់ខ្ជួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា មានព្រះរាជបន្ទូលថា នាឆ្នាំ២០២៣ កន្លងទៅនេះ រដ្ឋសភា នីតិកាលទី៧ បានបើកនីតិកាលថ្មី និងកំពុងបន្តការងាររបស់ខ្លួន ដោយស្មារតីទទួលខុសត្រូវខ្ពស់ ព្រមគ្នាជាមួយនឹងរាជរដ្ឋាភិបាលបន្តវេនថ្មី ដែលបាននិងកំពុងដំណើរការក្នុងជំហានដ៏ស្វាហាប់ ឆន្ទៈមោះមុតពិតប្រាកដ និងស្មារតីទទួលខុសត្រូវខ្ពស់ក្នុងការបម្រើប្រទេសជាតិ និងប្រជារាស្ត្រ។

ព្រះមហាក្សត្រ បានបន្តមានព្រះបន្ទូលទៀតថា ខ្មែរ គឺជាប្រជាជាតិមួយដែលមានអរិយធម៌ដ៏ថ្លៃថ្លា ថ្កុំថ្កើងរុងរឿង ហើយលទ្ធិប្រជាធិបតេយ្យ សេរីពហុបក្សរបស់យើងត្រូវបានអនុវត្តប្រកបដោយវិចារណញ្ញាណ ក្នុងស្មារតីបង្រួបបង្រួមផ្សះផ្សាជាតិ និងបម្រើនូវឧត្តមប្រយោជន៍ជាតិពិតប្រាកដ។ ក្នុងន័យនេះ ព្រះមហាក្សត្រ មានព្រះបន្ទូលឱ្យថែរក្សាការពារសន្តិភាព និងស្ថិរភាពជាលក្ខខណ្ឌសកល និងជាបរិយាកាសចម្បងដែលមិនអាចខ្វះបានសម្រាប់ធានាដល់ដំណើរជីវិតជាប្រក្រតី និងការរីកចម្រើនជឿនលឿនរបស់ប្រទេសជាតិលើគ្រប់វិស័យ រួមទាំងការផ្តល់ឱកាសដល់ការកែលម្អ ឬកែទម្រង់រចនាសម្ព័ន្ធ និងអភិបាលកិច្ចឱ្យកាន់តែប្រសើរឡើងថែមទៀត ដើម្បីជាប្រយោជន៍ដល់ការអភិវឌ្ឍសង្គម និងសេដ្ឋកិច្ច ប្រកបដោយភាពធន់រឹងមាំយូរអង្វែង ។

ក្នុងស្មារតីនេះ ព្រះករុណា ព្រះមហាក្សត្រនៃកម្ពុជា មានព្រះរាជសុន្ទរកថាដូច្នេះថា៖ «សូមសម្តេច ព្រះអង្គម្ចាស់ ឯកឧត្តម លោកជំទាវ សមាជិក សមាជិកាព្រឹទ្ធសភា ខិតខំបំពេញការងារ ប្រកាន់ខ្ជាប់នូវវិន័យ និងក្រមសីលធម៌របស់ព្រឹទ្ធសភា គោរពរដ្ឋធម្មនុញ្ញ ច្បាប់ និងបទបញ្ជាផ្ទៃក្នុងឱ្យបានខ្ជាប់ខ្ជួន ព្រមទាំងមានគណនេយ្យភាព និងការទទួលខុសត្រូវខ្ពស់ក្នុងការសម្រេចនូវមុខងារភារកិច្ចរបស់ខ្លួន ដើម្បីផ្តល់ទំនុកចិត្ត និងភាពកក់ក្តៅដល់ប្រជារាស្ត្រយើង»។

ជាមួយគ្នានេះដែរ ព្រះមហាក្សត្រកម្ពុជា ក៏បានប្រសិទ្ធពរឱ្យព្រឹទ្ធសភា នីតិកាលទី៥ ដំណើរការកាន់តែល្អប្រសើរ មានតម្លាភាព និងគណនេយ្យភាពក្នុងការអនុវត្តតួនាទីភារកិច្ចរបស់ខ្លួនឱ្យបានស័ក្តិសម ប្រកបដោយភាពខ្ពង់ខ្ពស់ ដើម្បីទទួលបានជោគជ័យថ្មីៗថែមទៀតក្នុងបេសកកម្មរបស់ខ្លួន ជាប្រយោជន៍ជូនជាតិមាតុភូមិ និងប្រជារាស្ត្រទាំងមូល៕