សម្ដេច ហ៊ុន ម៉ាណែត៖ ​រដ្ឋាភិបាលមិនដេកចាំមើល ការលំបាករបស់ប្រជាពលរដ្ឋ​ ដែលកំពុងជួប​បញ្ហា​ជាមួយម្ចាស់បុរី​នោះទេ

សម្ដេចធិបតី ហ៊ុន ម៉ាណែត ​នាយករដ្ឋមន្ត្រីកម្ពុជា ​មានប្រសាសន៍ថា ​រដ្ឋាភិបាល​មិនបានដេក​ចាំមើល​​ការលំបាករបស់ប្រជាជននោះទេ ​ក្រសួងរៀបចំដែនដី បាន​ធ្វើការជាប្រចាំ ជាមួយក្រុមហ៊ុន ​បុរី ​និងប្រជាពលរដ្ឋ​ដែលជាអតិថិជន ដើម្បីដោះស្រាយ​បន្តិចម្ដងៗ។​

សម្ដេចនាយករដ្ឋមន្ត្រី​លើកឡើងនៅក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ នៅព្រឹកថ្ងៃទី ១១ ខែមេសា ឆ្នាំ ២០២៤នេះ ថា រូបមន្តដោះស្រាយគឺខុសគ្នា ​បុរីនីមួយៗ រូបមន្ត លទ្ធភាព​ដោះ​ស្រាយខុសគ្នា​ ​ប៉ុន្តែសូមឱ្យបងប្អូនជឿទុកចិត្តចុះ ​រដ្ឋាភិបាល​មិនបានដេកនោះទេ​។

​សម្ដេច ហ៊ុន ម៉ាណែត បន្តថា ​រដ្ឋាភិបាល​មិនងាកចាប់ៗ នោះទេ ត្រូវធ្វើយ៉ាង​ម៉េចគោលដៅ​ធំបំផុត​ គឺដោះស្រាយបញ្ហាជូនអតិថិជន ​ហើយធ្វើ់យ៉ាងម៉េចឱ្យក្រុមហ៊ុន​អភិវឌ្ឍ​បន្តដោះស្រាយ​ជូនអតិថិជនទៀត។

​សម្ដេចបញ្ជាក់ថា រាជរដ្ឋាភិបាលខិតខំជាប្រចាំដើម្បីដោះស្រាយបញ្ហានេះ ​ព្រោះយើងមិនអាច​បំផ្លាញ​សេដ្ឋកិច្ចយើង នៅក្នុងរយៈពេលមួយឆ្នាំនេះទេ​។

សម្ដេចនាយករដ្ឋមន្ត្រី ​បានដាក់គោលការណ៍ដោះស្រាយសម្ពាធមួយចំនួន​ បន្ថយសម្ពាធមួយចំនួន​ ទៅវិស័យធនាគារ ដើម្បីមានលទ្ធភាពអាចជួយ​ទុន លើកទឹកចិត្តដល់វិស័យអចលទ្រព្យ ​កន្លែងដែល​មានបញ្ហាខិតខំដោះស្រាយ​។

សម្ដេច ហ៊ុន ម៉ាណែត បន្តថា៖ «យើងមិនអាចយករូបមន្តសម្លាប់មេមាន់នោះទេ ​យើងត្រូវឱ្យមេមាន់នៅរស់​ដើម្បីយកពងមាន់មកឱ្យបងប្អូនប្រជាពលរដ្ឋ»។

បើតាមសម្ដេចនាយករដ្ឋមន្ត្រី វិស័យអចលទ្រព្យនឹងកើនឡើងវិញ ​ពេលលំបាកនេះ រាជរដ្ឋាភិបាល​ ធ្វើយ៉ាងណារកដំណោះស្រាយ​ឱ្យប្រជាពលរដ្ឋ៕