ការស្ថាបនាច្រាំងជាប់ស្ពានទន្លេសេកុងជាង ៣០០​ម៉ែត្រជិតរួចរាល់ គ្រោងបញ្ចប់តាមផែនការ

អាជ្ញាធរខេត្តស្ទឹងត្រែងបានស្ថាបនាច្រាំងទន្លេជាង ៣០០ម៉ែត្រ សម្រេចបាន ៧០ភាគរយ ទៅ​តាមផែនការ សម្រាប់ទប់ការ​ពារ​កុំឱ្យទឹកទន្លេខែវស្សាហូរច្រោះបាក់ដីតាមជួរមាត់ទន្លេសេកុង ដែលបង្កផលប៉ះពាល់ដល់ថ្នល់ជាតិ និងទៅដល់ផ្ទះសម្បែងរបស់ប្រជាពលរដ្ឋនៅក្នុងក្រុង។        

លោក ថេ សីហា អ្នកទទួលការងារសាងសង់បានបញ្ជាក់ថា ក្រុមការងារអនុវត្តទៅតាមគំរូប្លង់ត្រឹមត្រូវ មានជម្រាលផង និងបើកមុខចេញពីចំណុចច្រាំងចាស់ប្រវែង ១៥ ម៉ែត្របន្ថែមទៀត។ ក្រុមបច្ចេកទេសកំពុងពន្លឿនការសាងសង់​គ្រឹះក្រោមឱ្យហើយមុនរដូវវស្សាចូលមកដល់ ដើម្បីងាយស្រួលសាងសង់ផ្នែកខាងលើបន្តឱ្យហើយទាំងស្រុងនៅចុងឆ្នាំ​២០២៤​នេះ។       

លោក ដែង ភារម្យ ចៅសង្កាត់ស្រះឬស្សី ក្រុងស្ទឹងត្រែង​បាន​ឲ្យ​ដឹងថា កន្លងមកខេត្តសាងសង់ច្រាំងទន្លេបានជាង ៦០០ ម៉ែត្ររួចមកហើយ ចាប់ពីកំពង់​ផែទៅដល់ចំណុចស្ពានព្រះរាជដំណាក់ ដែលមានប្រយោជន៍ការពារច្រាំងទន្លេមិនឱ្យបាក់តទៅទៀត និងការពារបានផ្លូវសម្រាប់ការធ្វើចរាចរណ៍​ទៅមកផង។

លោក សាយ កុសល អភិបាលក្រុងស្ទឹងត្រែងមានប្រសាសន៍ថា សមិទ្ធផលនៅក្រុងស្ទឹងត្រែង ត្រូវបានអាជ្ញាធរខេត្ត​សាងសង់ ចាប់ចេញចំណុចស្ពានសេកុង ទៅដល់ចំណុចស្ពានព្រែកពោធិ៍ ក្នុងសង្កាត់ស្រះឬស្សី ដើម្បីការពារកុំឱ្យដីបាក់ និងសម្រាប់ជាទីកន្លែងកម្សានរបស់ភ្ញៀវទេសចរណ៍ផង។

លោកអភិបាលក្រុងបន្តថា សមិទ្ធផលនេះអាចចាត់បញ្ចូលក្នុងសូចនាករមួយបន្ថែម សម្រាប់ធ្វើការប្រកួតប្រជែងទីក្រុងស្អាតនៅឆ្នាំខាងមុខ ព្រោះធ្ទើឱ្យទីរួមខេត្តមានសោភ័ណភាព និងជួយជាផលប្រយោជន៍ផ្សេងៗបាន ដូចជាផ្តល់លទ្ធភាពងាយស្រួល ដល់ប្រជាអ្នកនេសាទមានកន្លែងចុះចត មានកន្លែងឡើង និងបង្កលក្ខណៈងាយស្រួលដល់ភ្ញៀវទេសចរឱ្យមានទីតាំងលំហែរបានច្រើន។   

លោក ផាន់ វុទ្ធី ភ្ញៀវទេសចរជាតិមកពីខេត្តព្រះវិហារ បានមើលឃើញ​សមិទ្ធផលថ្មីនេះនឹង​ផ្តល់លទ្ធភាពឱ្យបងប្អូនប្រជាពលរដ្ឋនៅក្នុងខេត្តមានកន្លែងលេងកម្សាន្ត ហាត់ប្រាណ និងបានជួយលើកកម្ពស់សោភ័ណភាពក្នុងខេត្ត ឱ្យកាន់តែមានភាពល្អប្រសើរឡើងថែមទៀត។

ខឿនច្រាំងតាមមាត់ទន្លេសេកុងបានចាប់ផ្តើមស្ថាបនាឡើងនៅដើមខែកុម្ភៈឆ្នាំ២០២៣ ហើយគ្រោងបញ្ចប់សកម្មភាពសាងសង់នៅចុងឆ្នាំ២០២៤ ទៅតាមផែនការដែលបានគ្រោងទុក៕

អត្ថបទ៖ ងិន លីម