ព័ត៌មានជាតិ
កន្លែងកម្សាន្តមួយ កែច្នៃដាំស្រូវ ដាំឈូកបង្កើតបរិយាកាសធម្មជាតិ ទាក់ទាញទេសចររាប់រយនាក់ក្នុង ១ ថ្ងៃ
“ស្រែស្រូវកាហ្វេ” ជាឈ្មោះទីតាំងរមណីយដ្ឋានមួយកន្លែងស្ថិតនៅក្បែរក្រុងបាត់ដំបង។ បច្ចុប្បន្នគេសង្កេតឃើញទីតាំងមួយនេះ កំពុងទាក់ទាញភ្ញៀវទេសចរក្នុងស្រុកជិតឆ្ងាយ ដោយសារការកែច្នៃជាមួយបរិយាកាសបែបធម្មជាតិសម្រាប់ទេសចរមកកម្សាន្ត អាចអង្គុយញាំអាហារលេងនៅកណ្តាលវាលស្រែ ស្តាប់សម្លេង កង្កែប ហ៊ីងយំ និងមានសត្វស្លាបហើរខ្វាត់ខ្វែងផង។
ម្ចាស់ទីតាំងនេះត្រូវបានគេស្គាល់ឈ្មោះថា អ្នកស្រី ហេង ចន្ថា បានចាប់ផ្តើមដំណើរការបានជាង ១ ឆ្នាំមកហើយ។
បើតាមម្ចាស់ទីតាំងអ្នកស្រី ហេង ចន្ថា ថ្ងៃធម្មតាភ្ញៀវមកកម្សាន្ត និងមកញាំអាហារ ផឹកកាហ្វេ ក្នុងមួយថ្ងៃ ចន្លោះពី ១០០ នាក់ដល់ ៥០០ នាក់ និងនៅថ្ងៃបុណ្យទានអាចកើនដល់ពាន់នាក់ក្នុងមួយថ្ងៃ ។
អ្នកស្រីថា បច្ចុប្បន្នមានភ្ញៀវជិតឆ្ងាយមកកម្សាន្ត និងញាំកាហ្វេមិនដែលដាច់ទេ។ ការពេញនិយមរបស់ក្រុមយុវជននិងយុវនារីគឺនៅពេលព្រឹកនិងពេលថ្ងៃចាប់ពីម៉ោង ១១ ថ្ងៃដល់ល្ងាច ឬដល់យប់។ ក្រៅពីនេះក៏សម្បូរភ្ញៀវមកញាំអាហារជាលក្ខណះគ្រួសារដោយពួកគេចូលចិត្តអង្គុយញាំអាហារផ្សេងៗ ថតរូបអនុស្សាវរីយ គយគន់វាលស្រែ និងស្រូបយកខ្សល់អាកាសបរិសុទ្ធ ប្រកបដោយទឹកមុខស្រស់ស្រាយ រីករាយគ្រប់ៗគ្នា។
ទោះបីគ្មានបទពិសោធន៍ពីអាជីវកម្មនេះពីមុនអ្នកស្រី ហេង ចន្ថា បានបញ្ជាក់ថា នេះជាលើកទីមួយក្នុងជីវិតដែលអ្នកស្រី និងស្វាមីបានសម្រេចក្តីសុបិននេះទាំងមិនធ្លាប់មានបទពិសោធន៍កន្លងមក ហើយការរៀបចំឌីហ្សាញទីតាំងគឺរៀបចំដោយខ្លួនឯងតាមការស្រមៃប៉ុណ្ណោះ។ ក្នុងនោះទាំងស្ពានដើរនិងតូបអង្គុយញាំអាហារផ្សេងៗនិងលំហែកាយ គឺធ្វើដោយខ្លួនឯងដោយប្រើប្រាស់ឈើចាស់ៗដែលអ្នកស្រីមាននៅសល់យកមកកែច្នៃ។
ទីតាំងកន្លែងកម្សាន្តនេះបានដាំដុះស្រូវ និងផ្កាឈូកដើម្បីទាក់ទាញភ្ញៀវមកលេងកម្សាន្តលើទំហំដី ១០ ហិកតា បង្កើតជារមនីយដ្ឋានតាមបែបធម្មជាតិ។
អ្នកស្រីបន្តថា ការបង្កើតរមណីយដ្ឋាននេះជាចំណែក បានជួយរកការងារនិងប្រាក់ចំណូលដល់អ្នកភូមិកាត់បន្ថយសំណាកស្រុកដោយប្រថុយប្រថាន ដែលបច្ចុប្បន្នហាងអ្នកស្រីបានទាញយកបុគ្គលិកជាង ២០ នាក់ ដែលជាកូនអ្នកស្រុកភូមិ។ ក្នុងនោះអ្នកស្រីក៏បានទទួលទិញដូចជា មាន់ស្រែពីអ្នកភូមិចិញ្ចឹម ត្រី អន្ទង់ កង្កែប កំពិស ក្តាម ខ្សងជាដើម ដែលអ្នកភូមិរកបាននៅតាមបឹងនិង វាលស្រែយកមកលក់ដល់ហាងជារៀងរាល់ថ្ងៃតែម្តង។
ដោយដំណើរការចាប់បើកពី ម៉ោង ៧ ព្រឹក ដល់ម៉ោង១០យប់ ភ្ញៀវដែលមកលេងកម្សាន្តនិងញាំអាហារភាគច្រើនភ្ញៀវមកពីចម្ងាយបានឮតៗគ្នា និងបានដឹងតាមបណ្តាញសង្គមផង។ បើតាមអ្នកស្រី ហេង ចន្ថា នៅថ្ងៃខាងមុខអ្នកស្រីនឹងពង្រីកកញ្ចុះអង្គុយលេង កន្លែងថតរូបនិងកន្លែងកម្សាន្តផ្សេងៗបន្ថែមទៀត។
ហាងស្រែស្រូវកាហ្វេស្ថិតនៅភូមិស្វាយជ្រំ ឃុំជ្រៃ ស្រុកថ្មគោល ខេត្តបាត់ដំបង បើធ្វើដំណើរពីរូបសំណាកលោកតាដំបងក្រញូងមកតាមផ្លូវជាតិលេខ ៥ ចម្ងាយ ៧ គីឡូម៉ែត្រ រួចបត់ឆ្វេង ៧០០ ម៉ែត្រនឹងទៅដល់ទីតាំងនេះ៕
អត្ថបទ៖ សៅ សារិទ្ធ
-
ព័ត៌មានអន្ដរជាតិ៤ ថ្ងៃ ago
Pre-Wedding កូនសេដ្ឋីប្រាក់លានឥណ្ឌា លើទឹកដី អ៊ីតាលី ក្លាយជាពិធីខឹងសម្បារពីប្រជាជន និងអ្នកទេសចរ
-
ព័ត៌មានជាតិ៣ ថ្ងៃ ago
អ្នកជំនាញឡាន ប្រាប់មូលហេតុដែលម្ចាស់ឡានតូចៗ មិនគួរប្រថុយបើកឡានកាត់ទឹក
-
ព័ត៌មានជាតិ៤ ថ្ងៃ ago
មានតម្រុយ គ្រោងសាងសង់ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ
-
ព័ត៌មានជាតិ៥ ថ្ងៃ ago
ពិព័រណ៍យន្តហោះ និងបច្ចេកវិទ្យា រដូវកាលទី៤ នឹងមកដល់ឆាប់ៗនេះ
-
ព័ត៌មានអន្ដរជាតិ៤ ថ្ងៃ ago
យន្តហោះដឹកកីឡាករប្រដាល់ថៃមួយក្រុម ដាច់ម៉ាស៊ីនត្រជាក់ ម្នាក់ៗហប់សឹងដាច់ខ្យល់
-
សន្តិសុខសង្គម៣ ថ្ងៃ ago
ម្ចាស់ហាងមួយនៅឆ្នេរអូរឈើទាលលក់ស្រាបៀរមួយកេស៧២ដុល្លារ អាជ្ញាធរខេត្តឲ្យជំនាញពិនិត្យ
-
ព័ត៌មានជាតិ៥ ថ្ងៃ ago
រៀបចំក្រុងពាលី ត្រៀមបើកការដ្ឋានសាងសង់ «ព្រែកជីកហ្វូណន-តេជោ»
-
ព័ត៌មានជាតិ៥ ថ្ងៃ ago
នគរបាលខេត្តស្វាយរៀង បង្ក្រាបករណីឆបោកក្រោមរូបភាពដាក់ប្រាក់វិនិយោគ