​បន្ត​ផ្លាស់ប្តូរប្រធានស្ថានីយជញ្ជីង ទប់ស្កាត់ការ​ដឹកជញ្ជូនលើសទម្ងន់​ឱ្យកាន់តែមានប្រសិទ្ធភាព

ប្រធានស្ថានីយ​កំពង់ភ្នំ​ខេត្តកណ្តាល ត្រូវ​បានសម្រេច​​ផ្លាស់ប្តូរ​ដើម្បី​ជំរុញ​បង្កើនប្រសិទ្ធភាព​ក្នុងការ​គ្រប់គ្រង​ ទប់ស្កាត់ការងារដឹកជញ្ជូនលើសទម្ងន់កំណត់។

ក្នុងពិធីប្រកាសសមាសភាពប្រធានស្ថានីយកំពង់ភ្នំថ្មី​ក្នុង​ខេត្តកណ្តាល លោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានឲ្យ​ដឹង​ថា ការតែងតាំងប្រធានស្ថានីយថ្មី ក្នុងគោលបំណងពង្រឹងប្រសិទ្ធភាពនៃការអនុវត្តការងារ ទប់ស្កាត់ការដឹកជញ្ជូនលើសទម្ងន់កម្រិតកំណត់ឱ្យកាន់តែមានប្រសិទ្ធភាព។

លោក​ថា កន្លងមកគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូន​លើសទម្ងន់កម្រិតកំណត់ ក៏បានធ្វើការផ្លាស់ប្តូរសមាសភាពមន្រ្តីនៅតាមស្ថានីយមួយចំនួនផងដែរ។

ជាមួយការប្រកាស​តែងតាំងប្រធាន​ស្ថានីយជញ្ជីងថ្មី លោក សេង ឈួន បាន​ជំរុញឱ្យគ្រប់មន្ត្រីនិងកងកម្លាំងប្រចាំការនៅស្ថានីយ ត្រូវយកចិត្តទុកដាក់បន្ថែម ពង្រឹងការងារត្រួតពិនិត្យយានយន្ដឱ្យបានហ្មត់ចត់ និងច្បាស់លាស់ ព្រមទាំងចេះសហការគ្នាក្នុងការអនុវត្តការងារឱ្យកាន់តែមានប្រសិទ្ធភាពខ្ពស់៕