សមាជិកអ្នកធាក់ស៊ីក្លូ ៥០ នាក់ ជិះតាម​​ទីតាំង​សំខាន់ៗ​គាំទ្រ​យុទ្ធនាការ ១ ម៉ឺនរៀល ១ ម៉ឺននាក់

នៅព្រឹកថ្ងៃទី១៦ ខែមិថុនា ឆ្នាំ២០២៤ សមាជិកនៃសមាគមន៍ស៊ីក្លូកម្ពុជាចំនួន ៥០ នាក់ បានចូលរួម​គាំទ្រ​យុទ្ធនាការ ១ ម៉ឺនរៀល ១ ម៉ឺននាក់ របស់មូលនិធិគន្ធបុប្ផាកម្ពុជា ដើម្បីរួមគ្នារក្សា​និរន្តរភាព​នៃកិច្ច​ដំណើរការរបស់មន្ទីរពេទ្យគន្ធបុប្ផាដែលកំពុងមានបេសសកម្មពិនិត្យ ព្យាបាល មាតា ទារកនិង​កុមារនៅកម្ពុជាដោយមិនគិតថ្លៃ ប្រកបដោយគុណភាព និងមិនមានការរើសអើង។

ការចូលរួមផ្សព្វផ្សាយរបស់សមាគមស៊ីក្លូនៅកម្ពុជាអំពី យុទ្ធនាការ ១ ម៉ឺនរៀល ១ ម៉ឺននាក់ នៅ​ឆ្នាំ​នេះ ​មានការចូលរួមពីសមាជិក ដែលជាអ្នកប្រកបរបរធាក់ស៊ីក្លូនៅរាជធានីភ្នំពេញប្រមាណ ៥០​ នាក់ ដោយបានជិះតាមទីតាំង​សំខាន់ៗមួយចំនួន​ដូចជា រមណីយដ្ឋានវត្តភ្នំ, សួនច្បារវិមានឯករាជ្យ, មន្ទីរពេទ្យគន្ធបុប្ផាភ្នំពេញ និងទីតាំងសំខាន់ៗមួយចំនួនទៀត។

យុទ្ធនាការ “១ ម៉ឺនរៀល ១ ម៉ឺននាក់” សម្រាប់កុមារនៅកម្ពុជា ជាយុទ្ធនាការប្រចាំឆ្នាំ​របស់មូលនិធិ​គន្ធបុប្ផា​កម្ពុជា ដើម្បីកៀរគរថវិកាក៏ដូចជាបំផុសស្មារតី ខ្មែរជួយខ្មែរ រួមគ្នារក្សានិរន្តរភាព​នៃ​កិច្ច​ដំណើរការរបស់​មន្ទីរពទ្យ​គន្ធបុប្ផា។ ក្នុងឆ្នាំ​២០២៤ យុទ្ធនាការ ១ ម៉ឺនរៀល ១ ​ម៉ឺននាក់ ​សម្រាប់​កុមារកម្ពុជា​មានរយៈពេល ១ ខែពេញ ដែលបានផ្តួចផ្តើមឡើងដោយ​លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជាកាលពីថ្ងៃទី១ ខែមិថុនា ឆ្នាំ​២០២៤​។

គិតត្រឹមព្រឹកថ្ងៃទី១៧ ខែមិថុនា ឆ្នាំ២០២៤ យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៤ ទទួល​បានថវិកាបរិច្ចាគសរុបសមមូលជាប្រាក់ដុល្លារអាម៉េរិកចំនួនប្រមាណ ១ ៦៣៤ ២៥១ ដុល្លារ ពីសប្បុរជនសរុបចំនួនប្រមាណ ១៥៥ ១៦៦ នាក់។

ក្រៅពីចូលរួមបរិច្ចាគ សប្បុរសជនមួយចំនួនក៏បានចូលរួមផ្សព្វផ្សាយបន្តទាំងក្នុងលក្ខណៈជា​បុគ្គល​ផ្ទាល់ និងតំណាងអង្គភាពនីមួយៗ។ ការផ្សព្វផ្សាយពីយុទ្ធនាការនេះ ក៏មានការ​ចូលរួម​យ៉ាង​សកម្មពី​សំណាក់អង្គភាពសារព័ត៌មានានា, ក្រុមហ៊ុន-សហគ្រាស, ធនាគារដៃគូរបស់មូលនិធិ, បុគ្គល​មានប្រជាប្រិយ និងតារាសម្ដែងផងដែរ៕