មន្ទីរកសិកម្មខេត្តស្ទឹងត្រែងឲ្យកសិករជូនដំណឹងមកខេត្ត​ក្នុងករណី សត្វដង្កូវស៊ីបំផ្លាញដំណាំស្រូវ និងដំឡូងមី

មន្ត្រីមន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែងបានប្រកាសជូនដំណឹងដល់កសិករដែលជួបប្រទះបញ្ហាដង្កូវហ្វូងស៊ីស្រូវ និងដំណាំដំឡូងមីត្រូវរាយការណ៍ទៅអាជ្ញាធរមូលដ្ឋានភូមិឃុំឬក៏រាយការណ៍ផ្ទាល់ទៅកាន់មន្ទីរកសិកម្មផ្ទាល់ក៏បាន។

លោក កង សារ៉េត ប្រធានការរិយាល័យការពារដំណាំនៃអគ្គនាយកដ្ឋានដំណាំ អនាម័យ នៃក្រសួងកសិកម្មរុក្ខាប្រមាញ់និងនេសាទ បានបញ្ជាក់ថា៖ បញ្ហាដែលកសិករជួបប្រទះនេះស្នើឲ្យធ្វើការតាមដានឱ្យបានដិតដល់ពីព្រោះថា ការធ្វើការងារបង្កបង្កើនផលតែងតែពឹងផ្អែកទៅលើផលដំណាំនេះហើយ ដើម្បីធានានូវសន្តិសុខស្បៀងសំរាប់ការរស់នៅ។

លោកបន្តទៀតថា៖ បងប្អូនកសិករត្រូវអនុវត្តតាមមន្ត្រីជំនាញបច្ចេកទេសដែលបានណែនាំបើមានលទ្ធភាព អាចអាជីកប្រឡាយព័ទ្ធជំវិញ ហើយបញ្ចូលទឹក និងបាចកំបោរ ហើយសំអាតព្រៃដែលនៅជុំវិញផង ដើម្បីកម្ចាត់សត្វចង្រៃកុំឱ្យមកស៊ីដំណាំ នេះជាវិធីសាស្ត្រធ្វើបែបធម្មជាតិ។ ហើយជម្រើសទី២គឺប្រើថ្នាំគីមីបាញ់សម្លាប់តែម្តង តែត្រូវអនុវត្តតាមការណែនាំដើម្បីយើងថែរក្សាសុខភាពចៀសវាងពីការពុល ដោយសារប្រើថ្នាំពុលនេះ។

លោកស្រី មិល ភាន កសិករនៅភូមិពងទឹកស្រុកថាឡាបរិវ៉ាត់លើកឡើងថា ការងារបង្កបង្កើនផលឆ្នាំនេះជួបនូវបញ្ហាកង្វល់ទៅលើដំណាំស្រូវ និងដំឡូងមី ដោយសារការប្រែប្រួលអាកាសធាតុ ថែមទាំងមានសត្វដង្កូវហ្វូងស៊ីបំផ្លាញស្រូវ និងដំឡូងមីបន្ថែមទៀត។ 

ពួកគាត់បានសំដែងការព្រួយបារម្ភទៅលើដំណាំស្រូវ ដែលបច្ចុប្បន្នកសិករយើង ដាំដុះបានលូតលាស់ហើយ បែរជាមានសត្វដង្កូវហ្វូងកើតច្រើនមីដេរដាស់ មកស៊ីស្រូវ តែមួយយប់ ២យប់អស់មួយស្រែតែម្តង។

លោក គឹមជឿន តំណាំងឱ្យកសិករដាំដំឡូងមី នៅភូមិរុន ឃុំកាំងចាម បានអះអាងថា៖ប៉ុន្មានឆ្នាំ កន្លងមក មិនដែលកើតមានសត្វដង្កូវនេះមកស៊ីបំផ្លាញស្រូវនិងដំឡូងនេះទេ តែឆ្នាំ២០២៤នេះកសិករ ជួបប្រទះស្ទើរគ្រប់ទីកន្លែងហើយ។

លោកសាទរបានមន្ត្រីជំនាញកសិកម្ម ថ្នាក់ក្រសួង និងខេត្ត ចុះមកណែនាំផ្ទាល់ពីបច្ចេកទេស និងវិធីសាស្ត្រ កម្ចាត់សត្វចង្រៃនេះ ហើយលោក និងបន្តផ្សព្វផ្សាយជូនទៅកសិករផ្សេងៗទៀត ដើម្បីរូមគ្នាសម្លាប់សត្វដង្កូវហ្វូងនេះ៕

អត្ថបទ៖ ងិន លីម