អនុរដ្ឋមន្ត្រីការបរទសជប៉ុន សម្តែងការភ្ញាក់ផ្អើលឃើញភ្នំពេញអភិវឌ្ឍន៍លើសការរំពឹងទុក

អនុរដ្ឋមន្ត្រីការបរទសជប៉ុន លោក ត្សឹហ្កិ យ៉ុស៊ិហ្វូមិ សម្តែងការភ្ញាក់ផ្អើលពេលឃើញរាជធានីភ្នំពេញ បានអភិវឌ្ឍន៍ច្រើនលើសពីការគិតទុក។ លោកបានលើកឡើងបែបនេះ នៅក្នុងពិធីជប់លៀងស្វាគមន៍នៃសន្និសីទ ASJA-ASCOJA-JAC លើកទី២២ កាលពីថ្ងៃទី២៧ ខែមិថុនា ឆ្នាំ២០២៤ នៅស្ថានទូតជប៉ុនប្រចាំកម្ពុជា ដែលផ្ដោតលើប្រធានបទ «ពាណិជ្ជកម្មតាមប្រព័ន្ធអេឡិចត្រូនិករវាងជប៉ុន-អាស៊ាន» ក៏ដូចជាលើកកម្ពស់ទំនាក់ទំនងពាណិជ្ជកម្មរវាងកម្ពុជា-ជប៉ុន។ កម្មវិធីខាងលើ គឺជាការជួបជុំអតីតនិស្សិតកម្ពុជា និងអតីតនិស្សិតសមាជិកអាស៊ាន ដែលធ្លាប់សិក្សានៅជប៉ុន។

នាឱកាសនោះ លោក ត្សឹហ្កិ យ៉ុស៊ិហ្វូមិ បានថ្លែងទាំងទឹកមុខរីករាយថា ៖«វាកន្លងទៅអស់ជាច្រើនឆ្នាំមកហើយ ដែលខ្ញុំបានមកកម្ពុជា ហើយលើកនេះ ខ្ញុំពិតជាភ្ញាក់ផ្អើលដោយបានឃើញរាជធានីភ្នំពេញ បានអភិវឌ្ឍន៍ច្រើនលើសពីការគិត​ទុករបស់ខ្ញុំ។ លើសពីនេះ ខ្ញុំនៅតែរំភើបចិត្តចំពោះទឹកចិត្ត និងភាពរួសរាយរាក់ទាក់របស់ប្រជាជនកម្ពុជាចំពោះជប៉ុន»។
វត្តមានរបស់លោកនាពេលនេះ ក៏បានជួបពិភាក្សាការងារជាលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ព្រមទាំងអតីតនិស្សិតអាស៊ានដែលធ្លាប់សិក្សានៅប្រទេសជប៉ុនផងដែរ។

លោកធ្លាប់បានជួបអតីតនិស្សិតមួយចំនួនក្នុងឱកាសសន្និបាតអតីតនិស្សិតពីជប៉ុនលើកទី៤ ដែលបានធ្វើឡើងនៅទីក្រុងតូក្យូ កាលពីខែមីនាឆ្នាំនេះ ហើយលោកពិតជារីករាយក្រៃលែងដែលបានជួបគ្នាសារជាថ្មីម្តងទៀត។
លោកអនុរដ្ឋមន្រ្តីការបរទេសជប៉ុន មុនពេលចូលប្រឡូកក្នុងឆាកនយោបាយ លោកបានចំណាយពេលជាច្រើនឆ្នាំក្នុងការគ្រប់គ្រងការិយាល័យប្រៃសណីយ៍ និងដំណើរការស្ថាប័នជាតិប្រៃសណីយ៍។
ក្នុងតួនាទីជាអនុរដ្ឋមន្រ្តីការបរទេសជប៉ុន លោកនឹងជួយគាំទ្រដល់ការផ្លាស់ប្ដូររវាងប្រជាជន និងប្រជាជន ដែលបានធ្វើឱ្យប្រទេសជប៉ុនមានទំនាក់ទំនងយ៉ាងរស់រវើកតួយ៉ាងជាមួយកម្ពុជា និងបណ្តាប្រទេសសមាជិកអាស៊ាន ព្រមទាំងបណ្តាញដែលបង្កើតជាមូលដ្ឋានសម្រាប់ទំនាក់ទំនងការទូត។

លោកបញ្ជាក់ថា៖«ក្នុងនាមជាអនុរដ្ឋមន្ត្រីក្រសួងការបរទេស ខ្ញុំបានមកបំពេញទស្សនកិច្ចនៅកម្ពុជា ដើម្បីចូលរួមសន្និសីទ ក្រុមប្រឹក្សាអតីតនិស្សិតអាស៊ានមកពីប្រទេសជប៉ុន(ASCOJA) លើកនេះ ដោយសារយើងផ្តល់តម្លៃដល់បណ្ដាញអតីតនិស្សិតអន្តរជាតិពីប្រទេសជប៉ុន និងគាំទ្រសកម្មភាពនានារបស់ពួកគេតាមដែលអាចធ្វើទៅបាន»។

កាលពីថ្ងៃទី​១៧ ខែមិថុនា ឆ្នាំ ២០២៤ សម្តេចនាយករដ្ឋមន្រ្តី ហ៊ុន ម៉ាណែត បានលើកឡើងថា ក្នុង​រយៈពេល​ប៉ុន្មាន​ទសវត្សរ៍​កន្លង​មក​នេះ រាជធានី​ភ្នំពេញ​ បាន​ពង្រីក​ទាំង​បរិមាណ និង​គុណភាព ដោយក្នុងនោះ ផ្ទៃដីរបស់ទីក្រុងបានកើនឡើងពី ៣០០ គីឡូម៉ែត្រការ៉េ ដល់ជាង ៧០០ គីឡូម៉ែត្រការ៉េ។ សម្តេចបញ្ជាក់ថា៖«គុណភាពសំដៅទៅលើភាពសម្បូរបែប និងកម្រិតជីវភាព ក្នុងនោះ​កម្រិត​ជីវភាពរស់នៅរបស់ប្រជាពលរដ្ឋនៅរាជធានីភ្នំពេញគ្រប់កន្លែង ជាពិសេស ភ្នំពេញកើន​ឡើង​ជាបន្តបន្ទាប់»៕

អត្ថបទ៖ ឡាយ​ សាមាន