សម្តេច ហ៊ុន ម៉ាណែត អរគុណកងកម្លាំងដែលទប់ស្កាត់មិនឱ្យមានបាតុភាពបំផ្លិចបំផ្លាញសន្តិភាព និងបង្កចលាចលសង្គម

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅរសៀលថ្ងៃចន្ទនេះ បានចេញមកថ្លែងអំណរគុណដល់កងកម្លាំងគ្រប់ប្រភេទ និងអាជ្ញាធរពាក់ព័ន្ធទាំងអស់ ដែលបានខិតខំប្រឹងប្រែងប្រកបដោយការទទួលខុសត្រូវខ្ពស់ ដើម្បីរក្សាសន្តិសុខ សណ្ដាប់ធ្នាប់សាធារណៈ និងស្ថិរភាពសង្គមជាតិកម្ពុជា។ ការថ្លែងអំណរគុណនេះ បន្ទាប់ពីកងកម្លាំងគ្រប់លំដាប់ថ្នាក់ បានទប់ស្កាត់បានដោយជោគជ័យចំពោះសកម្មភាពប៉ុនប៉ងធ្វើបាតុកម្មផ្តួលរំលំរាជរដ្ឋាភិបាលតាមការញុះញង់ពីខាងក្រៅប្រទេស និងតាមការគ្រោងទុកនៅថ្ងៃអាទិត្យ ទី១៨ ខែសីហា ឆ្នាំ២០២៤។

តាមរយៈបណ្តាញសង្គមហ្វេសប៊ុក និងតេឡេក្រាម សម្តេចធិបតី នាយករដ្ឋមន្រ្តី បានអះអាងយ៉ាងមុតមាំថា៖ «រាជរដ្ឋាភិបាល មានកាតព្វកិច្ចក្នុងការធានាឱ្យបាននូវសុខសន្តិភាព សន្តិសុខ និងសុវត្ថិភាពជូនប្រជាពលរដ្ឋគ្រប់រូប ទោះក្នុងតម្លៃណាក៏ដោយ ដើម្បីរក្សាបាននូវប្រក្រតីភាពនៃការប្រកបរបរប្រចាំថ្ងៃរបស់ប្រជាជន​ និងភាពចម្រុងចម្រើនរបស់ប្រទេសជាតិ ដោយមិនអនុញ្ញាតឱ្យជនណាមួយមកបំផ្លិចបំផ្លាញសន្តិភាព និងបង្កចលាចលសង្គមបានឡើយ»។

កាលពីថ្ងៃអាទិត្យ ម្សិលមិញនេះ កងកម្លាំងរបស់រាជរដ្ឋាភិបាលកម្ពុជា បានទប់ស្កាត់បាននូវផែនការបាតុកម្មរបស់ក្រុមប្រឆាំងជ្រុលនិយមមួយចំនួនដែលគ្រោងនាំគ្នាធ្វើនៅពីមុខព្រះបរមរាជវាំង ក្នុងរាជធានីភ្នំពេញ។ អាជ្ញាធរមានសមត្ថកិច្ច បានចាប់ឃាត់ខ្លួនសមាជិក និងសកម្មជននៃក្រុមបាតុកម្មចំនួន ៣១នាក់ (ស្រី ២នាក់) ដែលបានធ្វើសកម្មភាពតាមផែនការរបស់ពួកគេក្នុងការប្រមូលកម្លាំងនៅតាមគោលដៅដែលបានកំណត់ និងដកហូតបាននូវសម្ភារ វត្ថុតាងមួយចំនួន មាន ដបសាំង កាំបិតស្នៀត ស្នាប់ដៃ ដំបង ជំពាមកៅស៊ូ និងគ្រាប់ដែក សម្រាប់ធ្វើសកម្មភាពប្រឆាំងតបតជាមួយសមត្ថកិច្ច។ នេះបើតាមការគូសបញ្ជាក់ឱ្យដឹងរបស់លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ។

ចំណែក ក្រសួងការពារជាតិវិញ បានចាត់ទុកការមិនអាចធ្វើបាតុកម្មបានដូចការគ្រោងរបស់ក្រុមជ្រុលនិយមកាលពីថ្ងៃអាទិត្យថា ជាការបរាជ័យដ៏អាម៉ាស់ជាថ្មីរបស់ក្រុមប្រឆាំងជ្រុលនិយមនៅក្រៅប្រទេស ដែលតែងមានគំនិតទុច្ចរិតប៉ុនប៉ងផ្តួលរំលំរាជរដ្ឋាភិបាលកម្ពុជា ក្រៅគន្លងប្រជាធិបតេយ្យ ដែលនេះ គ្រាន់តែជាក្តីស្រមៃបែបរវើរវាយប៉ុណ្ណោះ ហើយក៏បញ្ជាក់ឱ្យឃើញដែរថា ប្រជាពលរដ្ឋ និងយុវជនខ្មែរមានការយល់ដឹង ពុំបានឆោតល្ងង់ចូលរួម ឬសម្តែងការគាំទ្រទាល់តែសោះ ជាមួយនឹងសកម្មភាពរបស់ពួកគេ។ នេះបើតាមលោក ឈុំ សុជាត អ្នកនាំពាក្យក្រសួងការពារជាតិ។

ទាំងអ្នកនាំពាក្យក្រសួងការពារជាតិ ទាំងអ្នកនាំពាក្យអគ្គស្នងការដ្ឋាននគរបាលជាតិ បានអំពាវនាវប្រជាពលរដ្ឋឱ្យជឿទុកចិត្តលើរាជរដ្ឋាភិបាលកម្ពុជាដែលដឹកនាំដោយសម្តេចមហាបវរធិបតី ហ៊ុន ម៉ាណែត និងអំពាវនាវប្រជាពលរដ្ឋនៅគ្រប់មជ្ឈដ្ឋាន ទាំងក្នុង និងក្រៅប្រទេស កុំចាញ់បោកនូវឧបាយកលនយោបាយទុច្ចរិតរបស់ពួកប្រឆាំងជ្រុលនិយម ដែលតែងតែយកប្រជាពលរដ្ឋមកធ្វើជាឧបករណ៍ ដោយមិនគិតពីអាយុជីវិត ការលំបាករបស់ប្រជាពលរដ្ឋ បម្រើឲ្យមហិច្ឆិតាខ្មៅកខ្វក់របស់ក្រុមបក្ខពួកខ្លួន ដើម្បីដណ្តើមអំណាចផ្ទុយពីគោលការណ៍លទ្ធិប្រជាធិបតេយ្យ៕