អ្នកនាំពាក្យ៖ ស៊ុយអែត បិទការិយាល័យស្ថានទូតនៅកម្ពុជា ព្រោះត្រូវអភិវឌ្ឍន៍ រក្សាសន្តិភាពប្រទេសជិតខាងខ្លួន

អ្នកនាំពាក្យ ក្រសួងការបរទេស និងសហប្រតិបត្តិការអន្តរជាតិ នៅល្ងាចថ្ងៃចន្ទ បានទម្លាយឱ្យថា រដ្ឋាភិបាលស៊ុយអែត បានសម្រេចបិទការិយាល័យស្ថានទូតប្រចាំកម្ពុជា នៅក្រោមហេតុផលនៃការរៀបចំឡើងវិញ នៅចំណុចអាទិភាព (Reprioritizations) ដោយសារត្រូវផ្តល់អាទិភាពលើការអភិវឌ្ឍន៍ សេដ្ឋកិច្ច សន្តិភាព និងសន្តិសុខ នៅតំបន់ជិតខាងខ្លួន ដើម្បីឆ្លើយតបនឹងការប្រែប្រួលបរិបទពិភពលោក បន្ទាប់ពីការផ្ទុះសង្គ្រាមរុស្ស៊ី-អ៊ុយក្រែន។

អ្នកនាំពាក្យក្រសួងការបរទេស ឱ្យដឹងបែបនេះ បន្ទាប់ពីស្ថានទូតស៊ុយអែតប្រចាំកម្ពុជា តាមរយៈគេហទំព័រហ្វេសប៊ុកនៅរសៀលថ្ងៃទី១៦ ខែកញ្ញា នេះ បានប្រកាសបិទទ្វាការិយាល័យប្រចាំនៅកម្ពុជាចាប់ពីថ្ងៃទី៣០​ ខែកញ្ញា តទៅ ហើយដំណឹងនៃការបិទស្ថានទូតមួយនេះ ត្រូវបានបុគ្គលមួយចំនួនយកទៅបកស្រាយសម្រាប់បម្រើផលប្រយោជន៍នយោបាយរបស់ខ្លួន។  

តាមអ្នកនាំពាក្យ ដំណឹងអំពីការបិទការិយាល័យស្ថានទូតស៊ុយអែត(Sweden Section Office) នៅរាជធានីភ្នំពេញ ត្រូវបានក្រសួងការបរទេសស៊ុយអែត  បានជូនដំណឹងមកកាន់ក្រសួងការបរទេសកម្ពុជា តាំងតែពីខែមីនា ឆ្នាំ២០២៤ កន្លងទៅមកម៉្លេះ។

ជាមួយគ្នានេះ អ្នកនាំពាក្យ ក្រសួងការបរទេស និងសហប្រតិបត្តិការ អន្តរជាតិ សូមប្រកាសទាត់ចោលនូវរាល់ការប៉ុនប៉ងធ្វើការបកស្រាយករណីការបិទការិយាល័យ ស្ថានទូតស៊ុយអែត (Sweden Section Office) នៅរាជធានីភ្នំពេញ សម្រាប់បម្រើឱ្យគោលដៅនយោបាយ។

សូមជម្រាបថា នៅរសៀលថ្ងៃទី១៦ ខែកញ្ញា គេហទំព័រហ្វេសប៊ុកផ្លូវការរបស់ស្ថានទូតស៊ុយអែតប្រចាំកម្ពុជា បានប្រកាសអំពីដំណឹងនៃការបិទទ្វាស្ថានទូតនៅកម្ពុជា ចាប់ពីថ្ងៃទី៣០​ ខែកញ្ញា ទៅ រួមទាំងការបិទគេហទំព័រហ្វេសប៊ុកផ្លូវផងដែរ។

យ៉ាងណាក៏ដោយ ស្ថានកុងស៊ុលស៊ុយអែតប្រចាំកម្ពុជា នឹងបន្តផ្ដល់សេវាការទូតជាមូលដ្ឋានជូនដល់ប្រជាជនរបស់ខ្លួនដែលកំពុងរស់នៅកម្ពុជាជាធម្មតា។

គួរឱ្យដឹងបន្តិចថា កម្ពុជា និងស៊ុយអែត មានទំនាក់ទំនងការទូតជាមួយគ្នាជាផ្លូវការណ៍ នៅមុនរបបប្រល័យពូជសាសន៍ប៉ុលពត គឺនៅឆ្នាំ១៩៦១។ យ៉ាងណា នៅពេលកម្ពុជា ធ្លាក់ចូលរណ្ដៅរបបប្រល័យពូជសាសន៍ ស៊ុយអែត បានបញ្ចប់ទំនាក់ទំនង។ លុះមកដល់ឆ្នាំ២០១០ ទើបស៊ុយអែតបើកស្ថានទូតរបស់ខ្លួនប្រចាំនៅកម្ពុជាឡើងវិញ៕

ដោយ៖ ង៉ិល ណារ៉ាត់