ភ្ញៀវទេសចរមកពីអឺរ៉ុបជិត ៣០០ នាក់ ចូលតាមជើងហោះហើរមកខេត្តព្រះសីហនុ

ភ្ញៀវទេសចរណ៍ចម្រុះជាតិសាសន៍មកតំបន់អឺរុបខាងកើតជិត ៣០០ នាក់ នៅព្រឹកថ្ងៃទី២៥ ខែតុលា ឆ្នាំ២០២៤ បាន​មកដើរលេងកម្សាន្តនៅខេត្តព្រះសីហនុ តាមច្រកអាកាសយានដ្ឋានអន្តរជាតិក្រុងព្រះសីហនុហើយនឹងបន្តមកលេងច្រើន ក្រុម​ទៀត រហូតដល់ពាក់កណ្តាលខែវិច្ឆិកាខាងមុខនេះ។

លោក ឡុង ឌីម៉ង់ អភិបាលរងខេត្តព្រះសីហនុបានមកទទួលភ្ញៀវទេសចរណ៍ចម្រុះជាតិសាសន៍ (រុស្ស៊ី និងកាហ្សាក់ស្ថាន) ទាំងនេះនៅអាកាសយានដ្ឋានអន្តរជាតិក្រុងព្រះសីហនុ។

ជើងហោះហើរនេះនាំយកអ្នកដំណើរសរុបចំនួន ២៣៤ នាក់ ក្នុងនោះមានពហុនិកា និងអាកាសយានិក៩នាក់ផងដែរ។ យន្តហោះបានចុះដោយសុវត្ថិភាពនាម៉ោង ៨៖៣០ នាទីព្រឹក នាព្រឹកថ្ងៃទី២៥ ខែតុលា ឆ្នាំ២០២៤។

លោក ឡុង ឌីម៉ង បានមានប្រសាសន៍ថា៖ យន្តហោះនេះបានដឹកនាំយកភ្ញៀវទេសចរ ចំនួន២៧៧នាក់ ដែលជាភ្ញៀវទេសចរណ៍ចម្រុះជាតិសាសន៍ មានជនជាតិរុស្ស៊ី និងកាហ្សាក់ស្ថាន មកខេត្តព្រះសីហនុ។

ពួកគាត់បានជ្រើសរើសយកទីតាំងនៃខេត្តព្រះសីហនុ ដើម្បីសំរាកលំហែរកម្សាន្ត ជាលក្ខណៈគ្រួសារ ដែលមានទាំង ចាស់ ទាំងក្មេងនិងកូនតូចៗ។ ខេត្តព្រះសីហនុជាតំបន់ស្រស់ស្អាត មានកោះជាច្រើន ដែលសុទ្ធតែជាកន្លែងទាក់ទាញ។

លោកបន្តថា៖«តាមការប៉ាន់ស្មាន នៅក្នុងថ្ងៃនេះយើងមានភ្ញៀវមួយជើង ថ្ងៃស្អែកយើងមានភ្ញៀវមួយជើងទៀត ថ្ងៃច័ន្ទមួយជើងទៀត ហើយនៅថ្ងៃទី១០ជាងក្នុងខែវិច្ឆិកាខាងមុខនេះ យើងនឹងមាន១ជើងទៀត ពួកគាត់នឹងស្នាក់នៅប្រមាណ​ពី៥ទៅ១សប្តាហ៍ ជាងនេះទៅទៀតពួកគាត់ប្រមាណ១០ទៅ១៥%ក៏នឹងទៅលេងនៅខេត្តសៀមរាបផងដែរ»។ 

លោកបញ្ជាក់ថា៖ នេះសឹងតែជាលើកទី១ ក្រោយពីមានការរាតត្បាតដោយជម្ងឺកូវីដ-១៩ ដែលភ្ញៀវមកតាមច្រកនេះជាលក្ខណៈធំជាងគេ។ នេះជាការបង្ហាញពីការយកចិត្តពីកងកម្លាំង អាជ្ញាធរ ចំពោះភ្ញៀងទេសចរណ៍ ដោយយើងបានទមកទទួលរាក់ទាក់ដល់ព្រលាន ជាមួយនឹងការ ការពារសន្តិសុខជូនភ្ញៀវ ដែលធ្វើឱ្យពួកគាត់មានជំនឿទុកចិត្ត៕

អត្ថបទ៖ ស្រីរ័ត្ន