ព័ត៌មានជាតិ

ក្រសួងការងារ គ្រោងរៀបចំ និងបង្កើតច្បាប់ស្ដីពីសុវត្ថិភាព និងសុខភាពការងារ កាត់បន្ថយគ្រោះថ្នាក់ការងារ និងជំងឺវិជ្ជាជីវៈ

បានផុស

២ years មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

លោកទន្តបណ្ឌិត ឡេង តុង ប្រធាននាយកដ្ឋានពេទ្យការងារ នៃក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ក្រសួងការងារ និងបណ្ដុះបណ្ដាលវិជ្ជាជីវៈ គ្រោងរៀបចំ និងបង្កើតច្បាប់ស្ដីពីសុវត្ថិភាព និងសុខភាពការងារ ដើម្បីពង្រឹងប្រព័ន្ធសុវត្ថិភាព និងសុខភាពការងារនៅតាមសហគ្រាស គ្រឹះស្ថាន និងជំរុញការយកចិត្តទុកដាក់លើផ្នែកសុវត្ថិភាព និងសុខភាពដល់កម្មករ-និយោជិត ព្រមទាំងកាត់បន្ថយគ្រោះថ្នាក់ការងារ និងជំងឺវិជ្ជាជីវៈផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបើកវគ្គបណ្ដុះបណ្ដាលគ្រូបង្គោល ស្ដីពីសុវត្ថិភាព និងសុខភាពការងារ កាលពីរសៀលថ្ងៃទី ១១ វិច្ឆិកា លោក ឡេង តុង បានបន្តថា វគ្គបណ្ដុះបណ្ដាលនេះ រៀបចំធ្វើឡើងនៅមជ្ឈមណ្ឌលបណ្ដុះបណ្ដាលសុវត្ថិភាព និងសុខភាពការងារ ចាប់ផ្ដើមពីថ្ងៃទី ១១ ខែវិច្ឆិកា ដល់ថ្ងៃទី ០៥ ខែធ្នូ ឆ្នាំ ២០២៤ ដោយមានការចូលរួមពីសាស្ត្រាចារ្យជាគ្រូបង្គោលមកពីទីភ្នាក់ងារសុវត្ថិភាព និងសុខភាពការងារកូរ៉េ ថ្នាក់ដឹកនាំ មន្ត្រីរាជការ នៃនាយកដ្ឋានពេទ្យការងារ ព្រមទាំងសិក្ខាកាមមកពីស្ថាប័ន និងក្រសួងពាក់ព័ន្ធសរុបចំនួន ៤០ នាក់។

លោក ឡេង តុង បានបន្តថា វគ្គបណ្ដុះបណ្ដាលនេះពិតជាមានសារប្រយោជន៍ខ្លាំងណាស់ក្នុងការចូលរួមលើកកម្ពស់ផ្នែកសុវត្ថិភាព និងសុខភាព តាមរយៈផ្តល់ការបណ្ដុះបណ្ដាលទាំងទ្រឹស្ដី និងការអនុវត្តផ្ទាល់ដល់គ្រូបង្គោលឱ្យមានសមត្ថភាពគ្រប់គ្រាន់ក្នុងការបណ្ដុះបណ្ដាលបន្តទៅដល់មន្ត្រីទទួលបន្ទុកផ្នែកអធិការកិច្ច គណៈគ្រប់គ្រង បុគ្គលិក និងជនបង្គោលផ្នែកសុវត្ថិភាព និងសុខភាពនៅតាមរោងចក្រ សហគ្រាស ក្នុងការលើកកម្ពស់ សមត្ថភាពប្រើប្រាស់សម្ភារៈ បរិក្ខារ និងគ្រឿងម៉ាស៊ីន សម្រាប់ការបណ្តុះបណ្តាលនៅក្នុងមជ្ឈមណ្ឌលបណ្តុះបណ្តាលសុវត្ថិភាព និងសុខភាពការងារ ប្រកបដោយគុណវុឌ្ឍិ៕

អត្ថបទ ៖ សំអឿន