រដ្ឋបាលខេត្តកោះកុង រៀបចំពិធីបុណ្យអុំទូក និងកម្មវិធីសប្បាយៗជាច្រើន

អាជ្ញាធរ និងមន្ទីរពាក់ព័ន្ធនៅក្នុងខេត្តកោះកុង មានរួមគ្នារៀបចំពិធីបុណ្យអុំទូក ព្រមទាំងកម្មវិធីសប្បាយៗជាច្រើនទៀត ដើម្បីបង្កបរិយាកាសសប្បាយរីករាយដល់ប្រជាពលរដ្ឋ និងអ្នកទេសចរ ក្នុងឱកាសព្រះរាជពិធីបុណ្យអុំទូក អបអំបុក និងសំពះព្រះខែឆ្នាំនេះ។

មិនខុសពីបណ្តារាជធានី និងខេត្តដ៏ទៃទៀត ក្រោយការខកខានជិត៣ឆ្នាំមក ឆ្នាំ២០២៤នេះរដ្ឋបាលខេត្តកោះកុង បានបង្កើនជាកម្មវិធីប្រណាំងទូក១៦ទូក ការបណ្តែងប្រទីប តាំងពិព័រណ៍ទំនិញ ការប្រកួតសម្រស់នារីមជ្ឈឹមវ័យ ការបុកអំបុកអកពិសាររួមគ្នា និងការប្រគុំតន្រ្តីជាដើម។

លោកស្រី មិថុនា ភូថង បានឱ្យដឹងនៅយប់ថ្ងៃទី១៤ ខែវិច្ឆិកាថា ដើម្បីអបអរសាទរព្រះរាជពិធីបុណ្យអុំទូក នៅរាជធានីភ្នំពេញផង និងក្នុងន័យបង្កលក្ខណៈសប្បាយរីករាយដល់ប្រជាពលរដ្ឋអ្នកទេសចផងនោះ រដ្ឋបាលខេត្ត និងមន្ទីរពាក់ព័ន្ធ សំរិទ្ធសំរាំងបង្កើតកម្មវិធីបែបប្រពៃណីខ្មែរយើងឡើង ចំពោះអ្នកមិនពុំបានទៅលេងនៅរាជធានីអាចមកចូលរួមកម្សាន្តនៅមុខសាលាខេត្តបាន។

លោកស្រីអភិបាលខេត្ត មើលឃើញថា ក្រោមដំបូងសុខសន្តិភាពដឹកនាំដល់ឈ្លាសវៃរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តី មូលដ្ឋានខេត្តមានការអភិវឌ្ឍន៍រីកចម្រើនជាបន្តបន្ទាប់សំដៅផ្តល់ភាពសុខសាន្តជូនពលរដ្ឋ លើកកម្ពស់សេដ្ឋកិច្ចសង្គម សណ្តាប់ធ្នាប់សាធារណៈ ស្ថេរភាពនយោបាយ ដំណើរការអភិវឌ្ឍន៍ឥតឈប់ឈរ និងកៀងគរលំហូអ្នកវិនិយោគអភិវឌ្ឍន៍ប្រទេស។ ជាក់ស្តែងដូចថ្ងៃនេះមានកម្មវិធីប្រណាំងទូកនេះអញ្ចឹងដែរ បើគ្មានសន្តិភាពទេ គឺគ្មានមានកម្មវិធីទាំងនេះឡើយ ដូច្នេះយើងគ្នាការពារសុខសន្តិភាពឱ្យបានគង់វង្សបំផុតទៅអនាគត។

ដោយឡែកកញ្ញា អ៊ិន សុធាវី និងលោក សារ៉ាត់ ជាប្រជាពលរដ្ឋរស់នៅក្រុងខេមរភូមិន្ទដែលមានមកលេងកម្សាន្តកម្មវិធីសប្បាយមុខសាលាខេត្ត បង្ហាញក្តីពេញចិត្តចំពោះការរៀបចំកម្មវិធីប្រណាំង និងកម្មវិធីសប្បាយៗផ្សេងៗដើម្បីបង្កបរិយាកាសដល់ពលរដ្ឋ និងអ្នកទេសចរបានមកចូលរួមលេងកម្សាន្ត។ ពលរដ្ឋ ក៏សូមអរគុណចំពោះអាជ្ញាធរខេត្តកោះកុងដែលបង្កើតកម្មវិធីសប្បាយរីករាយនេះឡើងវិញ។

លោក សុខ ភិរម្យ តំណាងក្រុមទូកនាគជាប់ចំណាត់ថ្នាក់លេខ១ និងទូកប្រពៃណីផ្កាចា ជាប់ចំណាត់ថ្នាក់លេខ២ទូទាំងខេត្ត លើកឡើងថា ពួកគាត់ពិតជាសប្បាយរីករាយខ្លាំងណាស់ដែលបានចូលរួមប្រកួតនៅថ្ងៃនេះ។

ទំរាំទទួលបានជ័យលាភីនៅពេលនេះ ពួកគាត់ប្រឹងប្រែងវឹកហាត់ជាច្រើនថ្ងៃរហូតមកដល់ថ្ងៃប្រកួត។ នៅឆ្នាំក្រោយ បើមានកម្មវិធីប្រណាំង ពួកគាត់នឹងដឹកនាំប្រជាពលរដ្ឋមកចូលរួមបន្តទៀត៕

អត្ថបទៈ សិរីវឌ្ឍនៈ