អុំទូក ៣ ថ្ងៃ នៅ​ខេត្តកំពត ភ្ញៀវទេសចរកក់​ស្នាក់នៅ​សណ្ឋាគារពេញ ១០០%

បើ​តាមមន្ទីរទេសចរណ៍​ខេត្តកំពត​បាន​ឲ្យ​ដឹង​ថា ក្នុង​រយៈពេល ៣ ថ្ងៃ នៃព្រះរាជពិធីបុណ្យអុំទូក នៅ​តាមរីស៊ត សណ្ឋាគារ ត្រូវបានភ្ញៀវកក់ពេញ១០០% ខណៈដែលផ្ទះសំណាក់ភ្ញៀវកក់ចំនួន៨៥%។

ភ្ញៀវទេសចរជាតិ និងអន្តរជាតិជាង ១៣ ម៉ឹននាក់បានមកលម្ហែលេងកម្សាន្តនៅខេត្តកំពតក្នុងរយៈពេល ៣ថ្ងៃ នៃព្រះរាជពិធីបុណ្យអុំទូក ចាប់ពីថ្ងៃទី ១៤ រហូតដល់ថ្ងៃទី ១៦ ខែវិច្ឆិកា ឆ្នាំ២០២៤។

លោក សយ សុីណុល ប្រធានមន្ទីរទេសចរណ៍ខេត្តកំពតបានប្រាប់ឲ្យដឹងថា ៣ ថ្ងៃនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ភ្ញៀវទេសចរបានមកសម្រាកលេងលម្ហែកម្សាន្តនៅខេត្តកំពតទទួលទេសចរសរុបប្រមាណ ១៣៤,៦២២នាក់ ក្នុងនោះ កើនឡើង ៥៩.៨២ ភាគរយបើបើប្រៀបធៀបឆ្នាំ ២០២៣។ នៅក្នុងនោះភ្ញៀវទេសចរជាតិមានចំនួន ១៣២.៤១៦នាក់ និង​ភ្ញៀវទេសចរអន្តរជាតិមានចំនួន២,២០៦នាក់។

ចំពោះស្ថានភាពទូទៅ នៅតាមសេវាកម្ម រមណីយដ្ឋាន សហគមន៏ទេសចរណ៏ បានប្រព្រឹត្តិទៅជាប្រក្រតី ពុំមានបាតុភាពអ្វីកើតឡើងគួរឲ្យកត់សំគាល់នោះទេ។ លោក សយ សុីណុល បន្ថែម។

លោកសយ សុីណុល ប្រធានមន្ទីរខេត្តកំពតបានបញ្ជាក់ទៀតថា គោលដៅទេសចរណ៍នៅក្នុងក្រុងកំពត ពិសេសតំបន់ឆ្នេរ សួនច្បារសេះសមុទ្រ និងនាឡិកាធំកម្ពស់ ៣៥ ម៉ែត្រ នៅតែជាគោលដៅទាក់ទាញអ្នកទេសចរណ៍ខ្លាំងជាងគេ ដែលមានភ្ញៀវមកលេងច្រើនតាំងពីព្រឹក រហូតដល់យប់។

អត្ថបទ៖ សឹង រ៉ាត់