អន្ទិត កក្កដា សោភ័ណ្ឌ​ និងបុរសម្នាក់នៅបឹងកេងកង មិនអាចគេចផុតពីច្បាប់ថ្មីទេ

លោក​​ស្រីវេជ្ជបណ្ឌិត ឳ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល​បាន​លើកឡើងថា ​បុគ្គលដែលយកសំណាកទៅ​ពិនិត្យរួចហើយ និងកំពុងតែរង់ចាំលទ្ធផល ប៉ុន្តែ​បែរ​ជាមិនអនុវត្តការ​ធ្វើ​ចត្តាឡីស័ក​ បែរជាទៅចូលរួមមង្គលការ ឬពិធីផ្សេងៗ ហើយនៅពេល​​លទ្ធផល​ចេញមកវិជ្ជមាន ​មានន័យថា បុគ្គលនោះមិនគោរពច្បាប់ មិនគ្រប់វិធានការសុខាភិបាល ដូច្នេះ​ច្បាប់​​ដែល​ចេញមកហើយត្រូវ​យកមកអនុវត្ត។

ការ​លើកឡើងរបស់លោក​​ស្រីវេជ្ជបណ្ឌិត ឳ វណ្ណឌីន​ បាន​ធ្វើឡើងនៅក្នុងសន្និសីទសារព័ត៌​មានមួយ កាលពីព្រឹកថ្ងៃទី១៥ ខែមីនា ឆ្នាំ២០២១ នេះ នៅទីស្តីការក្រសួងសុខាភិបាល​ ទាក់​ទង​​​ច្បាប់ ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និង​ប្រកបដោយគ្រោះថ្នាក់ធ្ងន់ធ្ងរផ្សេងទៀត​ និងជាការឆ្លើយតបសំណួរអ្នកសារព័ត៌មាន​ ទាក់​ទង​អន្ទិត កក្កដា សោភ័ណ្ឌ​ ដែលមាន​វិជ្ជមានកូវីដ-១៩ ហើយទៅចូលរួមមង្គលការ​នៅស្រុកសំរោង ​ខេត្ត​តាកែវ និងបុរសម្នាក់នៅបឹងកេងកង​ ដែលមាន​វិជ្ជមានកូវីដ-១៩​​ដូចគ្នា​ដែរ បាន​ទៅ​ចូល​រួមមង្គល​ការ​នៅខេត្ត​ស្រុកឈូក ខេត្តកំពត។​

លោក​​ស្រីវេជ្ជបណ្ឌិត ឳ វណ្ណឌីន​ បាន​បញ្ជាក់​ថា “ខ្លួនត្រូវធ្វើចត្តាឡីស័ក យកសំណាកទៅមើលរួចហើយ កំពុងតែរង់ចាំលទ្ធផល ស្រាប់តែទៅចូលរួមមង្គលការ លទ្ធផលចេញមកវិជ្ជមាន ហើយបើចេញលទ្ធផលវិជ្ជមាន តើត្រូវធ្វើយ៉ាងម៉េច មនុស្សមួយរោងការមែនតិចទេ ។ បើរោងធំអាចពាន់នាក់ ​ការតូចខ្ទង់រយនាក់ដែរ តើវានឹងទៅជាយ៉ាងណា ? ហ្នឹងហើយដែលខ្ញុំតែង​តែរំឭកថា កុំឲ្យរោងការរបស់យើង រោងបុណ្យរបស់យើង ការជួបជុំរបស់យើង ឬហាងរបស់យើងក្លាយទៅជាកន្លែងផ្ទុះចេញនូវការចម្លងនៃវីរុស Covid-19​”។

លោក​​ស្រី​បញ្ជាក់​ទៀតថា “ខ្ញុំនិយាយជារឿយៗ ចំណុចនេះ ហើយចុះឥឡូវ​ប្រសិនបើបុគ្គលនោះមិនមានភាពស្មោះត្រង់ វានឹងបង្កហានិភ័យធំណាស់​ទៅដល់អ្នកដទៃ ទៅដល់សង្គមរបស់យើង អញ្ចឹងចាំបាច់​នៅពេលនេះ ពីព្រោះច្បាប់មានហើយ អញ្ចឹងអាជ្ញាធរមូលដ្ឋានចាំបាច់ត្រូវតែអនុវត្តច្បាប់ ពីព្រោះបុគ្គលនោះ មិនមែនមិន​ដឹងនោះទេ ពី​ព្រោះច្បាប់បានផ្សាយចេញរួចទៅហើយ”។

បើតាមលោក​​ស្រីវេជ្ជបណ្ឌិត ឳ វណ្ណឌីន​ នៅក្នុងព្រឹត្តិការណ៍ខាងលើ​នេះ ក៏​មិនត្រូវមានការលើកលែងដែរ ពីព្រោះការនិយាយ គឺនិយាយហើយ ការអប់រំ គឺអប់រំហើយ ច្បាប់ចេញមក គឺបានពន្យល់ច្បាស់ហើយ នៅឡើយតែបុគ្គល ដែលត្រូវអនុវត្តតែប៉ុណ្ណោះ ប៉ុន្តែ​បុគ្គលមិនអនុវត្ត ​នៅពេលយក​សំណាកហើយ តម្រូវឲ្យធ្វើចត្តាឡីស័កនៅដាច់ដោយឡែកពីគេ ដើម្បីរង់ចាំលទ្ធផល ហើយប្រសិនបានលទ្ធផលវិជ្ជមានត្រូវយកទៅព្យាបាលនៅមន្ទីរពេទ្យជាបន្ទាន់ តែបើអវិជ្ជមានជននោះត្រូវបន្តធ្វើចត្តាឡឺស័ក​១៤ថ្ងៃ ​ប៉ុន្តែបើបុគ្គលនោះមិនធ្វើ មានន័យថា បុគ្គលនោះមិនគោរពច្បាប់ មិនគ្រប់វិធានការសុខាភិបាល ដូច្នេះច្បាប់​ដែលចេញមកហើយត្រូវយកមកអនុវត្ត។

គួររំលឹកថា លោក កក្កដា សោភ័ណ្ឌ ចេញ​​លទ្ធផលវិជ្ជមានកូវីដ១៩ កាលពីថ្ងៃទី​១៤ ខែមីនា ក្រោយពីយកសំណាកទៅពិនិត្យ ប៉ុន្តែ​កាលពីថ្ងៃទី​១២ ខែមីនា គេបានទៅចូលរួមពីធីអាពា​ហ៍ពិពាហ៍​ នៅភូមិក្រាំងលាវ ឃុំរវៀង ស្រុកសំរោង ខេត្តតាកែវ។ ​​​ក្រោយមកអាជ្ញាធរ ក៏ដូចជា​មន្ទីរសុខាភិបាល​ខេត្តតាកែវ បាន​រកឃើញអ្នកជាប់ពាក់ព័ន្ធ​ជិត​៤០០​នាក់​ និង៣០ នាក់ ជាប់ពាក់ព័ន្ធផ្ទាល់ និងបាន​យកសំណាក់និងដាក់ឲ្យនៅដាច់ដោយឡែក។​

ដោយឡែក​ករណីមួយ​ទៀត បុរសម្នាក់ទៀត នៅខណ្ឌបឹងកេងកង វិជ្ជមាន​កូវីដ-១៩ បាន​ទៅចូលរួមមង្គលការមួយនៅស្រុកឈូក​ ខេត្តកំពត កាលបីរសៀលថ្ងៃទី១៤ ខែមីនា ឆ្នាំ​២០២១៕

អត្ថបទ៖ កោះកែវ