អាជ្ញាធរខេត្តព្រះសីហនុបញ្ឈប់ការយកភាសុីលើការលក់ដូរតូចៗតាមកញ្ច្រែង កញ្ជើ និងល្អី

រដ្ឋបាលខេត្តព្រះសីហនុបានធ្វើសេចក្តីជូនដំណឹងមួយស្ដីពីការបង់ភាស៊ី  បង់ថ្លៃជួលតូប រាន ស្តង់ ព្រមទាំងកន្លែងលក់ដូរដទៃទៀតតាមការកំណត់នៅក្នុងសៀវភៅបន្ទុក និងបញ្ឈប់ការយកភាស៊ីរាល់ការលក់ដូរតាមកញ្ច្រែង កញ្ជើ ល្អី របស់ប្រជាពលរដ្ឋ។ សេចក្តីជូនដំណឹងនេះ ត្រូវបានចុះហត្ថលេខា ដោយលោក គួច ចំរើន អភិបាលនៃគណៈអភិបាលខេត្តព្រះសីហនុ។

សេចក្តីជូនដំណឹងរបស់រដ្ឋបាលខេត្តបានបញ្ជាក់ថា អនុលោមតាមបទប្បញ្ញត្តិគតិយុត្តជាធរមានពាក់ព័ន្ធ នឹងការគ្រប់គ្រងផ្សារនៅទូទាំងប្រទេស អាជីវករលក់ដូរក្នុងផ្សារមានកាតព្វកិច្ចបង់ចំណូលចូលថវិកាខេត្ត ដែលមានជាអាទិ៍ ការបង់ភាស៊ី និងការបង់ថ្លៃជួល តូប រាន ស្តង់ និងកន្លែងលក់ដូរដទៃទៀត តាមការកំណត់នៅក្នុងសៀវភៅបន្ទុក ព្រមទាំងបង់ពន្ធដារ តាមការកំណត់នៃច្បាប់។

ដូច្នេះដើម្បីបង្ហាញឱ្យឃើញអំពីការយកចិត្តទុកដាក់ដល់ជីវភាពរស់នៅរបស់ប្រជាពលរដ្ឋ និងកាត់បន្ថយភាពក្រីក្រស្របតាមគោលនយោបាយរបស់រាជរដ្ឋាភិបាលកម្ពុជា រដ្ឋបាលខេត្តព្រះសីហនុ ស្នើឲ្យអភិបាលនៃគណៈអភិបាលក្រុង ស្រុក ត្រូវពង្រឹងការអនុវត្តតាមខ្លឹមសារសារាចរលេខ១១សរ ចុះថ្ងៃទី០៩ ខែធ្នូ ឆ្នាំ២០១៦ របស់រាជរដ្ឋាភិបាលឱ្យបានខ្ជាប់ខ្ជួន និងត្រូវ៖

ទី១. ណែនាំដល់ប្រធានផ្សារ អ្នកគ្រប់ គ្រងផ្សារនៅក្នុងដែនសមត្ថកិច្ចរបស់ខ្លួន ឱ្យបញ្ឈប់ការយក ភាស៊ី និង សេវាផ្សេងៗ ចំពោះប្រជាពលរដ្ឋលក់ដូរតាមកញែង កញ្ជើ ល្អី និងត្រូវបង្កលក្ខណៈងាយស្រួលដោយរៀបចំទីតាំងសមស្របដល់បងប្អូនប្រជាព័លរដ្ឋី ដែលរកស៊ីលក់ដូរឥវ៉ាន់ កំប៉ិកកំប៉ុកតាមកញែង កញ្ជើ ល្អី។ 

ទី២. ណែនាំដល់ប្រធានផ្សារ អ្នកគ្រប់ គ្រងផ្សារត្រូវអនុវត្តការប្រមូលចំនូល តាមរយៈការបង់ភាស៊ី និងការបង់ថ្លៃជួល តូប រាន ស្តង់ និងកន្លែងលក់ដូរដទៃទៀត តាមការកំណត់នៅក្នុងសៀវភៅ បន្ទុក

ទី៣. ណែនាំដល់ប្រធានផ្សារ អ្នកគ្រប់ គ្រងផ្សារត្រូវលើកស្លាកតារាងតម្លៃភាស៊ីនៅតាមទីផ្សារក្នុងដែនសមត្ថកិច្ចរបស់ខ្លួន។

សូមបញ្ជាក់ថា ការចេញសេចក្តីណែនាំរបស់រដ្ឋបាលខេត្តព្រះសីហនុ បានធ្វើឡើងបន្ទាប់ពីមានហេតុការណ៍មួយ ដោយសន្តិសុខផ្សារមជ្ឈមណ្ឌលពាណិជ្ជកម្មក្រុងព្រះសីហនុ បានទារភាស៊ីអាជីវករនៅលើសៀវភៅបន្ទុក បង្កឲ្យមានការឈ្លោះទាស់ទែងគ្នា ហើយឈានទៅដល់ការបំផ្លាញទ្រព្យសម្បត្តិរបស់អាជីវករ កាលពីថ្ងៃទី២០ ខែមីនា ឆ្នាំ២០២១ថ្មីៗនេះ៕

អត្ថបទ៖ កោះកែវ