ព័ត៌មានជាតិ

អាជ្ញាធរខណ្ឌឫស្សីកែវ ចុះពិនិត្យត្រៀមដាក់គ្រឿងចក្រអេស្ការបន្តស្ដារ ប្រព័ន្ធបង្ហូរព្រែកអូរវែងបន្ថែម បញ្ចៀសការជន់លិចតំបន់មួយចំនួន

បានផុស

៣ ខែ មុន

នៅ

ថ្ងៃសៅរ៍ ២៦ មេសា ២០២៥

ដោយ

អាជ្ញាធរខណ្ឌឫស្សីកែវ បានចុះពិនិត្យមើលវឌ្ឍនភាព នៃការអភិវឌ្ឍតាមស្ថានីយបូមទឹកនីមួយៗ និង ត្រៀមរៀបចំដាក់គ្រឿងចក្រអេស្ការបន្តស្ដារប្រព័ន្ធបង្ហូរព្រែកអូរវែងបន្ថែម ដើម្បីបញ្ចៀសការជន់លិចក្នុងមូលដ្ឋានខណ្ឌឫស្សីកែវ និងភូមិសាស្ត្ររាជធានីភ្នំពេញ នៅតំបន់មួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំមន្ត្រីពាក់ព័ន្ធ ចុះពិនិត្យទីតាំងដែលត្រៀមដាក់គ្រឿងចក្រអេស្ការបន្តស្ដារប្រព័ន្ធបង្ហូរព្រែកអូរវែង និងពិនិត្យមើលអំពីវឌ្ឍនភាព ការដ្ឋានសាងសង់ស្ថានីយបូមទឹកគីឡូម៉ែត្រលេខ ៩ ដោយបានដំឡើងម៉ាស៊ីនបូមទឹកខ្នាតធំមានមុខកាត់ទំហំ ១ ម៉ែត្រ ចំនួន ៣ គ្រឿង រួចរាល់ ក្នុងចំណោម ៤ គ្រឿង ដែលត្រូវដំឡើងនៅស្ថានីយនេះ។

លោក ជិន ប៊ុនធឿន បានឲ្យដឹងថា រដូវវស្សាបានខិតចូលមកដល់ អាជ្ញាធរ បានយកចិត្តទុកដាក់ និងធ្វើការស្ដារនៅប្រឡាយធំៗ មួយចំនួន ក្នុងមូលដ្ឋានខណ្ឌឫស្សីកែវ ដើម្បីបញ្ចៀសការជន់លិចនៅក្នុងមូលដ្ឋានខណ្ឌឫស្សីកែវ និងភូមិសាស្ត្ររាជធានីភ្នំពេញ។

លោកបានបន្តថា ការស្ដារប្រឡាយអូរ និងប្រឡាយមួយចំនួននៅក្នុងមូលដ្ឋានខណ្ឌឫស្សីកែវនេះ គឺដើម្បីឲ្យទឹកភ្លៀងដែលធ្លាក់មកអាចហូរមកបានលឿន និងមិនមានការជន់លិចអ្វីនោះទេ។

លោកអភិបាលខណ្ឌ បន្ថែមថា ក្រោយការរៀបចំ និងបិទបញ្ចប់ការដ្ឋានស្ថានីយបូមទឹកគីឡូម៉ែត្រលេខ ៩ នេះ និងស្ថានីយបូមទឹកបឹងពោងពាយរួចរាល់ លោកសង្ឃឹម និងជឿជាក់ថា ប្រព័ន្ធបង្ហូរទឹកដែលហូរចាក់មកពីខណ្ឌមួយចំនួនក្នុងរាជធានីភ្នំពេញ តាមរយៈស្ថានីយបូមទឹកទួលគោក ឆ្ពោះមក ព្រែកបាក់ទូក , ព្រែកអូរវែង និងឆ្ពោះមកស្ថានីយបូមទឹកគីឡូម៉ែត្រលេខ ៩ នេះ ហូរចុះទៅបឹងទន្លេសាប និងអាចរំដោះទឹកបានទាន់ពេលវេលាមិនឲ្យមានការជន់លិចបានទៀតឡើយ៕

អត្ថបទ ៖ ម៉េង