សាកលវិទ្យាល័យជប៉ុនមួយផ្តល់អាហារូបករណ៍ដល់និស្សិតពេទ្យកម្ពុជាបន្តការសិក្សានៅជប៉ុនរយៈពេល៦ឆ្នាំ

សាកលវិទ្យាល័យអន្តរជាតិនៃសុខុមាលភាព និងសុខភាពនៃប្រទេសជប៉ុន (International University of Health and Welfare ) (IUHW) នឹងផ្តល់អាហារូបករណ៍ជូនដល់និស្សិតថ្នាក់ ឆ្នាំសិក្សាមូលដ្ឋានផ្នែកវេជ្ជសាស្ត្រ និងនិស្សិតឆ្នាំទី២ ផ្នែកវេជ្ជសាស្ត្រ ដែលកំពុងសិក្សានៅសាកលវិទ្យាល័យវិទ្យាសាស្ត្រសុខាភិបាល សម្រាប់ទៅសិក្សាថ្នាក់វេជ្ជបណ្ឌិតនៅប្រទេសជប៉ុន រយៈពេល ៦ឆ្នាំ ដែលគ្រោងចាប់ផ្តើមពីខែមេសា ឆ្នាំ២០២៦ និងចាប់ផ្តើមសិក្សាចាប់ពីឆ្នាំទី១ឡើងវិញ។

បើតាម លោកសាស្ត្រាចារ្យ សាផុនវឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល បានឱ្យដឹងនៅក្នុងសេចក្តីជូនដំណឹងមួយដែលទើបទទួលបាននៅថ្ងៃទី១៧ ឧសភា នេះថានិស្សិតដែលត្រូវបានជ្រើសរើស នឹងទទួលបានការសិក្សាថ្នាក់ត្រៀមភាសាជប៉ុន និងមុខវិជ្ជាផ្សេងទៀត រួមមាន គណិតវិទ្យា វិទ្យាសាស្ត្រ និងភាសាអង់គ្លេស រហូតដល់ខែមីនា ឆ្នាំ២០២៦ មុននឹងចូលរៀននៅសាលាវេជ្ជសាស្ត្រ នៃសាកលវិទ្យាល័យ International University of Health and Welfare (IUHW) ប្រទេសជប៉ុន។

លោកសាស្ត្រាចារ្យ បានបន្តថា ចំពោះលក្ខខណ្ឌនៃដាក់ពាក្យប្រឡងជ្រើសរើសនិស្សិតដែលអាចដាក់ពាក្យបានត្រូវគោរពតាមលក្ខខណ្ឌ គឺជានិស្សិតកំពុងសិក្សាថ្នាក់ឆ្នាំសិក្សាមូលដ្ឋានផ្នែកវេជ្ជសាស្ត្រដែលមានពិន្ទុប្រឡងចូលថ្នាក់ជាតិជ្រើសរើសចូល រៀនថ្នាក់ឆ្នាំសិក្សាមូលដ្ឋានសម្រាប់កម្រិតបរិញ្ញាបត្រ នៅតាមគ្រឹះស្ថានបណ្តុះបណ្តាលវិស័យសុខាភិបាលផ្នែកវេជ្ជសាស្ត្រនៅសាកលវិទ្យាល័យវិទ្យាសាស្ត្រសុខាភិបាល ឆ្នាំសិក្សា ២០២៤-២០២៥ ក្នុងលំដាប់ពិន្ទុខ្ពស់ជាងគេ ២០នាក់ ឬជានិស្សិតឆ្នាំទី២ ផ្នែកវេជ្ជសាស្ត្រនៃសាកលវិទ្យាល័យវិទ្យាសាស្ត្រសុខាភិបាលក្នុងឆ្នាំសិក្សា ២០២៤-២០២៥ ដែលមានពិន្ទុថ្នាក់ឆ្នាំសិក្សាមូលដ្ឋាន ក្នុងលំដាប់លេខរៀងខ្ពស់ជាងគេ ២០នាក់ និងត្រូវមានចំណេះដឹងភាសាអង់គ្លេស (IELTS យ៉ាងតិច 6.0 ឬតេស្តផ្សេងទៀតសមមូល)។

ការជ្រើសរើសមាន២ដំណាក់កាល គឺដំណាក់កាលទី១. ជ្រើសរើសដោយសាកលវិទ្យាល័យវិទ្យាសាស្ត្រសុខាភិបាល និងដំណាក់កាលទី២. ជ្រើសរើសដោយតំណាងសាកលវិទ្យាល័យ International University of Health and Welfare (IUHW) ប្រទេសជប៉ុន ហើយវិញ្ញាសាដែលត្រួវប្រឡងរួមមានវិញ្ញាសរសេរ(សំណួរជ្រើសរើសមានចម្លើយច្រើន) លើមុខវិជ្ជា គណិតវិទ្យា វិទ្យាសាស្ត្រ (និស្សិតអាចជ្រើសរើសមុខវិជ្ជាចំនួន២ ក្នុងចំណោមមុខវិជ្ជាវិទ្យាសាស្ត្រ ចំនួន៣ រួមមាន គីមីវិទ្យា ជីវវិទ្យា និងរូបវិទ្យា) និងភាសាអង់គ្លេស។ ក្រៅពីនេះមានការសម្ភាសផ្ទាល់មាត់ជាភាសាអង់គ្លេស ឬជាភាសាអង់គ្លេសនិងភាសាជប៉ុន។

ចំពោះការទទួលពាក្យនឹងចាប់ផ្តើមពីពេលនេះរហូតរហូតដល់ថ្ងៃទី១៦ខែមិថុនាឆ្នាំ២០២៥ ខាងមុខនេះ។ គួរបញ្ជាក់ថាគិតពីឆ្នាំ២០១៦ មកដល់ឆ្នាំ២០២៣កន្លងទៅមាននិស្សិតសាកលវិទ្យាល័យវិទ្យាសាស្ត្រសុខាភិបាលចំនួន ១៨រូបហើយបានទទួលអាហារូបករណ៍សិក្សាថ្នាក់វេជ្ជបណ្ឌិតនៅ International University of Health and Welfare (IUHW) ៕

អត្ថបទ៖សំអឿន