ព័ត៌មានជាតិ

កម្ពុជាកំពុងរួមចំណែកសំខាន់ក្នុងវេទិកាប្រធានសភាអន្តរជាតិមួយដែលទើបនឹងបង្កើត

បានផុស

១ year មុន

នៅ

ថ្ងៃសុក្រ ២៣ ឧសភា ២០២៥

ដោយ

អគ្គលេខាធិការរបស់សន្និសីទប្រធានសភានៃអន្តរសភា (ISC) លោក អែក ណាតដាកាល នៅព្រឹកថ្ងៃទី២៣ ខែឧសភា ឆ្នាំ២០២៥ បាននាំមកនូវសញ្ញាសម្គាល់សមាជិកស្ថាបនិក ISC ជូនប្រធានព្រឹទ្ធសភាកម្ពុជាសម្ដេចតេជោ ហ៊ុន សែន និងបានជួបពិភាក្សាការងារសុំយោបល់ពីប្រធានរដ្ឋសភាសម្ដេច សភាធិបតី ឃួន សុដារីផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេទិកាសន្និសីទប្រធានសភានៃអន្តរសភា ISC ត្រូវបានបង្កើតនៅខែមេសា ឆ្នាំ២០២៥កន្លងទៅដោយមានប្រទេសស្ថាបនិកជាង២០ប្រទេសក្នុងនោះក៏មានកម្ពុជាផងដែរ។ ជាវេទិកាថ្មីមួយដែលមានបំណងលើកកម្ពស់ សន្ដិភាពសកលដោយគ្មានការរើសអើង។

អគ្គលេខាធិការ ISC លោក អែក ណាតដាកាល បានជួបពិភាក្សាសម្ដេចតេជោ ហ៊ុន សែន នៅព្រឹកថ្ងៃទី២៣ ខែឧសភានេះ ដោយបានជូនសញ្ញាសម្គាល់សមាជិកស្ថាបនិកជូនដល់សម្ដេចតេជោក៏ដូចជាសុំយោបល់ និងការគាំទ្រពីព្រឹទ្ធសភាកម្ពុជាផងដែរ។ ក្នុងជំនួបនោះប្រធានព្រឹទ្ធសភា សម្ដេចតេជោ ហ៊ុន សែន បានលើកឡើងនូវការគាំទ្រចំពោះកិច្ចសហប្រតិបត្តិការរបស់ ISC ជាមួយបណ្ដាស្ថាប័នផ្សេងៗរួមទាំងអាស៊ាន សម្ដេចក៏ណែនាំឱ្យ ISC ពង្រឹងតួនាទីរបស់ខ្លួនតាមរយៈការលើកកម្ពស់តួនាទីរបស់អគ្គលេខាធិការ និងលេខាធិការដ្ឋាន ISC ដើម្បីធានានូវដំណើរការ និងប្រសិទ្ធិភាព។

ដោយឡែកនៅព្រឹកនេះដែរលោក អែក ណាតដាកាល ក៏បានអញ្ជើញចូលជួបប្រធានរដ្ឋសភាកម្ពុជានិងបានស្នើសុំឱ្យកម្ពុជាគាំទ្រ ISC ឱ្យបានក្លាយជាដៃគូសន្ទនាជាមួយវេទិកាអន្តរសភានិងអន្តររដ្ឋាភិបាលនានា នៅក្នុងនោះមានដូចជាអង្គការសហប្រជាជាតិ អន្តរសភាអាស៊ាន (IAPA)និងសហភាពអន្តរសភា (IPU) ជាដើម។ ប្រធានរដ្ឋសភាកម្ពុជា សម្ដេចសភាធិបតី ឃួន សុដារី បានគាំទ្រចំពោះសំណើ និងជំរុញឱ្យ ISC ពង្រឹងលេខាធិការដ្ឋានឱ្យខ្លាំងដែលនឹងអាចទាក់ទាញសមាជិកបន្ថែមទៀតឱ្យចូលរួមក្នុងក្របខណ្ឌរបស់ខ្លួន។

មន្ត្រីជាន់ខ្ពស់រដ្ឋសភាលោក ប៉ែន ប្រាកដ បានឱ្យអ្នកសារព័ត៌មានដឹងបន្ទាប់ពីជំនួបនេះថា៖ «សម្ដេចប្រធានបានណែនាំឱ្យពង្រឹងនូវលេខាធិការដ្ឋានរឹងមាំ ទាំងសមត្ថភាព ទាំងធនធានហ្នឹងកាន់តែរឹងមាំហើយទី២ត្រូវតែជំរុញការប្រម៉ូតផ្សព្វផ្សាយឱ្យគេស្គាល់ធ្វើយ៉ាងណាឱ្យសភាផ្សេងទៀតផ្ដល់តម្លៃដល់ ISC »។

គួរឱ្យដឹងផងដែរថាសន្និសីទប្រធានសភានៃអន្តរសភា (ISC) គឺជាវេទិកាថ្មីមួយដែលត្រូវបានបង្កើតក្នុងកិច្ចប្រជុំកំពូលសហព័ន្ធសន្ដិភាពសកល (UPF) ក្នុងខែមេសា ដែលជាវេទិការនៃកម្រិតប្រជុំរបស់ប្រធានសភា។ លោក ប៉ែន ប្រាកដ បានឱ្យដឹងថាវេទិកា ISC នឹងផ្ដល់លទ្ធភាពដល់ប្រទេសកំពុងអភិវឌ្ឍន៍ និងអភិវឌ្ឍន៍តិចតួចបញ្ចេញសំឡេងរបស់ខ្លួនជាអន្តរជាតិដើម្បីស្វែងរកដំណោះស្រាយដល់បញ្ហារបស់ខ្លួន៕