ព័ត៌មានជាតិ

ចុះបញ្ជីដីធ្លីជាប្រព័ន្ធទូទាំងប្រទេស សម្រេចបានជាង ១៣ លានក្បាលដី នៅសល់ជាង ៣០ ម៉ឺនក្បាលដីទៀត

បានផុស

១១ ខែ មុន

នៅ

ថ្ងៃព្រហស្បតិ៍ ៥ មិថុនា ២០២៥

ដោយ

ក្រសួងរៀបចំដែនដី នគរូបនីយកម្ម និងសំណង់ (ដ.ន.ស.) បានប្រកាសពីលទ្ធផលសម្រេចបាននៃដំណើរការវាស់វែងចុះបញ្ជីដីធ្លីជាប្រព័ន្ធទាំងដីរដ្ឋនិងដីឯកជននៅទូទាំងប្រទេស លើផែនការជំរុញបញ្ចប់នៅត្រឹមបំណាច់ឆ្នាំ ២០២៥។

របាយការណ៍របស់ក្រសួងបានបង្ហាញថា គិតត្រឹមថ្ងៃទី២៥ ខែឧសភា ឆ្នាំ២០២៥ ដំណើរការវាស់វែងចុះបញ្ជីដីធ្លីជាប្រព័ន្ធនៅទូទាំងប្រទេសសម្រេចបានចំនួន ១៣ ៣៣៧ ៥០៧ ក្បាលដី លើក្បាលដីប៉ាន់ស្មានសរុបនៅទូទាំងប្រទេសចំនួន ១៣ ៦៥១ ៩៦៣ ក្បាលដី។ ក្នុងនោះក៏ចេញបណ្ណបានចំនួន ៨ ៤៥៩ ៦១៩ បណ្ណ ចែកបណ្ណបានចំនួន ៧ ៨៤២ ៥៨៧ បណ្ណម្ចាស់មិនទាន់មកទទួលបណ្ណចំនួន ២៣៥ ៤៦០ បណ្ណ បណ្ណជាប់ពន្ធប្រថាប់ត្រាទិញលក់ចំនួន ១៨៦ ១៣២ បណ្ណ បណ្ណជាប់ពន្ធសូន្យចំនួន ១៩៥ ៤៤០ បណ្ណ រួមទាំងក្បាលដីមិនទាន់បានវាស់វែងសរុបចំនួន ៣១៤ ៤៥៦ ក្បាលដី។

ជាមួយគ្នានេះ ក្រសួងរៀបចំដែនដី នគរូបនីយកម្ម និងសំណង់ ក៏អំពាវនាវដល់ប្រជាពលរដ្ឋដែលមានដីធ្លីបានចុះបញ្ជីរួចរាល់ ហើយពុំទាន់ទទួលបណ្ណកម្មសិទ្ធិ អាចទំនាក់ទំនងទៅក្រុមការងារមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី-ខេត្ត ក្នុងការទទួលយកបណ្ណកម្មសិទ្ធិដែលបានចេញរួចរាល់។

ប្រមុខរដ្ឋាភិបាលបានដាក់បទបញ្ជាឱ្យក្រសួងរៀបចំដែនដី នគរូបនីយកម្ម និងសំណង់ ប្រើប្រាស់កម្លាំងសរុបទាំងថ្នាក់កណ្ដាល ថ្នាក់រាជធានី ខេត្ត ប្រតិបត្តិការវាស់វែងដីធ្លីមានលក្ខណៈជាប្រព័ន្ធ ដោយជំរុញឲ្យបញ្ចប់នៅត្រឹមបំណាច់ឆ្នាំ ២០២៥ ដើម្បីរួមចំណែកក្នុងការបង្កើនសុវត្តិភាពនៃការកាន់កាប់ដីធ្លី ឈានទៅដល់ការកាត់បន្ថយទំនាស់ និងវិវាទជូនប្រជាពលរដ្ឋ៕