ថៃ ចាប់បញ្ជូនពលករខ្មែរខុសច្បាប់ជាង២០នាក់ មកកម្ពុជាវិញ តាមច្រកទ្វារអន្តរជាតិប៉ោយប៉ែត

ពលករខ្មែរខុសច្បាប់ប្រុសស្រីក្មេងចាស់ប្រមាណ២០នាក់ត្រូវបានតម្រួតថៃចាប់បញ្ជូនមកកម្ពុជាវិញតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។

ពលករខ្មែរដែលត្រូវតម្រួតថៃចាប់បញ្ជូនមកវិញ គឺធ្វើឡើងកាលពីវេលាម៉ោង២និង០០នាទី រសៀលថ្ងៃទី១៦ ខែមិថុនា ឆ្នាំ ២០២៥នេះ តាមរយៈរថយន្តទ្រុងដឹកពលករខ្មែរពីខេត្តស្រះកែវ មកមាត់ច្រកទ្វារអន្តរជាតិប៉ោយប៉ែតនៃខេត្តបន្ទាយមានជ័យ។

បើតាមមន្ត្រីនគរបាលអន្តោប្រវេសន៍នៃច្រកទ្វារអន្តរជាតិប៉ោយប៉ែត បានឲ្យដឹងថា ជារឿយៗខាងតម្រួតថៃតែងតែចាប់បញ្ជូនពលករខ្មែរដែលឆ្លងដែនដោយខុសច្បាប់មកកម្ពុជាវិញ។ ដោយការចាប់បញ្ជូនពលករខាងលើនេះមិនមែនជាការចាប់បញ្ជូនក្នុងពេលស្ថានភាពដែលប្រទេសទាំងពីរមានបញ្ហាតាមព្រំដែននោះឡើយ។

ចំពោះពលករដែលថៃចាប់បញ្ជូនមកនេះ ភាគច្រើនគឺពួកគាត់ឆ្លងដែនដោយខុសច្បាប់ គ្មានប័ណ្ណព្រំដែន និងប្រកបរបរការងារនៅក្នុងទឹកដីថៃដោយខុសច្បាប់ទើបថៃចាប់បញ្ជូនមកជាបន្តបន្ទាប់។ ពលករខុសច្បាប់ទាំងនេះ ត្រូវបាននគរបាលអន្តោប្រវេសន៍កម្ពុជា ទទួលពីតម្រួតថៃ ប្រគល់ឲ្យមណ្ឌលសំចតរបស់កម្ពុជាដែលមានមូលដ្ឋាននៅក្រុងប៉ោយប៉ែតចាំទទួលបន្តយកទៅសាកសួរនាំតាមនីតិវិធី បើគ្មានរងគ្រោះក្នុងបទល្មើសអ្វីទេ ខាងមណ្ឌលសំចត នឹងអោយពួកគាត់ទៅលំនៅដ្ឋាន ឬស្រុកំណើតវិញ៕

អត្ថបទ៖ អ ពៅ