ព័ត៌មានជាតិ

អ្នកនាំពាក្យក្រសួងការងារ ៖ កម្ពុជា ត្រៀមលក្ខណៈ និងយន្តការគ្រប់គ្រាន់សម្រាប់ជួយ អតីតពលករមកពីថៃ និងមានបំណងត្រឡប់មកកម្ពុជាវិញ

បានផុស

៤ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

កាលពីថ្ងៃទី ១១ ខែមីនា ឆ្នាំ ២០២៦ ឆ្លើយតបទៅនឹងសំណួររបស់អ្នកសារព័ត៌មានជុំវិញវិធានការរបស់ក្រសួងស្តីពីការជួយអតីតពលករ និងពលករដែលមានបំណងត្រឡប់ពីប្រទេសថៃ លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា «កម្ពុជា ត្រៀមលក្ខណៈ និងយន្តការគ្រប់គ្រាន់សម្រាប់ជួយអតីតពលករដែលមកពីប្រទេសថៃ និងពលករដែលមានបំណងត្រឡប់មកកម្ពុជាវិញ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យដដែល រូបនេះ លើកឡើងថា បច្ចុប្បន្ននេះ កម្ពុជា សម្បូរទៅដោយរោងចក្រសហគ្រាស ដែលកំពុងតែស្រូបយកកម្លាំងពលកម្មនៅក្នុងស្រុករាប់ម៉ឺននាក់ ដើម្បីយកមកបំពេញតម្រូវការងាររបស់ខ្លួន។

លោក ស៊ុន មេសា គូសបញ្ជាក់ថា «នៅកម្ពុជាមានការងារធ្វើច្រើន ក្នុងនោះពលរដ្ឋ និងពលករខ្មែរដែលត្រឡប់មកពីប្រទេសថៃដែលទទួលបានឱកាសការងារមានចំនួនប្រមាណជាង ៨០ ម៉ឺននាក់ហើយ បន្ថែមពីនេះ កម្ពុជា នៅសល់ឱកាសការងារសម្បូរបែបជាច្រើនម៉ឺនកន្លែងទៀតដែលកំពុងរងចាំបងប្អូន»។

លោកបានសង្កត់ធ្ងន់ថា ក្រសួងការងារដែលជាសេនាធិការជូនរាជរដ្ឋាភិបាល បានត្រៀមខ្លួនរួចជាស្រេចក្នុងការរកការងារធ្វើជូនពលរដ្ឋខ្មែរ អតីតពលករដែលបានត្រឡប់មកពីប្រទេសថៃ និងបងប្អូនពលករដែលមានបំណងត្រឡប់មកកម្ពុជាវិញ។

គួរបញ្ជាក់ថា គិតមកត្រឹមពេលនេះ មានអតីតពលករខ្មែរត្រឡប់មកពីប្រទេសថៃប្រមាណជាង ៩៥ ម៉ឺននាក់ ដោយក្នុងនោះ មានអតីតពលករខ្មែរដែលទទួលបានឱកាសការងារធ្វើចំនួនជាង ៦៣ ម៉ឺននាក់ តាមរយៈយន្តការក្រសួង និងវិស័យឯកជន នៅតាមរោងចក្រសហគ្រាសទាំងក្នុង និងក្រៅប្រព័ន្ធ។

ជាមួយគ្នានេះ លោក ស៊ុន មេសា បានអំពាវនាវសាជាថ្មីទៅដល់ប្រជាពលរដ្ឋនៅមូលដ្ឋាន ជាពិសេសអតីតពលករមកពីប្រទេសថៃ និងមានបំណងត្រឡប់មកពីប្រទេសថៃ ពិចារណារកឱកាសការងារក្នុងស្រុកដែលមានប្រាក់ឈ្នួលប្រហាក់ប្រហែលគ្នា អត្ថប្រយោជន៍សង្គមច្រើនជាង សុវត្ថិភាព និងចូលរួមក្នុងការអភិវឌ្ឍសេដ្ឋកិច្ចជាតិរបស់ខ្លួន៕