ក្រុមប្រឹក្សាធម្មនុញ្ញនឹងរើសប្រធានថ្មីនៃស្ថាប័នកំពូលនេះ ក្រោយលោក អ៊ឹម ឈុនលឹម ចប់អាណត្តិ

ក្រុមប្រឹក្សាធម្មនុញ្ញ នាព្រឹកថ្ងៃទី២៦ ខែមិថុនា ឆ្នាំ២០២៥ ខាងមុខ នឹងបើកកិច្ចប្រជុំពេញអង្គរបស់ខ្លួន ដើម្បីបោះឆ្នោតជ្រើសតាំងប្រធានថ្មីនៃស្ថាប័នកំពូលនេះ ក្រោយប្រធានចាស់ គឺលោក អ៊ឹម ឈុនលឹម ត្រូវបានចប់អាណត្តិ។

កាលពីថ្ងៃទី២៣ ខែមិថុនា ឆ្នាំ២០២៥ នៅក្នុងពិធីអបអរសាទរទិវារំលឹកខួប២៧ឆ្នាំ នៃការបង្កើតក្រុមប្រឹក្សាធម្មនុញ្ញ និងការបូកសរុបសមិទ្ធផល៩ឆ្នាំ របស់ក្រុមប្រឹក្សាធម្មនុញ្ញ លោក អ៊ឹម ឈុនលឹម បានប្រកាសពីការចប់អាណត្តិរបស់លោក ក្រោយកាន់តំណែងជាប្រធានក្រុមប្រឹក្សាធម្មនុញ្ញ ៣អាណត្តិ រយៈពេល៩ឆ្នាំ ចាប់ពីខែមិថុនា ឆ្នាំ២០១៦ ដល់ខែមិថុនា ឆ្នាំ២០២៥។

យោងតាមសេចក្ដីប្រកាសរបស់អគ្គលេខាធិការដ្ឋានក្រុមប្រឹក្សាធម្មនុញ្ញ កិច្ចប្រជុំពេញអង្គ នាពេលខាងមុខនេះ នឹងមានការប្រកាសចូលកាន់តំណែងសមាជិកក្រុមប្រឹក្សាធម្មនុញ្ញចំនួន៣រូប ហើយការបោះឆ្នោតជ្រើសតាំងប្រធានក្រុមប្រឹក្សាធម្មនុញ្ញអាណត្តិ ៣ឆ្នាំ លើកទី១០ (២០២៥-២០២៨) រួមហើយធ្វើពិធីផ្ទេរតំណែងប្រធានក្រុមប្រឹក្សាធម្មនុញ្ញ។

សមាជិកក្រុមប្រឹក្សាធម្មនុញ្ញអាណត្តិថ្មីចំនួន៣រូប ដែលនឹងប្រកាស គឺរួមមានលោក យូ ប៊ុនឡេង តែងតាំងដោយឧត្តមក្រុមប្រឹក្សានៃអង្គចៅក្រម លោក យក់ ង៉ុយ ជ្រើសតាំងដោយរដ្ឋសភា និងលោកស្រី ខែក កែមាលី ស៊ីសូដា តែងតាំងដោយព្រះមហាក្សត្រ។ សមាជិក សមាជិកាក្រុមប្រឹក្សាធម្មនុញ្ញ ទាំង៣រូបនេះ បានធ្វើសច្ចាប្រណិធានរួចហើយនៅក្នុងព្រះទីនាំងទេវាវិនិច្ឆ័យ ព្រះបរមរាជវាំង កាលពីរសៀលថ្ងៃទី១១ ខែមិថុនា ឆ្នាំ២០២៥។

ជាការកត់សម្គាល់ លោក យក់ ង៉ុយ ជាសមាជិកក្រុមប្រឹក្សាធម្មនុញ្ញក្នុងតំណែងបច្ចុប្បន្ន ហើយនេះជាការបន្តអាណត្តិថ្មីរបស់លោក។ ដោយឡែក លោក យូ ប៊ុនឡេង អតីតអនុប្រធានតុលាការកំពូល និងលោកស្រី ខែក កែមាលី ស៊ីសូដា អតីតជាឯកអគ្គរាជទូតកម្ពុជានៅប្រទេសចិន ជាសមាជិកក្រុមប្រឹក្សាធម្មនុញ្ញថ្មី ដែលមានអាណត្តិ៩ឆ្នាំ (ឆ្នាំ២០២៥ ដល់ឆ្នាំ២០៣៤)។

សមាសភាព​របស់​ក្រុមប្រឹក្សាធម្មនុញ្ញ​ គឺមានចំនួន៩រូប ដែលក្នុងនោះត្រូវដឹកនាំដោយ​ប្រធាន១រូប និង​សមាជិក​ចំនួន៨រូប ហើយមានអាណត្តិការងាររយៈពេល៩ឆ្នាំ។ ប៉ុន្តែសមាជិកចំនួន៣រូប ត្រូវជ្រើសតាំង ឬតែងតាំង រាល់រយៈពេល៣ឆ្នាំម្ដង។ ក្នុងចំណោមសមាសភាពក្រុមប្រឹក្សាធម្មនុញ្ញទាំង៩រូប គឺចំនួន៣រូប តែងតាំង​ដោយព្រះមហាក្សត្រ​ ៣រូបជ្រើសតាំង​ដោយ​រដ្ឋសភា និងចំនួន៣រូប​ទៀត ជ្រើសតាំង​ដោយ​ឧត្ដមក្រុមប្រឹក្សា​នៃ​អង្គចៅក្រម៕

ដោយ៖ ធឿន វ៉ាន់សុង