លោក ហ៊ី សោភា ត្រូវបានជ្រើសតាំងជាប្រធានថ្មីក្រុមប្រឹក្សាធម្មនុញ្ញ

ក្រុមប្រឹក្សាធម្មនុញ្ញ បានបោះឆ្នោតជាឯកច្ឆន្ទជ្រើសតាំងលោក ហ៊ី សោភា ជាប្រធានថ្មីនៃស្ថាប័នកំពូលរបស់ជាតិមួយនេះ សម្រាប់អាណត្តិ៣ឆ្នាំ លើកទី១០ (២០២៥-២០២៨)។ ការបោះឆ្នោតជ្រើសតាំងលោក ហ៊ី សោភា បានធ្វើឡើងនៅក្នុងកិច្ចប្រជុំពេញអង្គក្រុមប្រឹក្សាធម្មនុញ្ញ នាព្រឹកថ្ងៃទី២៦ ខែមិថុនា ឆ្នាំ២០២៥នេះ។

តំណែងជាប្រធានក្រុមប្រឹក្សាធម្មនុញ្ញរបស់លោក ហ៊ី សោភា គឺមកជំនួសលោក អ៊ឹម ឈុនលឹម ដែលបានចប់អាណត្តិក្រោយកាន់តំណែងជាប្រធានក្រុមប្រឹក្សាធម្មនុញ្ញ ៣អាណត្តិ រយៈពេល៩ឆ្នាំ ចាប់ពីខែមិថុនា ឆ្នាំ២០១៦ ដល់ខែមិថុនា ឆ្នាំ២០២៥។

លោក អ៊ឹម ឈុនលឹម បានប្រគល់ត្រាក្រុមប្រឹក្សាធម្មនុញ្ញ និងញញូរ “ព្រហ្មវិនិច្ឆ័យ” ជូនលោក ហ៊ី សោភា ក្នុងកិច្ចផ្ទេរតំណែងប្រធានក្រុមប្រឹក្សាធម្មនុញ្ញ។

មុនការបោះឆ្នោតជ្រើសប្រធានថ្មី កិច្ចប្រជុំពេញអង្គ ក៏បានប្រកាសចូលកាន់តំណែងសមាជិកក្រុមប្រឹក្សាធម្មនុញ្ញថ្មីចំនួន ៣រូបផងដែរ គឺលោក យក់ ង៉ុយ ជ្រើសតាំងសាជាថ្មីដោយរដ្ឋសភា លោកស្រី ខែក កែមាលី ស៊ីសូដា តែងតាំងដោយព្រះមហាក្សត្រ និងលោក យូ ប៊ុនឡេង តែងតាំងដោយឧត្តមក្រុមប្រឹក្សានៃអង្គចៅក្រម ជំនួសសមាជិក ៣អង្គ/រូបដែល ត្រូវចប់អាណត្តិ គឺលោក អ៊ឹម ឈុនលឹម សម្តេច ស៊ីសុវត្ថិ ពង្សនារី មុនីពង្ស និងលោក យក់ ង៉ុយ។

ជាការកត់សម្គាល់ លោក យក់ ង៉ុយ ជាសមាជិកក្រុមប្រឹក្សាធម្មនុញ្ញក្នុងតំណែងបច្ចុប្បន្ន ហើយនេះជាការបន្តអាណត្តិថ្មីរបស់លោក។ ដោយឡែក លោក យូ ប៊ុនឡេង អតីតអនុប្រធានតុលាការកំពូល និងលោកស្រី ខែក កែមាលី ស៊ីសូដា អតីតជាឯកអគ្គរាជទូតកម្ពុជានៅប្រទេសចិន ជាសមាជិកក្រុមប្រឹក្សាធម្មនុញ្ញថ្មី ដែលមានអាណត្តិ៩ឆ្នាំ (ឆ្នាំ២០២៥ ដល់ឆ្នាំ២០៣៤)។

សមាសភាព​របស់​ក្រុមប្រឹក្សាធម្មនុញ្ញ​ គឺមានចំនួន៩រូប ដែលក្នុងនោះត្រូវដឹកនាំដោយ​ប្រធាន១រូប និង​សមាជិក​ចំនួន៨រូប ហើយមានអាណត្តិការងាររយៈពេល៩ឆ្នាំ។ ប៉ុន្តែសមាជិកចំនួន៣រូប ត្រូវជ្រើសតាំង ឬតែងតាំង រាល់រយៈពេល៣ឆ្នាំម្ដង។ ក្នុងចំណោមសមាសភាពក្រុមប្រឹក្សាធម្មនុញ្ញទាំង៩រូប គឺចំនួន៣រូប តែងតាំង​ដោយព្រះមហាក្សត្រ​ ៣រូបជ្រើសតាំង​ដោយ​រដ្ឋសភា និងចំនួន៣រូប​ទៀត ជ្រើសតាំង​ដោយ​ឧត្ដមក្រុមប្រឹក្សា​នៃ​អង្គចៅក្រម៕

ដោយ៖ ធឿន វ៉ាន់សុង