ងៀតត្រី ៣ រសជាតិ សហគមន៍​ឃុំ​វឌ្ឍនៈ ​ទទួល​ការ​កម្មង់ពីអតិថិជនពីខេត្ត​ក្រចេះ ដល់ខេត្តព្រះសីហនុ

ងៀតត្រី ៣ រសជាតិ ដែល​ផលិតនិងកែច្នៃដោយសហគមន៍ឃុំ​វឌ្ឍនៈ មានការគាំទ្រនិងកម្មង់ទិញច្រើនពីអតិថិជន។

លោក ស៊ិន សង ប្រធានសហគមន៍ផលិតនិងកែច្នៃត្រីងៀតវឌ្ឍនៈបានរៀបរាប់ឱ្យដឹងថា សហគមន៍ផលិត និងកែច្នៃត្រីងៀតឃុំ​វឌ្ឍនៈ មានទីតាំងនៅភូមិវឌ្ឍនៈ ឃុំវឌ្ឍនៈ ស្រុកសំបូរ ខេត្តក្រចេះ ដែល​បង្កើតឡើងនៅចុងឆ្នាំ២០២២ ដោយមានការគាំទ្រពីអាជ្ញាធរ និងសម្របសម្រួលពីខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្ត និងមានការគាំទ្រថវិការដោយអង្គការ WWF ប្រចាំនៅខេត្តក្រចេះ។

លោក ស៊ិន សង បានរៀបរាប់ថា នៅក្នុងការធ្វើត្រីងៀតនេះ គឺយកត្រីដែលសហគមន៍ចិញ្ចឹមបានយកមកធ្វើ មិនមានការនាំចូលពីខាងក្រៅនោះទេ ដោយសហគមន៍បានបែងចែកសមាជិក ជាក្រុម ក្នុងការចិញ្ចឹមត្រី ហើយការចិញ្ចឹមត្រីនេះទៀត​សោត គឺដាំបបរផ្សុំពី ពោត កន្ទុក់ ចុងអង្ករ ត្រីរៀល និងអំបិល ធ្វើជាចំណីឱ្យត្រីស៊ី ដោយមិនប្រើចំណីទិញពីផ្សារឡើយ​។ ចំពោះ ត្រីរៀល ដែលយកមកធ្វើងៀតវិញ គឺទិញអ្នកនេសាទនៅក្នុងភូមិផ្ទាល់តែម្តង។

សព្វថ្ងៃ ការធ្វើត្រីងៀត មានបីប្រភេទ ដូចជា៖ ងៀតត្រីអណ្តែង ងៀតត្រីរៀល និងងៀតត្រីរ៉ស់ ពេលធ្វើត្រីងៀតរួចហើយ សហគមន៍មានម៉ាស៊ីនសំងួត ម៉ាស៊ីផលិតទឹកកក និងម៉ាស៊ីនវេចខ្ចប់ ដើម្បីរក្សាគុណភាព អនាម័យ និងមានអត្តសញ្ញាណ​​ច្បាស់លាស់។

លោក ស៊ិន សង បានបញ្ជាក់ថា ចំពោះតម្លៃលក់នៅលើទីផ្សារ ងៀតត្រីអណ្តែង និងត្រីរ៉ស់ ក្នុង១គីឡូ តម្លៃ ៣៥,០០០​រៀល រីឯ ងៀតត្រីរៀលវិញ យកឆ្អឹងចេញអស់ លក់ក្នុង១គីឡូ តម្លៃ ៥ ម៉ឺនរៀល។ រាល់ថ្ងៃ មានការកម្មង់ទិញច្រើន ពីតាមបណ្តាខេត្តនានា ដូចជា នៅទីរួខេត្តក្រចេះ ភ្នំពេញ និងខេត្តកំពង់សោម ជាដើម។

តាមរយៈសហគមន៍ផលិតត្រីងៀតនេះ បើតាម លោក ស៊ិន សង បានបង្កើតការងារបន្ថែមដល់បងប្អូនប្រជាពលរដ្ឋនៅក្នុងភូមិ បង្កើនប្រាក់ចំណូល និងបានចូលរួមទប់ស្កាត់ការនេសាទខុសច្បាប់ ជាពិសេសបានចូលរួមការពារអភិរក្ស​នូវធនធានជលផល។

យ៉ាងណាមិញ លោក ស៊ិន សង បាន​ថ្លែង​ថា រហូតមកដល់ពេលនេះ សហគមន៍នៅមិនទាន់បានធ្វើទីផ្សារ ការផ្សព្វផ្សាយ ឱ្យបានទូលំទូលាយនៅឡើយទេ ដោយ​សារសហគមន៍ទើបតែបង្កើតឡើង។ បច្ចុប្បន្នមានអង្គការដៃគូរមួយចំនួន បាននឹងកំពុងជជែកអំពីការធ្វើទីផ្សារ និងការចុះបញ្ជីផលិតផល ហើយសព្វថ្ងៃមានការគាំទ្រច្រើន ពីប្រជាពលរដ្ឋ និងអង្គការដៃគូរ តាមរយៈការតាំងពិព័ណផលិតផលក្នុងស្រុក ព្រោះត្រីងៀតដែលសហគមន៍ផលិត មានស្លាកសញ្ញាច្បាស់លាស់ ដែលបញ្ជាក់ពីអត្តសញ្ញាណចេញពីឃុំវឌ្ឍនៈ។

លោក ស៊ិន សង បានបញ្ជាក់ថា បើប្រៀបធៀបអំពីជីវភាពកាលពីមុនពេលមិនទាន់បង្កើតសហគមន៍ និងនៅពេលនេះ គឺខុសគ្នា ត្រង់ថា ពីមុនមិនសូវបាននៅផ្ទះទេ ព្រោះត្រូវចេញទៅក្រៅស្វែងរកការងារធ្វើជាកម្មករគេ ប៉ុន្តែពេលមានសហគមន៍នេះ គឺធ្វើឱ្យជីវភាពរបស់ពួកគាត់ មានភាពប្រសើរឡើងជាងមុន៕

អត្ថបទ៖ ប្រុញ វិធិន