ព័ត៌មានជាតិ

អាជ្ញាធរខណ្ឌមានជ័យ ផ្តល់ផ្លូវបេតុងសរសៃដែក ១ ខ្សែ ប្រវែង ៣២៥ ម៉ែត្រ ជូនពលរដ្ឋរស់នៅភូមិទួលរកា ១

បានផុស

២ សប្តាហ៍ មុន

នៅ

ថ្ងៃពុធ ៩ កក្កដា ២០២៥

ដោយ

អ៊ិន ពិសី

ប្រជាពលរដ្ឋភូមិទួលរកា ១ ត្រេកអរ ក្រោយអាជ្ញាធរខណ្ឌមានជ័យ ផ្តល់ជូនផ្លូវបេតុង ១ ខ្សែ បន្ទាប់ពីខូចខាតអស់មួយរយៈធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវបេតុង ១ ខ្សែ ប្រវែង ៣២៥ ម៉ែត្រ ក្នុងភូមិទួលរកា ១ សង្កាត់ចាក់អង្រែក្រោម ផ្លូវលេខ ៨ ក្រុមទី ២១ សង្កាត់/ខណ្ឌមានជ័យ រាជធានីភ្នំពេញ នេះ ជាសមិទ្ធផលថ្មីដែលអាជ្ញាធរខណ្ឌមានជ័យ ធ្វើផ្ដល់ជូនប្រជាពលរដ្ឋ ដើម្បីបន្ធូរបន្ថយការលំបាក។

លោក សុខ ហៀន ពលរដ្ឋរស់នៅតំបន់ខាងលើ បានឲ្យដឹងថា កន្លងមក ផ្លូវនេះខូចខាតច្រើន ហើយមានហុយដីចូលផ្ទះថែមទៀត ពលរដ្ឋក៏ធ្លាប់ស្នើសុំទៅកាន់អាជ្ញាធរឲ្យចុះត្រួតពិនិត្យចំណុចផ្លូវខូចនេះផងដែរ។

លោកបានបន្តថា លោក ក៏ដូចជាពលរដ្ឋទាំងអស់ សូមសាទរទៅកាន់អាជ្ញាធរដែលយកទុក្ខលំបាកប្រជាពលរដ្ឋមកដោះស្រាយ ក្នុងការធ្វើផ្លូវ ១ ខ្សែ ជូនអ្នកភូមិទួលរកា ១ ដើម្បីសម្រួលទាំងការរស់នៅ និងធ្វើដំណើរ។

លោក ជា សុខៃ ចៅសង្កាត់ចាក់អង្រែក្រោម បញ្ជាក់ឲ្យកម្ពុជាថ្មីដឹងថា សមិទ្ធផលផ្លូវបេតុងសរសៃដែក ១ ខ្សែ បានលេចចេញជារូបរាងហើយ ដើម្បីរំដោះ និងជួយបន្ធូរបន្ថយការលំបាកប្រជាពលរដ្ឋក្នុងការដំណើរទៅប្រកបអាជីវកម្ម ធ្វើការ និង ផ្តល់ភាពងាយស្រួលដល់សិស្សានុសិស្សផងដែរ។

លោកបន្តថា ផ្លូវបេតុងខាងលើនេះមានប្រវែង ៣២៥ ម៉ែត្រ ទំហំ ៧ ម៉ែត្រ ត្រូវបានចាក់បេតុងដាក់ឲ្យប្រជាពលរដ្ឋប្រើប្រាស់។ ចំពោះការស្ថាបនាផ្លូវបេតុងនេះដែរ គឺជាគម្រោងដែលបានគាំទ្រដោយថវិការបស់រដ្ឋបាលខណ្ឌមានជ័យ ក្រោយពីរដ្ឋបាលសង្កាត់ចាក់អង្រែក្រោម ដាក់ប្រព័ន្ធលូរំដោះទឹក ២ ខ្សែ អមសងខាងផ្លូវនេះ កាលពីចុងឆ្នាំ ២០២៤ កន្លងមក៕

អត្ថបទ ៖ រដ្ឋា