ព័ត៌មានជាតិ

សម្តេច ម៉ែន សំអន ៖ ពុទ្ធចក្រ និងអាណាចក្រ រីកចម្រើនដូចបច្ចុប្បន្ននេះ មកពីកត្តាសន្តិភាព

បានផុស

១១ ខែ មុន

នៅ

ថ្ងៃសៅរ៍ ១២ កក្កដា ២០២៥

ដោយ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តស្វាយរៀង ថ្លែងថា វិស័យពុទ្ធចក្រ និងអាណាចក្ររីកចម្រើនដូចបច្ចុប្បន្ននេះមកពីកត្តាសុខសន្តិភាព នេះហើយដែលប្រទេសលើពិភពលោកប្រាថ្នាចង់បាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ក្នុងពេល សម្តេច និងលោកជំទាវ ម៉ែន ភក្តី ហុក ឡងឌី បានអញ្ជើញប្រគេនទៀនព្រះវស្សាដល់ព្រះសង្ឃ ដែលគង់ចាំព្រះវស្សាអស់កាលត្រីមាសចំនួន ៣៣ វត្ត នៅខេត្តស្វាយរៀង នាព្រឹកថ្ងៃសៅរ៍ ២រោច ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១២ ខែកក្កដា ឆ្នាំ២០២៥។

សម្តេចកិត្តិសង្គហបណ្ឌិត ម៉ែន សំអន បានថ្លែងថា វិស័យពុទ្ធចក្រ និងអាណាចក្ររីកចម្រើនដូចបច្ចុប្បន្ននេះមកពីកត្តាសុខសន្តិភាព និងការអភិវឌ្ឍ នេះហើយដែលប្រទេសជាច្រើនលើពិភពលោកប្រាថ្នាចង់បាន។ ប្រទេសមានសន្តិភាព បានជំរុញឲ្យគ្រប់វិស័យអភិវឌ្ឍន៍យ៉ាងឆាប់រហ័ស ពិសេសពលរដ្ឋរស់នៅយ៉ាងសុខដុមរមនា ជាក់ស្ដែងគឺប្រទេសកម្ពុជា ក្រោមការដឹកនាំដ៏ឈ្លាសវៃបំផុតរបស់ សម្តេចតេជោ និងសម្តេចបវរធិបតី តែម្ដង។

តាមទំនៀមជាប្រពៃណីនៃព្រះពុទ្ធសាសនារបស់ខ្មែរ ព្រះសង្ឃគ្រប់ព្រះអង្គគ្រប់ វត្តអារាមក្នុងព្រះរាជាណាចក្រកម្ពុជា ត្រូវនិមន្តចូលកាន់ព្រះវស្សា អស់ថេរវេលា៣ខែ ចាប់តាំងពីថ្ងៃ ១រោច ខែអាសាឍតទៅ។ ពាក្យថា «វស្សា» មកពីពាក្យបាលីថា «វស្ស» ប្រែថា «ភ្លៀង» ឬ «រដូវភ្លៀង» ដែលមានកំណត់៤ខែ (រាប់ពីថ្ងៃ១រោច ខែអាសាឍ ដល់ ១៥កើត ខែកត្តិក)។ ព្រះបរមសាស្ត្រាយើងទ្រង់បានបញ្ញត្តិឲ្យមានកិច្ចចូលព្រះវស្សានេះ ប៉ុន្តែសព្វថ្ងៃនៅប្រទេសកម្ពុជាការចូលព្រះវស្សាមានកំណត់ត្រឹមតែ៣ខែទេ (រាប់ពីថ្ងៃ ១រោច ខែអាសាឍ ដល់ ១៥កើត ខែអស្សុជ)។

សម្តេចកិត្តិសង្គហបណ្ឌិត ក៏បានឧទ្ទិសមហាកុសលផលបុណ្យជូនដល់ញាតិកាទាំង៧សន្តាន និងបុព្វការីជនដែលបានចែកឋានទៅកាន់បរមលោកខាងមុខ និងបានឧទ្ទិសបុណ្យកុសលបានជូនដល់ដួងវិញ្ញាណក្ខន្ធ ឯកឧត្តម នាយឧត្ដមសេនីយ៍ ហុក ឡងឌី មកទទួលយកផលាអានិសង្សដែលកើតចេញអំពីបុណ្យក្នុងថ្ងៃនេះ តាមបែបប្រពៃណីព្រះពុទ្ធសាសនា ដែលជាសាសនារបស់រដ្ឋនេះតែម្ដង៕

អត្ថបទ ៖ វិមាន