ប្រឡងឌីប្លូមព្រឹកថ្ងៃទី២នៅមណ្ឌលភ្នំពេញអវត្តមានបេក្ខជន៨នាក់ ខណៈថ្ងៃទី១អវត្តមានជាង២០០នាក់

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ បានឱ្យដឹងនៅព្រឹកថ្ងៃទី១៥ កក្តដានេះថា ការប្រឡងសញ្ញាបត្រមធ្យមសិក្សាបឋមភូមិ ឬឌីប្លូមព្រឹកថ្ងៃទី២នេះ នៅមណ្ឌលប្រឡងរាជធានីភ្នំពេញ មានបេក្ខជនអវត្តមានចំនួន ៨ នាក់ប៉ុណ្ណោះ ខណៈការប្រឡងថ្ងៃទី១អវត្តមានរហូតទៅដល់ជាង ២០០នាក់ឯណោះ។

លោកឱ្យដឹងថា សម្រាប់ព្រឹកថ្ងៃទី១៥ កក្កដានេះ មានបេក្ខជនមកប្រឡងចំនួន ១៧ ៤៣៣ នាក់ស្រី ៨ ៨៥៥ នាក់ក្នុងចំណោមបេក្ខជនសរុប ១៧ ៦៦៥ នាក់ ចែកជា ៦៥ មណ្ឌលត្រូវជា ៧៤៣ បន្ទប់។ បើតាមប្រធានមន្ទីរអប់រំ ពេលប្រឡងចំថ្ងៃទី១ ពោលត្រូវនឹងថ្ងៃទី​១៤ ខែកក្កដា អវត្តមានបេក្ខជនចំនួន ២៣២ នាក់ ស្រី ៨០ នាក់។ ប៉ុន្តនៅការប្រឡងឌីប្លូម នៅព្រឹកថ្ងៃទី ២នេះ អវត្តមានបេក្ខជនតែ ៨នាក់ប៉ុណ្ណោះ។

យ៉ាងណាមិញ លោក ហែម ស៊ីណារ៉េត បញ្ជាក់ថា សម្រាប់ដំណើរការប្រឡងឌីប្លូមនៅព្រឹកថ្ងៃទី២នេះបានប្រព្រឹត្តទៅមានលក្ខណៈល្អប្រសើរ មានភាពស្ងប់ស្ងាត់ និងអនុវត្តបានត្រឹមត្រូវតាមសេចក្តីណែនាំរបស់ក្រសួង។ ចំពោះមុខវិជ្ជាដែលត្រូវប្រឡងនៅព្រឹកនេះរួមមាន គណិតវិទ្យា និងការសរសេរតាមអាន និងពេលរសៀលមានមុខវិជ្ជា ជីវវិទ្យា ប្រវត្តិវិទ្យា និង ភាសាបរទេស។

គួរបញ្ជាក់ថា ដំណើរការប្រឡងសញ្ញាបត្រមធ្យមសិក្សាបឋមភូមិ ឬឌីប្លូមសម្រាប់ឆ្នាំសិក្សា ២០២៤-២០២៥ មាន​រយៈពេល២ ថ្ងៃចាប់ពីថ្ងៃទី១៤-១៥ ខែកក្តដា ឆ្នាំ២០២៥ នេះតទៅ និងប្រកាសលទ្ធផលនៅថ្ងៃទី២១កក្តដាខាងមុខ៕

អត្ថបទ៖ សំអឿន