កម្លាំងតម្រួតថៃរាយលួសបន្លាចូលដីកម្ពុជាក្នុងស្រុកអូរជ្រៅ ខេត្តបន្ទាយមានជ័យ

កម្លាំងប្រដាប់ដោយអាវុធរបស់ថៃ បានបន្តរំលោភបំពានបទឈប់បាញ់ ដោយធ្វើសកម្មភាពរាយលួសបន្លាលើដីកម្ពុជាក្នុងភូមិសាស្ត្រស្រុកអូរជ្រៅ ខេត្តបន្ទាយមានជ័យ។ នេះបើតាមការអះអាងរបស់អ្នកនាំពាក្យក្រសួងការពារជាតិកម្ពុជា។

ថ្លែងឱ្យដឹងនាវេលារសៀលថ្ងៃទី១៣ ខែសីហានេះ លោកស្រី ម៉ាលី សុជាតា អ្នកនាំពាក្យក្រសួងការពារជាតិ ថា កាលពីថ្ងៃទី១២​ និងនៅថ្ងៃទី១៣ ខែសីហា ឆ្នាំ២០២៥ កងកម្លាំងប៉ារ៉ាថៃ និងតម្រួតព្រំដែនថៃ ប្រដាប់ដោយអាវុធ បានធ្វើសកម្មភាពចូលមកត្រួតពិនិត្យនៅទល់មុខច្រកជោគជ័យ ដោយបានលួសបន្លា ថែមទាំងបានដាក់កង់ឡាននៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

សកម្មភាពឈ្លានពាននេះ ត្រូវបានលោកស្រី ម៉ាលី សុជាតា ប្រាប់ឱ្យភាគីថៃបញ្ឈប់ជាបន្ទាន់ ដោយគ្មានលក្ខខណ្ឌនូវរាល់សកម្មភាពដែលបានរំលោភបំពានបទឈប់បាញ់ ព្រមទាំងស្មារតីឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥ ក្រោមការចូលរួមសង្កេតការណ៍ដោយម៉ាឡេស៊ី សហរដ្ឋអាមេរិក និងតំណាងប្រទេសចិន។

អ្នកនាំពាក្យក្រសួងការពារជាតិ បានគូសរំលេចឡើងវិញនូវការព្រមព្រៀងគ្នាដោយភាគីកម្ពុជា និងថៃ ដែលបានឯកភាពគ្នារក្សាកម្លាំងយោធារបស់ខ្លួនក្នុងទីតាំងបច្ចុប្បន្ន​ ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនឈរជើងក្នុងពេលព្រៀងបទឈប់បាញ់បានចូលជាធរមាននៅម៉ោង១២យប់កាលពីថ្ងៃទី២៨ ខែកក្កដា ឆ្នាំ២០២៥ ពិសេសមិនត្រូវចល័តកងទ័ពរបស់ខ្លួនរាប់ទាំងការដើរល្បាតទៅលើទីតាំងរបស់ភាគីម្ខាងទៀតឡើយ។

បើតាមលោកស្រីអ្នកនាំពាក្យ ក្នុងកិច្ចប្រជុំ GBC កន្លងទៅ ភាគីទាំងពីរ ក៏ព្រមព្រៀងគ្នាមិនប្រព្រឹត្តសក​ម្មភាពបង្កហេតុណាមួយ ដែលនាំឱ្យមានភាពតានតឹងឡើងវិញផងដែរ រាប់ទាំងការមិនសាងសង់ ឬពង្រីកហេដ្ឋារចនាសម្ព័ន្ធយោធា ឬលេណដ្ឋានហួសពីដែនរបស់ខ្លួនឡើយ។ ដូច្នេះសកម្មភាពរាយលួសបន្លាដោយកម្លាំងតម្រួតថៃចូលដីកម្ពុជាក្នុងស្រុកអូរជ្រៅ ខេត្តបន្ទាយមានជ័យ លោកស្រី ចាត់ទុកថា ជាការរំលោភបំពានបទឈប់បាញ់រវាងប្រទេសទាំងពីរ៕

ដោយ៖ ធឿន វ៉ាន់សុង