កិច្ចប្រជុំវិសាមញ្ញ RBC កម្ពុជា-ថៃ ធ្វើឡើងថ្ងៃនេះ រំពឹងនឹងមានលទ្ធផលវិជ្ជមានថែមទៀត

នៅព្រឹកថ្ងៃទី២២ ខែសីហា ឆ្នាំ២០២៥នេះ កម្ពុជា-ថៃ បានរៀបចំកិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគ (RBC) ដែលប្រព្រឹត្តនៅខេត្តស្រះកែវ ប្រទេសថៃ។

តាមការបញ្ជាក់ឱ្យដឹងដោយអ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា នៅក្នុងកិច្ចប្រជុំវិសាមញ្ញនៅថ្ងៃនេះ ភាគីកម្ពុជាដឹកនាំដោយឧត្តមសេនីយ៍ឯក ឯក សំអូន មេបញ្ជាការយោធភូមិភាគទី៥ និងភាគីថៃ គឺដឹកនាំដោយឧត្តមសេនីយ៍ឯក Amarit Boonsuya មេបញ្ជាការកងទ័ពភូមិភាគទី១។

កិច្ចប្រជុំវិសាមញ្ញនេះ គឺធ្វើឡើង​បន្ទាប់ពី​កិច្ចប្រជុំ​ថ្នាក់​លេខាធិការដ្ឋានគណៈកម្មាធិការ​ព្រំដែន​ថ្នាក់​យោធភូមិភាគ​កម្ពុជា​-​ថៃ (RBC) ដែលបាន​ប្រព្រឹត្តទៅកាលពីថ្ងៃទី២១ ខែសីហា ម្សិលមិញ។

សម្រាប់កិច្ចប្រជុំថ្ងៃនេះ កម្ពុជា រំពឹងថា នឹងទទួលបានលទ្ធផលជាវិជ្ជមានបន្ថែមទៀត។ លោកស្រី ម៉ាលី សុជាតា លើកឡើងថា ការវិវត្តជាវិជ្ជមានជាបន្តបន្ទាប់ទាំងនេះនឹងអនុញ្ញាតឱ្យភាគីទាំងពីរអាចជំរុញការអនុវត្តបទឈប់បាញ់កាន់តែមានប្រសិទ្ធភាពពេញលេញ ដោយនាំមកនូវសន្តិភាព ស្ថិរភាព និងស្ថានភាពប្រក្រតីវិលត្រលប់មកវិញបានឆាប់រហ័ស៕

ដោយ៖ ធឿន វ៉ាន់សុង