ព័ត៌មានជាតិ

ផ្សារ«បក្សីរស់» នឹងផ្ដើមការសាងសង់នៅដើមខែកញ្ញា ជាប់ផ្សារធំតាកែវ

បានផុស

១០ ខែ មុន

នៅ

ថ្ងៃសៅរ៍ ២៣ សីហា ២០២៥

ដោយ

លោក ថៃ លី ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តតាកែវ បានឱ្យដឹងថា ដំណើរការសាងសង់ផ្សារ«បក្សីរស់» នៅទីតាំងជាប់ផ្សារធំតាកែវ ផ្នែកខាងកើត ស្ថិតក្នុងសង្កាត់រកាក្រៅ ក្រុងដូនកែវ ខេត្តតាកែវ នឹងចាប់ផ្ដើមនៅថ្ងៃទី ០៣ ខែកញ្ញា ឆ្នាំ ២០២៥ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកបើតាមប្រភពពីសាលាខេត្តតាកែវ បានបង្ហាញដែរថា យោងតាមលិខិតរបស់អគ្គនាយកដ្ឋានសុខភាពសត្វ និងផលិតកម្មសត្វ ដែលផ្ញើជូនលោកអភិបាលខេត្តតាកែវ ដោយសុំផ្ដល់កិច្ចសហការ បានឱ្យដឹងដែរថា គម្រោងសុខភាពសត្វឆ្លងកាត់ព្រំដែន និងការជំរុញខ្សែចង្វាក់តម្លៃសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ បានទទួលហិរញ្ញប្បទានពីធនាគារអភិវឌ្ឍន៍អាស៊ី និងពីធនាគារវិនិយោគហេដ្ឋារចនាសម្ព័ន្ធអាស៊ី សម្រាប់អនុវត្តគម្រោងសាងសង់ផ្សារ«បក្សីរស់»នេះ។

ក្នុងលិខិតដដែល បញ្ជាក់ថា គម្រោងការសាងសង់ផ្សារ«បក្សីរស់» នៅផ្សារតាកែវ គឺ មានទំហំបណ្ដោយ ១៨,៥ ម៉ែត្រ ទទឹង ៩,៨ ម៉ែត្រ និង កម្ពស់ ៦,៧ ម៉ែត្រ ២ ជាន់ និងត្រូវមានប្រព័ន្ធប្រព្រឹត្តិកម្មទឹកកខ្វក់ ហើយមានស្តង់លក់ និងទីតាំងពិឃាដបក្សីដែលចាប់សាងសង់ពីថ្ងៃទី ០៣ ខែកញ្ញា ឆ្នាំ ២០២៥ បញ្ចប់ការសាងសង់នៅថ្ងៃទី ១៧ ខែកុម្ភៈ ឆ្នាំ ២០២៦៕

អត្ថបទ ៖ វីរៈ