ឈ្មួញឈូសឆាយភ្នំយកអាចម៍ដីក្រហមខុសច្បាប់ នៅស្រុកឆែប ត្រូវបានកម្លាំងសមត្ថកិច្ចចុះបង្ក្រាប

ដីព្រៃរដ្ឋមួយកន្លែងក្នុងភូមិកំពង់ស្រឡៅ ឃុំកំពង់ស្រឡៅមួយ ស្រុកឆែប ខេត្តព្រះវិហារ ត្រូវបានកម្លាំងសមត្ថកិច្ចចម្រុះ ដែលដឹកដោយតំណាងអយ្យការអមសាលាដំបូងខេត្តបានចុះបង្ក្រាបបានអេស្កាកាយដីមួយគ្រឿង និងរថយន្ត ដឹកអេស្កាវ៉ាទ័រមួយគ្រឿង ក្រោយមានការរាយការណ៍ពីប្រជាពលរដ្ឋ ករណីមានគេលួចឈូសឆាយភ្នំយកអាចម៍ដីក្រហមក្នុងតំបន់ហាមឃាត់។

ប្រភពព័ត៌មានបានអោយដឹងថា ករណីឈូកឆាយយកដីក្រហមយកទៅលក់នៅតាមតំបន់ផ្សេងៗនោះ បានកើតឡើងយូរយារណាស់មកហើយ ទើបតែពេលនេះឃើញមានកម្លាំងសមត្ថកិច្ចចម្រុះចុះមកបង្ក្រាប។ ពលរដ្ឋនៅទីនោះបានថ្លែងអំណរគុណដល់សមត្ថកិច្ចចម្រុះដែលបានចុះបង្ក្រាបទីតាំងខាងលើនោះបានទាន់ពេល។

លោកមឿន សុភេទ ប្រធានមន្ទីរបរិស្ថានខេត្តព្រះវិហារ បានឲ្យដឹងថា នៅថ្ងៃទី២៩ ខែសីហា ឆ្នាំ២០២៥ លោក ស្រេង វុទ្ធា ព្រះរាជ្ញារងអមសាលាដំបូងខេត្តព្រះវិហារ ដឹកនាំមន្រ្តីការិយាល័យព្រះរកា-ឆែប ចំនួន០៧នាក់ មន្ត្រីនរគបាលស្រុកឆែបចំនួន០៤ នាក់ មេភូមិកំពង់ស្រឡៅ មេភូមិកំពង់សង្កែ ចុះចំណុចជើងភ្នំសង្កែ ស្ថិតក្នុងភូមិកំពង់ស្រឡៅ ឃុំកំពង់ស្រឡៅមួយ ស្រុកឆែប ខេត្តព្រះវិហារ បានចាប់ឃាត់គ្រឿងចក្រចំនួន០១គ្រឿង កំពុងឈូសឆាយដីដោយគ្មានការអនុញ្ញាត និងឡានដឹកអេស្កាវាទ័រចំនួន០១គ្រឿង វត្ថុតាងយកទៅរក្សាទុកនៅសាលាដំបូងខេត្តព្រះវិហារ ដើម្បីបន្តនីតិវិធីនៃច្បាប់៕

ដោយ៖ជុន កុសល