ព័ត៌មានជាតិ

សម្តេចធិបតី អំពាវនាវឲ្យពលរដ្ឋខ្មែររួមគ្នាជាធ្លុងមួយក្នុងស្មារតីការពារឧត្តមប្រយោជន៍ជាតិក្នុងឱកាសបុណ្យភ្ជុំបិណ្ឌ

បានផុស

៩ ខែ មុន

នៅ

ថ្ងៃអាទិត្យ ២១ កញ្ញា ២០២៥

ដោយ

ក្នុងឱកាសដែលពលរដ្ឋកម្ពុជាកំពុងប្រារព្ធពិធីបុណ្យភ្ជុំបិណ្ឌជាបុណ្យប្រពៃណីជាតិដ៏ធំ ប្រមុខមេដឹកនាំកម្ពុជាបានថ្លែងសារចូលរួមអបអរថ្ងៃដ៏ពិសេសនៃពិធីបុណ្យជាតិជាប្រពៃណីនេះ។

ខណៈពិធីបុណ្យភ្ជុំបិណ្ឌនឹងប្រព្រឹត្តិទៅត្រូវថ្ងៃច័ន្ទ ទី ២២ ខែកញ្ញា ឆ្នាំ ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវឲ្យពលរដ្ឋខ្មែរទូទាំងប្រទេសរួមគ្នាជាធ្លុងមួយ ក្នុងស្មារតីការពារឧត្តមប្រយោជន៍ជាតិប្រកបដោយភក្តីភាពបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុណ្យភ្ជុំបិណ្ឌដែលជាពេលវេលាដែលពលរដ្ឋទូទាំងប្រទេស ត្រូវធ្វើបុណ្យឧទ្ទិសកោសល្យជូនញាតិកាដែលបានចែកឋាន ក៏ដូចជាការជួបជុំសាច់ញាតិបងប្អូនជិតឆ្ងាយ សម្តេចធិបតីក៏បានថ្លែងអំណរគុណនិងដឹងគុណដល់វីរកងទ័ពដែលកំពុងទទួលភារកិច្ចថែរក្សាការពារទឹកដីជូនជាតិមាតុភូមិតាមខ្សែបន្ទាត់ព្រំដែន ហើយដែលត្រូវឃ្លាតឆ្ងាយពីសាច់ញាតិក្នុងឱកាសថ្ងៃជួបជុំដ៏រីករាយនៃឱកាសបុណ្យភ្ជុំបិណ្ឌ។

ជាមួយគ្នានេះ សម្តេចនាយករដ្ឋមន្ត្រីក៏រំលឹកពីយោធិនខ្មែរទាំង ១៨ នាក់ ដែលត្រូវបានចាប់និងឃុំខ្លួនដោយភាគីថៃ ដែលរដ្ឋាភិបាលមិនដែលភ្លេចឡើយ និងកំពុងប្រើប្រាស់គ្រប់មធ្យោបាយទាំងការទូតនិងផ្លូវច្បាប់ ដើម្បីនាំឲ្យមានការដោះលែងនិងការធ្វើមាតុភូមិនិវត្តមកជួបជុំគ្រួសារឲ្យបានឆាប់រហ័សបំផុត និងប្រកបដោយសុវត្ថិភាព។

បន្ថែមពីនេះ សម្តេចក៏បានលើកឡើងចំពោះស្មារតីស្រលាញ់ជាតិមាតុភូមិរបស់ពលរដ្ឋគ្រប់ទិសទី ដែលបានរួមចំណែកទាំងកម្លាំងកាយចិត្ត និងថវិកា ក្នុងការជួយជនភៀសខ្លួននៅតាមព្រំដែន ក្នុងស្ថានភាពដែលកម្ពុជាមានជម្លោះព្រំដែនជាមួយប្រទេសថៃ។

ពាក់ព័ន្ធការដោះស្រាយជម្លោះព្រំដែនជាមួយប្រទេសថៃ សម្តេចបានលើកឡើងពីការប្រើប្រាស់យន្តការដោះស្រាយដោយសន្តិវិធី ផ្អែកតាមការទូតនិងតាមច្បាប់អន្តរជាតិ។

សម្តេចថា សង្រ្គាមមិនអាចបញ្ចប់ដោយសង្គ្រាមនោះទេ។ មានតែការជ្រើសរើសដោះស្រាយផ្អែកលើច្បាប់ មិត្តភាព និងការយោគយល់គ្នាតែប៉ុណ្ណោះ ទើបបញ្ចៀសបានការខូចខាតនិងការបាត់បង់អាយុជីវិតរបស់ប្រជាពលរដ្ឋ។

សម្តេចបានលើកឡើងពីតម្លៃនៃសន្តិភាពដែលមិនអាចកាត់ថ្លៃបាន និងស្នើឲ្យពលរដ្ឋបន្តជឿជាក់លើរដ្ឋាភិបាល ក្នុងកិច្ចការពារផលប្រយោជន៍ជាតិនិងប្រជាជន និងការនាំមាគ៌ាកម្ពុជាឆ្ពោះទៅរកការអភិវឌ្ឍនិងប្រកបដោយវិបុលភាព៕

Related Topics:Featured សម្ដេចធិបតី ហ៊ុន ម៉ាណែត

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា