គ.ជ.ប ជូនដំណឹងពីការអនុញ្ញាតឲ្យតំណាងបក្សនយោបាយ ៤ ចូលជួបបង្ហាញអំពីសំណើកែលម្អប្រព័ន្ធបោះឆ្នោត

គណៈកម្មាធិការជាតិរៀបចំការបោះឆ្នោត (គ.ជ.ប) បានជូនដំណឹងអំពីការអនុញ្ញាតឲ្យតំណាងគណបក្សនយោបាយចំនួន ៤ ចូលជួប ដើម្បីបង្ហាញអំពីសំណើសុំកែលម្អប្រព័ន្ធបោះឆ្នោតនៅកម្ពុជា។

សេចក្ដីជូនដំណឹងរបស់ គ.ជ.ប នៅថ្ងៃទី ៣០ ខែសីហានេះ បានឲ្យដឹងថា គ.ជ.ប អនុញ្ញាតឲ្យតំណាងគណបក្សនយោ បាយចំនួន ៤ រួមមាន៖ គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន គណបក្សភ្លើងទៀន និងគណ បក្សកែទម្រង់កម្ពុជា ដើម្បីចូលជួបនាថ្ងៃទី ៣១ ខែសីហា ឆ្នាំ ២០២២ វេលាម៉ោង ១០ និង០០ព្រឹក នៅទីស្ដីការ គ.ជ.ប។

បើតាម គ.ជ.ប ការអនុញ្ញាតឲ្យចូលជួបនេះ គឺឆ្លើយតបតាមសំណើរបស់គណបក្សនយោបាយទាំង ៤ខាងលើ ដែល សុំជួបជាមួយ គ.ជ.ប ដើម្បីបង្ហាញអំពីសំណើកែលម្អប្រព័ន្ធបោះឆ្នោតនៅកម្ពុជា។ សមាសភាព គ.ជ.ប សម្រាប់ជំនួបនេះ រួមមាន៖ លោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប, លោក ទេព នីថា អគ្គលេខាធិការ គ.ជ.ប ព្រមទាំងមន្ត្រីជាន់ខ្ពស់ នៃអគ្គលេខាធិការដ្ឋាន គ.ជ.ប មួយចំនួនទៀត៕