បច្ចុប្បន្នមានគណបក្សនយោបាយចំនួន ៤៥​ បានចុះបញ្ជីនៅក្រសួងមហាផ្ទៃ

គិតត្រឹមខែកញ្ញា ឆ្នាំ ២០២២នេះ មានគណបក្សនយោបាយចំនួន ៤៥ បានចុះបញ្ជីគណបក្សនយោ​បាយ នៅក្រសួងមហាផ្ទៃ។ នេះបើតាមការឲ្យដឹងពីលោក ខៀវ សុភ័គ អ្នកនាំពាក្យក្រសួងមហាផ្ទៃ។

លោក ខៀវ សុភ័គ មានប្រសាសន៍ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងមហាផ្ទៃ” នាព្រឹកថ្ងៃទី ១៤ ខែតុលានេះថា ចាប់ពីឆ្នាំ ២០១៨ ដល់ឆ្នាំ ២០២២នេះ ក្រសួងមហាផ្ទៃ បានសម្រេចអនុញ្ញាតឲ្យបង្កើតគណបក្សនយោបាយចំនួន ៩ និងចុះឈ្មោះក្នុងបញ្ជីគណបក្សចំនួន ១៧ ហើយលុបឈ្មោះចេញពីបញ្ជីបគណបក្សនយោបាយចំនួន ៨។

ជាមួយគ្នានេះ អ្នកនាំពាក្យក្រសួងមហាផ្ទៃ ក៏បានឲ្យដឹងដែរថា ក្នុងការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥កន្លងទៅនេះ មានគណបក្សនយោបាយ ចូលរួមប្រកួតប្រជែងរហូតដល់ទៅ ១៧គណបក្ស។ ក្នុងនោះ មានប្រជាពលរដ្ឋបានទៅបោះឆ្នោតចំនួន ៧,៣៨២,៤៤៩នាក់ ស្មើនឹង ៨០,១៩ភាគរយ នៃអ្នកមានឈ្មោះក្នុងបញ្ជីបោះឆ្នោត ហើយជាលទ្ធផល មានគណបក្សនយោបាយចំនួន ៩ ទទួលបានអាសនៈក្នុងក្រុមប្រឹក្សាឃុំ-សង្កាត់៕

អត្ថបទ៖ ឃួន សុភ័ក្រ