នយោបាយ
គណបក្សនយោបាយ ត្រៀមខ្លួនចុះបញ្ជីគណបក្ស និងបញ្ជីបេក្ខជនរួចរាល់ហើយ សម្រាប់ការបោះឆ្នោតតំណាងរាស្រ្ដ
គណបក្សនយោបាយនានា បានត្រៀមខ្លួនរួចហើយ ដើម្បីចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតាំង តំណាងរាស្ត្រ នីតិកាលទី ៧ ឆ្នាំ ២០២៣នេះ។
បើតាមសេចក្ដីជូនដំណឹងរបស់ គ.ជ.ប បានឲ្យដឹងថា ការទទួលពាក្យសុំចុះបញ្ជីគណបក្សនយោបាយឈរឈ្មោះបោះ ឆ្នោត និងបញ្ជីបេក្ខជនឈរឈ្មោះបោះឆ្នោត មានរយៈពេល ១៥ថ្ងៃ ចាប់ផ្ដើមពីថ្ងៃទី ២៤ ខែមេសា ឆ្នាំ ២០២៣ និងបញ្ចប់នៅថ្ងៃទី ៨ ខែឧសភា ឆ្នាំ ២០២៣។
លោក សុខ ឥសាន អ្នកនាំពាក្យគណបក្សប្រជាជនកម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ១១ ខែមេសានេះថា គណបក្សប្រជាជនកម្ពុជា បានរៀបចំឯកសារគ្រប់គ្រាន់ហើយ សម្រាប់ការចុះបញ្ជីគណបក្សឈរឈ្មោះបោះឆ្នោត និងបេក្ខជនឈរឈ្មោះបោះឆ្នោត។
លោកមានប្រសាសន៍បែបនេះថា «យើងបានរៀបចំឯកសារគ្រប់គ្រាន់ហើយ ចាំតែដល់ថ្ងៃ គ.ជ.ប ប្រកាសឲ្យដាក់ យើងដាក់ថ្ងៃទីមួយតែម្ដង»។ អ្នកនាំពាក្យរូបនេះ បានបញ្ជាក់បន្ថែមថា គណបក្សប្រជាជនកម្ពុជា នឹងដាក់បេក្ខជនឈរឈ្មោះបោះឆ្នោតនៅគ្រប់ ២៥រាជធានី-ខេត្ត តែម្ដង ដោយលោកឲ្យដឹងបែបនេះថា «យើងដាក់ដូចពីលើកមុនៗដែរ យើងដាក់គ្រប់មណ្ឌលបោះឆ្នោតទាំងអស់»។
រីឯគណបក្សហ៊្វុនស៊ិនប៉ិចវិញ បើតាមលោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច ឲ្យកម្ពុជាថ្មីដឹងថា រហូតមកដល់ពេលនេះ គណបក្សហ៊្វុនស៊ិនប៉ិច បានត្រៀមខ្លួនចុះបញ្ជីគណបក្ស និងបញ្ជីបេក្ខជនឈរឈ្មោះ រួចរាល់ហើយ ដោយនៅពេល គ.ជ.ប ប្រកាសទទួលពាក្យ គឺគណបក្សហ៊្វុនស៊ិនប៉ិច នឹងដាក់តែម្ដង។
លោក ញឿន រ៉ាដែន បានបញ្ជាក់ដែរថា «គណបក្សហ៊្វុនស៊ិនប៉ិច មានបេក្ខជនឈរឈ្មោះ តំណាងគណបក្សគ្រប់ ២៥ រាជធានី-ខេត្ត»។
មិនខុសគ្នាដែរ គណបក្សយុវជនកម្ពុជារបស់លោក ពេជ្រ ស្រស់ វិញ ក៏បានត្រៀមខ្លួនរួចរាល់ហើយដែរ។ លោក ពេជ្រ ស្រស់ បានឲ្យដឹងនៅថ្ងៃអង្គារនេះថា គណបក្សយុវជនកម្ពុជា បានត្រៀមខ្លួនរួចរាល់ហើយ ចំពោះការចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតំាង តំណាងរាស្រ្ដ នីតិកាលទី ៧នេះ។
ប្រធានគណបក្សរូបនេះ បានបញ្ជាក់ឲ្យដឹងដែរថា «គណបក្សយុវជនកម្ពុជា សម្រេចឈរឈ្មោះទូទាំង ២៥ រាជធានី-ខេត្ត»។
សូមជម្រាបថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០២៣ខាងមុខ ហើយគណបក្សនយោបាយទាំងអស់ ដែលបានចុះបញ្ជីត្រឹមត្រូវនៅក្រសួងមហាផ្ទៃ មានបំណងសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត អាចចុះឈ្មោះ ចាប់ផ្ដើមពីថ្ងៃទី ២៤ ខែមេសា ឆ្នាំ ២០២៣ខាងមុខ៕
អត្ថបទ៖ ឃួន សុភ័ក្រ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង