ក្រសួងមហាផ្ទៃ បដិសេធសំណើរសុំបង្កើតគណបក្ស ខ្ញុំបម្រើខ្មែរ  

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស​ សុខា នៅល្ងាចថ្ងៃទី៦ ខែតុលានេះ បានបដិសេធសំណើស្នើសុំបង្កើតគណបក្សឈ្មោះ ខ្ញុំបម្រើខ្មែរ ដែលមានលោក​ ឯម សុខសុវណ្ណ ជាតំណាងស្ថានិកគណបក្ស។ នេះបើតាមលិខិតមួយច្បាប់ដែល លោក ស សុខា ចុះហត្ថលេខា នាល្ងាចថ្ងៃទី០៦ ខែតុលានេះ ដើម្បី​ជូនដំណឹងទៅលោក ឯម សុខសុវណ្ណ។

បើតាមលិខិតរបស់ក្រសួងមហាផ្ទៃ មូលហេតុ នៃការបដិសេធសំណើសុំបង្កើតគណបក្សនយោបាយឈ្មោះ ខ្ញុំបម្រើខ្មែរ នេះ  គឺដោយសារតមានចំណុចមួយចំនួន នៅតែមិនអនុលោមតាមបទប្បញ្ញត្តិ នៃច្បា​ប់ស្ដីពីគណបក្សនយោបាយក្នុងប្រទេសកម្ពុជា។​

ជាការកត់សម្គាល់ នេះជាលើកទី២ ហើយដែលក្រសួងមហាផ្ទៃ បដិសេធសំណើរបស់លោក ឯម​ សុខសុវណ្ណ​ ដែលសុំបង្កើតគណបក្សនយោបាយនៅកម្ពុជា។ លើកទីមួយ គឺកាលពីថ្ងៃទី១២ ខែកញ្ញា កន្លងទៅ ក្រសួងមហាផ្ទៃបានបដិសេធ សំណើរបស់លោក ឯម សុខ សុវណ្ណ ដែលសុំបង្កើតគណបក្សឈ្មោះ អាយ៉ងខ្មែរ ហើយចំពោះមូលហេតុដែលក្រសួងមហាផ្ទៃបដិសេធសំណើសុំបង្កើតគណបក្សនោះ គឺដោយសារមានចំណុចមួយចំនួន មិនអនុលោមតាមបទប្បញ្ញត្តិ នៃច្បា​ប់ស្ដីពីគណបក្សនយោបាយក្នុងប្រទេសកម្ពុជា និងតំណាងគណបក្សមិនបានចុះហត្ថលេខាទទួលស្គាល់បញ្ជីរាយនាមពលរដ្ឋខ្មែរទាំង៨០រូប ដែលផ្ដួចផ្ដើមបង្កើតគណបក្ស អាយ៉ងខ្មែរនេះ៕

ដោយ៖ ង៉ិល ណារ៉ាត់