សម្តេចធិបតី៖ រាជរដ្ឋាភិបាល​មិនដែលមានគំនិតម្តងណាក្នុងការធ្វើឱ្យបាត់បង់ទឹកដីឡើយ

រាជរដ្ឋាភិបាល​កម្ពុជា មិនដែលមានគំនិតម្តងណាក្នុងការធ្វើឱ្យបាត់បង់ទឹកដី អធិបតេយ្យភាព ឬធ្វើឱ្យខេត្តរបស់យើងក្លាយទៅជា (រណប) ជាមួយនរណាទេ ប៉ុន្តែផ្ទុយទៅវិញមានតែខំពង្រឹងអធិបតេយ្យភាព ពង្រឹងទឹកដី និងពង្រឹងប្រជាពលរដ្ឋឱ្យខ្លាំង តាមរយៈការថែរក្សាឱ្យបាននូវសុខសន្តិភាព ស្ថិរភាពកុំឱ្យបែកបាក់គ្នា និងជំរុញការអភិវឌ្ឍក្នុងតំបន់កាន់តែច្រើន។

នេះជាការបញ្ជាក់ឡើងវិញរបស់នាយករដ្ឋមន្រ្តី សម្តេចធិបតី ហ៊ុន ម៉ាណែត ក្នុងឱកាសអញ្ជើញជាអធិបតី សម្ពោធដាក់ឱ្យប្រើប្រាស់ជាផ្លូវការ “ទំនប់អូរតេធិបតី”  ខេត្តមណ្ឌលគិរី ព្រឹកថ្ងៃព្រហស្បតិ៍ ទី២៤ តុលា ២០២៤។ សម្តេចធិបតី បានលើកឡើងថា គោលនយោបាយការបរទេសកម្ពុជាមិនថាជាមួយប្រទេសជិតខាង​ ជាមួយបណ្តាប្រទេសមហាអំណាច ឬប្រទេសតូចក្តី គឺធ្វើឡើងដើម្បីផលប្រយោជន៍រួម និងគោរពអធិបតេយ្យភាពគ្នាទៅវិញទៅមក។

សម្តេចធិបតី សង្កត់ធ្ងន់ថា៖«មិនថាទំនាក់ទំនងកម្ពុជាជាមួយវៀតណាម ឡាវ ថៃ សិង្ហបុរី អាមេរិក ចិន ឬជាមួយប្រទេសមហាអំណាច ប្រទេសតូច យើងធ្វើនូវស្មារតីគោរពនូវអធិបតេយ្យភាព ឯករាជ្យភាព និងគោរពផលប្រយោជន៍គ្នាទៅវីញទៅមក នេះគឺជាគោលនយោបាយការបរទេសរបស់យើង»។

ការអះអាងជាថ្មីនេះ បន្ទាប់ពីក្រុមធ្វើនយោបាយមួយចំនួននៅក្រៅប្រទេសដែលមាននិន្នាការប្រឆាំងនឹងរាជរដ្ឋាភិបាលកម្ពុជាបន្តបំផុសរឿងជុំវិញកិច្ចសហប្រតិបត្តិការអភិវឌ្ឍតំបន់ត្រីកោណ CLVដើម្បីធ្វើឱ្យប្រជាពលរដ្ឋមានការយល់ច្រឡំ។
សម្តេចសង្កត់ធ្ងន់ថា៖«ការបំផុសរឿង CLV DTA គឺជាផ្នែកមួយអាចធ្វើឱ្យបែកបាក់សាមគ្គី និងឯកភាពជាតិ តាមរយៈការមិនទុកចិត្តគ្នា ដែលជាគ្រោះថ្នាក់ធំ»។

យ៉ាងណាមិញ សម្តេចធិបតី​ បញ្ជាក់ថា៖«អត់មានធ្វើជាមួយពីណាដើម្បីក្រោមរណបពីណាគេទេ  កម្ពុជារដ្ឋឯករាជ្យ អធិបតេយ្យ ប្រជាជនយើង ១៧ លាននាក់ ប្រហែល១០ឆ្នាំទៀត អាចឡើង២០ ទៅជាង ២០លាននាក់»។
សម្តេចបន្ថែមថា៖«ដីខ្មែរ ប្រជាជជនខ្មែរ បង្កើតកូនឱ្យច្រើន កសាងសេដ្ឋកិច្ច កសាងលក្ខខណ្ឌអំណោយទានឱ្យប្រ​ជាពលរដ្ឋកាន់តែរីកចម្រើន នេះហើយជាគោលបំណងធ្វើរបស់រាជរដ្ឋាភិបាលក្នុង ៤០ ឆ្នាំ ហើយអាណត្តិទី ៧ នេះ យើងនៅបន្តធ្វើយ៉ាងម៉េចឱ្យប្រជាជនខ្មែរនៅគ្រប់ទីកន្លែងរួមទាំងខេត្តឦសាន​ កាន់តែរីកចម្រើនធំធាត់គ្រប់វិស័យទាំងអស់»៕