«ភាពជាអ្នកជិតខាងល្អ» ជាអ្វីដែលរដ្ឋមន្ត្រីការបរទេសកម្ពុជា-ថៃលើកយកមកពិភាក្សាគ្នា

ក្រសួងការបរទេសទើបចេញសេចក្ដីប្រកាសព័ត៌មានមួយស្ដីពីជំនួបពិភាក្សាតាមទូរស័ព្ទរវាងឧបនាយករដ្ឋមន្ត្រី រដ្ឋមន្ត្រីការបទេសកម្ពុជាលោក ប្រាក់ សុខុន ជាមួយរដ្ឋមន្ត្រីការបរទេសថៃលោក Maris Sangiampongsa ដែលបានធ្វើឡើងកាលពីថ្ងៃទី១៦ ខែធ្នូ កន្លងទៅ។

ក្នុងសេចក្ដីប្រកាសនោះក្រសួងការបរទេសកម្ពុជាបញ្ជាក់ថាប្រមុខការទូតប្រទេសទាំងពីរបានពិភាក្សាលើកិច្ចសហប្រតិបត្តិការពហុភាគី​រវាង​កម្ពុជា-ថៃ និងការប្ដេជ្ញាចិត្តពង្រឹង​បន្ថែមទៀតនូវចំណងមិត្តភាពដើម្បីជាប្រយោជន៍របស់ប្រទេសទាំងពីរ។

ក្រៅពីនេះក៏មានពិភាក្សាអំពីការរៀបចំសកម្មភាពរួមគ្នាដើម្បីរំលឹកខួបទី៧៥ នៃទំនាក់ទំនងការទូតកម្ពុជា-ថៃ ដែលនឹងរៀបចំនៅប្រទេសថៃក្នុងឆ្នាំ២០២៥ «ដើម្បីស្វែងរកមធ្យោបាយ និងវិធី ក្នុងការ​ធ្វើឱ្យស៊ីជម្រៅថែមទៀតនូវទំនាក់ទំនងទ្វេភាគី និងធានាថាប្រជាជាតិ​ទាំងពីកាន់តែទទួលបានវិបុលភាពរួមគ្នា និងភាពជាអ្នកជិតខាងល្អសម្រាប់ឆ្នាំខាងមុខ​»។

ជាការកត់សម្គាល់ជំនួបរវាងរដ្ឋមន្ត្រីការបទេសទាំងពីរតាមទូរស័ព្ទពេលនេះធ្វើឡើងក្រោយពេលដែលអតីតនាយករដ្ឋមន្ត្រីថៃលោក ថាក់ស៊ីន បានថ្លែងពាក់ព័ន្ធនឹងដែនដីកោះគុតដែលោកថាគឺជាដែនកោះរបស់ថៃ១០០ភាគរយ។

ទោះជាយ៉ាងក្នុងសេចក្ដីប្រកាសព័ត៌មានពីជំនួបតាមទូរស័ព្ទនេះពុំបានលើកឡើងពីបញ្ហាកោះគុតនោះទេតែមានចំណុចមួយបានលើកឡើងថា «ថ្នាក់ដឹកនាំនៃប្រទេសទាំងពីរមានទំនាក់ទំនងជិតស្និតដែលបានពង្រឹងការជឿទុកចិត្តផ្នែកនយោបាយ«។

ចាប់តាំងពីមានការផ្ទុះឡើងនូវការជែកវែកញែកពីភាពជាម្ចាស់លើដែនដីកោះគុតមកទាំងភាគីរដ្ឋាភិបាលកម្ពុជា និងថៃនៅមិនទាន់មានប្រតិកម្មជាយ៉ាងណានោះទេ ខណៈក្រុមប្រឆាំងទាំងនៅថៃ និងកម្ពុជាបានយកប្រធានបទនេះវាយប្រហារលើរដ្ឋាភិបាលប្រទេសទាំងពីររៀងខ្លួន ដោយក្រុមប្រឆាំងថៃបានចោទរដ្ឋាភិបាលថៃធ្វើឱ្យបាត់បង់កោះគុតមកខ្មែរ ខណៈក្រុមប្រឆាំងកម្ពុជាចោទថាធ្វើឱ្យបាត់បង់កោះមួយនេះទៅថៃ។

ប្រធានព្រឹទ្ធសភា សម្ដេចតេជោ ហ៊ុន សែន និងនាយករដ្ឋមន្ត្រី សម្ដេចធិបតី ហ៊ុន ម៉ាណែត ធ្លាប់ប្រាប់ពលរដ្ឋកុំឱ្យជ្រួលច្របល់តាមការញុះញង់របស់ក្រុមប្រឆាំង ដោយថារដ្ឋាភិបាលកំពុងដោះស្រាយបញ្ហានេះដោយយកចិត្តទុកដាក់ និងមានភាពចាស់ទុំខាងនយោបាយ៕

ដោយ ហ៊ុន សិរីវឌ្ឍន៍