នយោបាយ

ប្រធានសភាយកឱកាសជួបភ្ញៀវបរទេសដើម្បីប្រាប់ពីការបំពានរបស់ថៃលើកម្ពុជា

បានផុស

៣៨ វិនាទី មុន

នៅ

ថ្ងៃសុក្រ ២៧ មិថុនា ២០២៥

ដោយ

ប្រធានសភាកម្ពុជា សម្ដេចសភាធិបតី ឃួន សុដារី យកពេលដែលសម្ដេចជួបភ្ញៀវបរទេសដើម្បីជម្រាបពីការបង្កហេតុ និងការឈ្លានពានរបស់ថៃមកលើកម្ពុជា សម្ដេចថាការអូសបន្លាយបញ្ហាព្រំដែនកម្ពុជា-ថៃ គឺដោយថៃបានយកបញ្ហានេះជាចំណាប់ខ្មាំងនយោបាយក្នុងប្រទេសរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យប្រធានរដ្ឋសភាលោក កែវ ពិសិដ្ឋ បានប្រាប់ក្រុមអ្នកយកព័ត៌មាននៅព្រឹកថ្ងៃទី២៧ ខែមិថុនានេះថា ក្នុងជំនួបរវាងសម្ដេចប្រធានសភាជាមួយប្រតិភូសភាតំណាងប្រជាជនចិនខេត្តក្វាងទុង សម្ដេចសភាធិបតីបានពន្យល់ពីដើមចមនៃបញ្ហា និងបញ្ជាក់ថាកម្ពុជាចង់រក្សាសុខសន្តិភាព អភិវឌ្ឍន៍ រក្សានូវសេដ្ឋកិច្ចពាណិជ្ជកម្ម ជាពិសេសព្រំដែនតែបំណងនេះត្រូវបានអូសបន្លាយដោយសារតែថៃបង្កបញ្ហាបំពានលើអធិបតេយ្យភាពកម្ពុជា។

លោកថា៖ «សម្ដេចលើកឡើងនេះគឺដើម្បីឱ្យមិត្តចិនបានយល់ពីបញ្ហាអ្វីដែលបានកើតឡើង។ អ្វីជារឿងត្រូវនិងខុស ហើយដើមចមនោះគឺកើតឡើងពីណាមក ហើយកម្ពុជាបានត្រៀមខ្លួនជាស្រេចក្នុងការដោះស្រាយបញ្ហាតាមរយៈកិច្ចសហប្រតិបត្តិការហើយការចរចាការទូតធ្វើយ៉ាងមិចឱ្យស្ថានការណ៍ត្រលប់មកប្រក្រតីវិញធ្វើឱ្យប្រជាជនគាត់រស់នៅបានសុខស្រួល មានការអភិវឌ្ឍហើយពាណិជកម្មបានល្អឡើងវិញ »។

សមាជិកគណៈកម្មាធិការនៃគណបក្សកុម្មុយនីស្តចិន និងជាអនុប្រធានគណៈកម្មាធិការអចិន្រ្ដៃយ៍នៃសភាតំណាងប្រជាជនចិនខេត្តក្វាងទុងលោក លីវ យេសេង (Lyu Yesheng) បានដឹកនាំប្រតិភូមកកម្ពុជាដើម្បីពង្រីកកិច្ចសហប្រតិបត្តិការរវាងសភាតំណាងប្រជាជនចិនខេត្តក្វាងទុង និង រដ្ឋសភាកម្ពុជា ក៏ដូចជាដើម្បីជំរុញការវិនិយោគរវាងកម្ពុជានិងខេត្តក្វាងទុងឱ្យកាន់តែរីកចម្រើនឡើង។ លោកក៏បានបញ្ជាក់ផងដែរពីចំណងមិត្តភាពដ៏រឹងមាំរវាងកម្ពុជា និងចិនផងដែរ។

កម្ដៅព្រំដែនកម្ពុជាថៃបង្កឡើងពីការឆ្មក់ចូលមកបាញ់សម្លាប់ទាហានខ្មែរម្នាក់កាលពីព្រឹកថ្ងៃទី២៨ ខែឧសភា ឆ្នាំ២០២៥ នៅព្រំដែនមុំ៣ ស្រុកជាំក្សាន្ត ខេត្តព្រះវិហារ ខណៈថៃបានបង្ករឿងផ្សេងៗទៀតដូចជាបិទព្រំដែនដោយឯកតោភាគី និងប្រើប្រាស់សំដីចង់ធ្វើសង្គ្រាមដណ្ដើមដីជាមួយកម្ពុជាទៀតផង។ ទោះជាយ៉ាងណាកម្ពុជាបានជ្រើសរើសការដោះស្រាយដោយយន្តការច្បាប់អន្តរជាតិបើទោះបីថៃនៅតែមិនចង់ឡើងតុលាការក្ដី។

រដ្ឋាភិបាលកម្ពុជាតែងតែបញ្ជាក់ថានឹងបញ្ជៀសសង្គ្រាមឱ្យបានខ្ពស់បំផុត តែថាប្រសិនជាកំពុងដំណើរការក្ដីនៅតុលាការមានការឈ្លានពាននោះកម្ពុជានឹងធ្វើការឆ្លើយតបប្រដាប់អាវុធទៅវិញ។

ក្នុងកិច្ចប្រជុំពេញអង្គគណៈអចិន្ត្រយ៍សភាកាលពីថ្ងៃទី១៩ ខែមិថុនា សម្ដេចសភាធិបតី និងសមាជិកបានលើកទឹកចិត្តដល់សមាជិករដ្ឋសភាទាំងអស់ក្នុងការបំពេញបេសកម្មផ្សារភ្ជាប់សុខទុក្ខរវាងកងទ័ពដែលកំពុងឈរជើងតាមបន្ទាត់ព្រំដែន ជាការរួមចំណែករបស់អ្នកជួរក្រោយគាំទ្រ និងលើកទឹកចិត្តអ្នកនៅជួរខាងមុខជានិច្ច៕